ਮੰਦਰ 'ਚੋਂ ਲੱਖਾਂ ਰੁਪਏ ਦੇ ਗਹਿਣੇ ਤੇ ਨਕਦੀ ਚੋਰੀ
ਸੈਕਟਰ-16 ਦੇ ਸਨਾਤਨ ਧਰਮ ਮੰਦਰ ਵਿਚ ਬੀਤੀ ਰਾਤ ਤਿੰਨ ਚੋਰ ਗੱਲਾ ਤੋੜ ਕੇ ਨਕਦੀ ਅਤੇ ਗਹਿਣਿਆਂ ਤੇ ਹੱਥ ਸਾਫ਼ ਕਰ ਗਏ। ਰਾਤੀ ਕਰੀਬ 1:20 ਵਜੇ ਤਿੰਨ ਚੋਰ ਮੰਦਰ ਵਿਚ ਰਹਿਣ ਵਾਲੇ ਪੁਜਾਰੀ ਦੇ ਕਮਰੇ ਦੀ ਬਾਹਰ ਤੋਂ ਕੁੰਡੀ ਲਗਾ ਕੇ ਅਤੇ ਮੰਦਰ ਦਾ ਤਾਲਾ ਤੋੜ ਕੇ ਚਾਂਦੀ ਦੇ ਸੱਤ ਮੁਕਟ, ਇਕ ਛੱਤਰ, ਸੋਨੇ ਦੀ ਨੱਥ ਅਤੇ ਦਾਨ ਪੇਟੀ ਵਿਚੋਂ ਲਗਭਗ ਡੇਢ ਲੱਖ ਰੁਪਏ ਦੀ ਨਕਦੀ ਚੋਰੀ ਕਰ ਕੇ ਫ਼ਰਾਰ ਹੋ ਗਏ। ਇਸ ਤੋਂ ਇਲਾਵਾ ਚੋਰ ਸ਼ਿਵਲਿੰਗ ਤੋਂ ਚਾਂਦੀ ਦੀ ਪਰਤ 'ਤੇ ਵੀ ਹੱਥ ਸਾਫ਼ ਕਰ ਗਏ। ਪੁਲਿਸ ਮੁਤਾਬਕ ਗਹਿਣਿਆਂ ਅਤੇ ਨਕਦੀ ਨੂੰ ਮਿਲਾ ਕੇ ਚੋਰੀ ਲਗਭਗ 5 ਲੱਖ ਰੁਪਏ ਦੀ ਹੈ।
Temple
ਚੋਰੀ ਕਰਨ ਤੋਂ ਪਹਿਲਾਂ ਚੋਰਾਂ ਨੇ ਮੰਦਰ ਵਿਚ ਲੱਗੇ ਸੀ.ਸੀ.ਟੀ.ਵੀ. ਦੇ ਕੈਮਰੇ ਦੀ ਤਾਰ ਕੱਟ ਦਿਤੀ ਸੀ। ਹਾਲਾਂਕਿ ਮੰਦਰ ਵਿਚ ਹੀ ਲੱਗੇ ਦੂਜੇ ਕੈਮਰੇ ਵਿਚ ਤਿੰਨੇ ਚੋਰ ਕੈਦ ਹੋ ਗਏ। ਮੰਦਰ ਦੇ ਪੁਜਾਰੀ ਵਿਜੇਂਦਰ ਨੇ ਦਸਿਆ ਕਿ ਰਾਤੀ ਜਦੋਂ ਉਹ ਪਖਾਨੇ ਜਾਣ ਲਈ ਉਠੇ ਤਾਂ ਬਾਹਰ ਤੋਂ ਦਰਵਾਜ਼ਾ ਬੰਦ ਸੀ। ਇਸ ਤੋਂ ਬਾਅਦ ਵਜਿੰਦਰ ਨੇ ਮੰਦਰ ਦੇ ਦੂਜੇ ਪੁਜਾਰੀ ਨੂੰ ਫ਼ੋਨ ਕਰ ਕੇ ਪੁਛਿਆ ਤਾਂ ਉਸ ਪੁਜਾਰੀ ਨੇ ਕਿਹਾ ਕਿ ਉਸ ਨੇ ਉਨ੍ਹਾਂ ਦੀ ਬਾਹਰ ਤੋਂ ਕੁੰਡੀ ਨਹੀਂ ਲਗਾਈ ਹੈ। ਜਦੋਂ ਉਹ ਕਿਸੇ ਤਰ੍ਹਾਂ ਦਰਵਾਜ਼ਾ ਖੋਲ੍ਹ ਕੇ ਬਾਹਰ ਆਏ ਤਾਂ ਵੇਖਿਆ ਕਿ ਮੰਦਰ ਦੇ ਮੇਨ ਗੇਟ ਦਾ ਤਾਲਾ ਟੁਟਿਆ ਹੋਇਆ ਸੀ ਅਤੇ ਅੰਦਰ ਮੂਰਤੀਆਂ ਤੋਂ ਮੁਕਟ ਆਦਿ ਉਤਰੇ ਹੋਏ ਸਨ। ਇਸ ਤੋਂ ਬਾਅਦ ਪੁਲਿਸ ਕੰਟਰੋਲ ਰੂਮ 'ਤੇ ਸੂਚਨਾ ਦਿਤੀ। ਮੁਢਲੀ ਜਾਂਚ ਵਿਚ ਪਤਾ ਲੱਗਾ ਹੈ ਕਿ ਚੋਰ ਮੰਦਰ ਦੇ ਮੁੱਖ ਗੇਟ ਦੇ ਤਾਲੇ ਤੋੜ ਕੇ ਅੰਦਰ ਦਾਖ਼ਲ ਹੋਏ ਅਤੇ ਕੁੱਝ ਸਮੇਂ ਬਾਅਦ ਚੋਰੀ ਕਰ ਕੇ ਫ਼ਰਾਰ ਹੋ ਗਏ।
