ਬੀਤੀ ਦਸ ਮਾਰਚ ਨੂੰ ਵੀ ਇਸੇ ਬਾਥਰੂਮ 'ਚੋਂ ਮਿਲਿਆ ਸੀ ਭਰੂਣ
ਡੇਰਾਬਸੀ- ਡੇਰਾਬਸੀ ਸਿਵਲ ਹਸਪਤਾਲ ਦੇ ਐਮਰਜੈਂਸੀ ਵਾਰਡ ਦੇ ਬਾਥਰੂਮ ਵਿਚੋਂ ਅੱਜ ਸਵੇਰੇ ਇੱਕ ਮੇਲ ਭਰੂਣ ਮਿਲਣ ਕਾਰਨ ਸਿਹਤ ਵਿਭਾਗ ਨੂੰ ਹੱਥਾਂ ਪੈਰਾਂ ਦੀ ਪੈ ਗਈ। ਅੱਜ ਸਵੇਰੇ ਕਰੀਬ ਅੱਠ ਵਜੇ ਜਦੋਂ ਹਸਪਤਾਲ ਦਾ ਸਫ਼ਾਈ ਸੇਵਕ ਬਾਥਰੂਮਾਂ ਦੀ ਸਫ਼ਾਈ ਕਰਨ ਲੱਗਿਆ ਤਾਂ ਉਸ ਨੇ ਬਾਥਰੂਮ ਵਿਚ ਲੱਗੀ ਫਲੱਸ਼ ਦੀ ਟੈਂਕੀ ਵਿਚ ਭਰੂਣ ਪਿਆ ਦੇਖਿਆ। ਜਿਸ ਸਬੰਧੀ ਉਸ ਨੇ ਹਸਪਤਾਲ ਦੇ ਸਟਾਫ਼ ਨੂੰ ਜਾਣਕਾਰੀ ਦਿੱਤੀ।
ਦੱਸਣਯੋਗ ਕਿ ਇਸ ਤੋਂ ਪਹਿਲਾਂ ਵੀ ਬੀਤੀ 10 ਮਾਰਚ ਨੂੰ ਇਸੇ ਬਾਥਰੂਮ ਵਿੱਚੋਂ ਇੱਕ ਚਾਰ ਮਹੀਨੇ ਦਾ ਭਰੂਣ ਮਿਲਿਆ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਬਾਥਰੂਮ ਵਿੱਚੋਂ ਮਿਲਿਆ ਭਰੂਣ ਕਰੀਬ ਨੌ ਮਹੀਨੇ ਦਾ ਦੱਸਿਆ ਜਾ ਰਿਹਾ ਹੈ ਅਤੇ ਜਿਸ ਦਾ ਕਰੀਬ ਪੌਣੇ ਤਿੰਨ ਕਿੱਲੋ ਵਜ਼ਨ ਹੈ। ਇਸ ਭਰੂਣ ਨੂੰ ਐਮਰਜੈਂਸੀ ਵਾਰਡ ਤੇ ਬਾਥਰੂਮ ਦੀ ਫਲੱਸ਼ ਦੀ ਟੈਂਕੀ ਵਿਚ ਕੌਣ ਰੱਖ ਗਿਆ ਇਸ ਬਾਰੇ ਪੁਲਿਸ ਤੇ ਹਸਪਤਾਲ ਦਾ ਸਟਾਫ ਪੜਤਾਲ ਕਰ ਰਹੇ ਹਨ।
ਇਸ ਸਬੰਧੀ ਐਸਐਮਓ ਸੰਗੀਤਾ ਜੈਨ ਨੇ ਦੱਸਿਆ ਕਿ ਭਰੂਣ ਮਿਲਣ ਸਬੰਧੀ ਪੁਲਸ ਨੂੰ ਜਾਣਕਾਰੀ ਦੇ ਦਿੱਤੀ ਹੈ ਅਤੇ ਸਿਵਲ ਹਸਪਤਾਲ ਦੇ ਸੀਸੀਟੀਵੀ ਕੈਮਰੇ ਖੰਗਾਲ ਕੇ ਦੋਸ਼ੀਆਂ ਦੀ ਸ਼ਨਾਖਤ ਕੀਤੀ ਜਾ ਰਹੀ ਹੈ।