ਹਜ਼ਰਤ ਅਲੀ ਦੇ ਹੱਥ ਨਾਲ ਹਿਰਨ ਦੀ ਖੱਲ 'ਤੇ ਲਿਖੀ ਗਈ ਕੁਰਾਨ 1,400 ਸਾਲ ਤੋਂ ਰਾਮਪੁਰ 'ਚ ਸੁਰੱਖਿਅਤ ਹੈ।

ਰਾਮਪੁਰ, 24 ਮਈ : ਹਜ਼ਰਤ ਅਲੀ ਦੇ ਹੱਥ ਨਾਲ ਹਿਰਨ ਦੀ ਖੱਲ 'ਤੇ ਲਿਖੀ ਗਈ ਕੁਰਾਨ 1,400 ਸਾਲ ਤੋਂ ਰਾਮਪੁਰ 'ਚ ਸੁਰੱਖਿਅਤ ਹੈ। ਰਾਮਪੁਰ ਰਜ਼ਾ ਲਾਇਬ੍ਰੇਰੀ 'ਚ ਰੱਖੀ ਇਸ ਕੁਰਾਨ 'ਤੇ ਦਸਤਾਵੇਜ਼ੀ ਈਦ (ਸੋਮਵਾਰ) 'ਤੇ ਰਿਲੀਜ਼ ਹੋ ਰਹੀ ਹੈ। ਦੁਨੀਆਂ ਭਰ ਵਿਚ ਫੈਲੇ ਕਰੋੜਾਂ ਲੋਕਾਂ ਤਕ ਇਸ ਦੀ ਖ਼ਾਸੀਅਤ ਪਹੁੰਚ ਜਾਵੇਗੀ।
  ਕੁਰਾਨ ਨੂੰ ਰਾਮਪੁਰ ਰਿਆਸਤ ਦੇ ਨਵਾਬ ਕਲਬੇ ਖ਼ਾਂ ਸਾਊਦੀ ਅਰਬ ਤੋਂ ਲੈ ਕੇ ਆਏ ਸਨ। ਉਦੋਂ ਤੋਂ ਹੀ ਇਸ ਨੂੰ ਸਾਂਭ ਕੇ ਰਖਿਆ ਗਿਆ ਹੈ। ਇਸ ਨੂੰ ਸੁਰੱਖਿਅਤ ਰੱਖਣ ਵੀ ਵਿਸ਼ੇਸ਼ ਤਰੀਕਾ ਹੈ। ਰਜ਼ਾ ਲਾਇਬ੍ਰੇਰੀ ਦੇ ਡਾਇਰੈਕਟਰ ਅਤੇ ਜ਼ਿਲ੍ਹਾ ਅਧਿਕਾਰੀ ਆਂਜਨੇਯ ਕੁਮਾਰ ਸਿੰਘ ਨੇ ਦਸਿਆ ਕਿ ਰਜ਼ਾ ਲਾਇਬ੍ਰੇਰੀ ਨੇ ਆਪਣੇ ਕਿਤਾਬੀ ਖ਼ਜ਼ਾਨੇ ਨੂੰ ਸਾਂਭ ਕੇ ਰਖਿਆ ਹੈ। ਕੁਰਾਨ 'ਤੇ ਦਸਤਾਵੇਜ਼ੀ ਬਣਾਈ ਗਈ ਹੈ। ਇਸ ਵਿਚ ਕੁਰਾਨ ਦੀਆਂ ਸਾਰੀਆਂ ਵਿਸ਼ੇਸ਼ਤਾਵਾਂ ਬਾਰੇ ਜਾਣਕਾਰੀ ਦਿਤੀ ਗਈ ਹੈ।

File photo

ਇਸ ਨੂੰ ਸੋਸ਼ਲ ਮੀਡੀਆ ਰਾਹੀਂ ਲੋਕਾਂ ਤਕ ਪਹੁੰਚਾਇਆ ਜਾਵੇਗਾ। ਰਜ਼ਾ ਲਾਇਬ੍ਰੇਰੀ ਦੇ ਫ਼ੇਸਬੁੱਕ ਅਤੇ ਟਵਿੱਟਰ ਅਕਾਊਂਟ 'ਤੇ ਇਸ ਨੂੰ ਅਪਲੋਡ ਕੀਤਾ ਜਾਵੇਗਾ। ਇਸ ਵਿਚ ਕੁਰਾਨ ਦੇ ਇਤਿਹਾਸ, ਇਸ ਵਿਚ ਕੀ ਜਾਣਕਾਰੀ ਹੈ ਅਤੇ ਇਸ ਨਾਲ ਜੁੜੇ ਹਰ ਪਹਿਲੂ ਦੀ ਜਾਣਕਾਰੀ ਹੋਵੇਗੀ। ਲਾਇਬ੍ਰੇਰੀ ਦੇ ਸੀਨੀਅਰ ਟੈਕਨੀਕਲ ਰੈਸਟੋਰਰ ਸੱਯਦ ਤਾਰਿਕ ਅਜ਼ਹਰ ਦਸਦੇ ਹਨ ਕਿ ਉੱਲੀ ਤੋਂ ਬਚਾਉਣ ਲਈ ਥਾਈਮੋਲ ਅਤੇ ਕੀੜੇ ਮਕੌੜਿਆਂ ਤੋਂ ਬਚਾਉਣ ਲਈ ਪੈਰਾਡਾਈਕਲੋਰੋਬੈਂਜੀਨ ਦੀ ਵਰਤੋਂ ਕਰਦੇ ਹਨ ਜਦਕਿ ਪੁਰਾਣੇ ਦੌਰ ਵਿਚ ਕਪੂਰ ਅਤੇ ਗੈਂਦੇ ਦੀ ਪੱਤੀ ਦੀ ਵਰਤੋਂ ਹੁੰਦੀ ਸੀ। ਇਸ ਲਈ ਤਾਪਮਾਨ ਦਾ ਸਾਧਾਰਨ ਹੋਣਾ ਵੀ ਜ਼ਰੂਰੀ ਹੈ। 18 ਤੋਂ 26 ਡਿਗਰੀ ਤਾਪਮਾਨ ਹੋਣਾ ਚਾਹੀਦਾ ਹੈ। ਲਾਇਬ੍ਰੇਰੀ ਨੂੰ ਆਲੀਸ਼ਾਨ ਇਮਾਰਤ ਇਸ ਦੇ ਲਈ ਢੁਕਵੀਂ ਹੈ।  (ਏਜੰਸੀ)