ਬਦਮਾਸ਼ ਜਾਨ ਬੁੱਟਰ ਅਤੇ ਉਸ ਦੇ ਚਾਰ ਸਾਥੀ ਗ੍ਰਿਫ਼ਤਾਰ
ਖਰੜ, ਐਸ.ਏ.ਐਸ. ਨਗਰ 24 ਜੁਲਾਈ (ਪੰਕਜ ਚੱਢਾ, ਸੁਖਦੀਪ ਸਿੰਘ ਸੋਈ): ਖਰੜ ਦੇ ਸੰਨੀ ਇਨਕਲੇਵ ਵਿਚ ਅੱਜ ਦੁਪਹਿਰ ਵੇਲੇ ਹੋਏ ਮੁਕਾਬਲੇ ਤੋਂ ਬਾਅਦ ਪੁਲਿਸ ਵਲੋਂ ਗੈਂਗਸਟਰ ਜਾਨ ਬੁੱਟਰ ਅਤੇ ਉਸ ਦੇ ਚਾਰ ਸਾਥੀਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਇਸ ਮੌਕੇ ਪੁਲਿਸ ਅਤੇ ਗੈਂਗਸਟਰਾਂ ਵਿਚਾਲੇ ਹੋਈ ਗੋਲੀਬਾਰੀ ਤੋਂ ਬਾਅਦ ਜਾਨ ਬੁੱਟਰ ਦੀ ਲੱਤ ਵਿਚ ਗੋਲੀ ਲੱਗਣ ਉਪਰੰਤ ਉਸ ਨੂੰ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ ਗਿਆ ਹੈ।
ਮੌਕੇ ਉਤੇ ਪੁਲਿਸ ਨੇ 6 ਰਿਵਾਲਵਰ ਅਤੇ ਬਦਮਾਸ਼ਾਂ ਵਲੋਂ ਵਰਤੀ ਜਾ ਰਹੀ ਇਕ ਓਪਨ ਜੀਪ ਵੀ ਬਰਾਮਦ ਕੀਤੀ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਪੁਲਿਸ ਦੀ ਇਹ ਕਾਰਵਾਈ ਦੁਪਹਿਰ ਤਿੰਨ ਵਜੇ ਦੇ ਕਰੀਬ ਆਰੰਭ ਹੋਈ ਅਤੇ 15-20 ਮਿੰਟਾਂ ਵਿਚ ਹੀ ਇਹ ਕਾਰਵਾਈ ਮੁਕੰਮਲ ਕਰ ਲਈ ਗਈ। ਇਸ ਦੌਰਾਨ ਪੁਲਿਸ ਵਲੋਂ ਜਾਨ ਬੁੱਟਰ ਸਮੇਤ ਉਸਦੇ ਸਾਰੇ ਸਾਥੀਆਂ ਨੂੰ ਕਾਬੂ ਕਰ ਲਿਆ ਗਿਆ ਅਤੇ ਜ਼ਖ਼ਮੀ ਹੋਏ ਜਾਨ ਬੁੱਟਰ ਨੂੰ ਹਸਪਤਾਲ ਭਿਜਵਾ ਦਿਤਾ ਗਿਆ ਸੀ। ਫ਼ਲੈਟ ਦੀ ਤਲਾਸ਼ੀ ਲੈਣ ਤੋਂ ਬਾਅਦ ਉੱਥੋਂ 6 ਰਿਵਾਲਵਰ ਵੀ ਬਰਾਮਦ ਕੀਤੇ ਗਏ ਹਨ।
ਪੁਲਿਸ ਵਲੋਂ ਮੌਕੇ ਉਤੇ ਇਕ ਖੁਲ੍ਹੀ ਜੀਪ ਵੀ ਬਰਾਮਦ ਕੀਤੀ ਗਈ ਹੈ ਜਿਸ ਉਤੇ ਬੈਠ ਕੇ ਇਹ ਸਾਰੇ ਗੇੜੀਆਂ ਮਾਰਦੇ ਹੁੰਦੇ ਸੀ। ਆਸਪਾਸ ਰਹਿਣ ਵਾਲੇ ਲੋਕਾਂ ਅਨੁਸਾਰ ਇਹ ਲੋਕ ਕੁੱਝ ਸਮਾਂ ਪਹਿਲਾਂ ਹੀ ਇੱਥੇ ਰਹਿਣ ਆਏ ਸੀ ਅਤੇ ਪਿਛਲੇ ਕੁੱਝ ਦਿਨਾਂ ਤੋਂ ਇੱਥੇ ਕਾਫ਼ੀ ਜ਼ਿਆਦਾ ਲੋਕ ਆਉਂਦੇ ਜਾਂਦੇ ਸੀ। ਮੌਕੇ ਉਤੇ ਖਰੜ ਦੇ ਥਾਣਾ ਸਿਟੀ, ਥਾਣਾ ਸਦਰ, ਸੀ ਆਈ ਏ ਸਟਾਫ਼ ਦੇ ਐਸ ਐਚ ਓ ਸਮੇਤ ਵੱਡੀ ਗਿਣਤੀ ਪੁਲਿਸ ਫ਼ੋਰਸ ਪਹੁੰਚੀ ਹੋਈ ਸੀ। ਪੁਲਿਸ ਵਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ