ਕਈ ਵਾਰ ਤਾਂ ਭੁਲੇਖੇ 'ਚ ਮਾਸਟਰਾਂ ਤੋਂ ਝਿੜਕਾਂ ਖਾ ਜਾਂਦਾ ਵੱਧ ਨੰਬਰ ਲੈਣ ਵਾਲਾ ਹਮਸ਼ਕਲ ਬੱਚਾ
ਜਲੰਧਰ (ਸ਼ੈਸ਼ਵ ਨਾਗਰਾ) - ਪੰਜਾਬ ਦੇ ਜਲੰਧਰ ਸ਼ਹਿਰ ਦੇ ਪੁਲਿਸ ਡੀਏਵੀ ਸਕੂਲ ਨੂੰ ਜੁੜਵਾਂ ਬੱਚਿਆਂ ਦਾ ਸਕੂਲ ਵੀ ਕਿਹਾ ਜਾ ਸਕਦਾ ਹੈ ਕਿਉਂਕਿ ਇਸ ਸਕੂਲ ਵਿਚ ਨਰਸਰੀ ਤੋਂ ਬਾਰ੍ਹਵੀਂ ਤੱਕ ਹਰ ਜਮਾਤ ਵਿਚ ਜੁੜਵਾ ਬੱਚੇ ਹਨ। ਸਕੂਲ ਵਿਚ 42 ਜੋੜੇ ਬੱਚੇ ਯਾਨੀ ਕੁੱਲ 84 ਜੋੜੇ ਬੱਚੇ ਹਨ ਤੇ 2 ਟ੍ਰਿਪਲ ਬੱਚਿਆਂ ਦਾ ਜੋੜਾ ਹੈ। ਕੁੱਲ 90 ਬੱਚੇ ਜੁੜਵਾਂ ਹਨ ਤੇ ਉਹਨਾਂ ਵਿਚ ਕਈ ਭਰਾ-ਭਰਾ ਨੇ ਤੇ ਕਈ ਭੈਣ-ਭਰਾ ਹਨ।
ਦੋ ਸਰਦਾਰ ਭਰਾਵਾਂ ਨਾਲ ਜਦੋਂ ਰੋਜ਼ਾਨਾ ਸਪੋਕਸਮੈਨ ਦੇ ਪੱਤਰਕਾਰ ਨੇ ਗੱਲਬਾਤ ਕੀਤੀ ਤਾਂ ਉਹਨਾਂ ਨੇ ਕਲਾਸ ਵਿਚ ਅਪਣੇ ਨਤੀਜਿਆਂ ਨੂੰ ਲੈ ਕੇ ਬਹੁਤ ਸੋਹਣੀ ਗੱਲ ਕਹੀ ਕਿ ਸਾਡੇ ਵਿਚ ਨੰਬਰਾਂ ਨੂੰ ਲੈ ਕੇ ਕੋਈ ਮੁਕਾਬਲਾ ਨਹੀਂ ਹੈ ਕਿਉਂਕਿ ਅਸੀਂ ਦੋਵੇਂ ਭਰਾ ਹਾਂ ਸਾਡੇ ਵਿਚੋਂ ਕੋਈ ਵੀ ਪਹਿਲੇ ਨੰਬਰ 'ਤੇ ਆ ਜਾਵੇ ਨੰਬਰ ਤਾਂ ਸਾਡੇ ਘਰ ਹੀ ਜਾਣੇ ਹਨ ਤਾਂ ਕਰ ਕੇ ਸਾਨੂੰ ਖੁਸੀ ਹੀ ਹੁੰਦੀ ਹੈ ਸਾਡੇ ਵਿਚੋਂ ਜੋ ਮਰਜ਼ੀ ਪਹਿਲੇ ਨੰਬਰ 'ਤੇ ਆ ਜਾਵੇ।
ਅੱਗੇ 2 ਹੋਰ ਗੁਰਸਿੱਖ ਬੱਚਿਆਂ ਹਰਜਾਪ ਤੇ ਗੁਰਜਾਪ ਨੇ ਸਪੋਕਸਮੈਨ ਨਾਲ ਗੱਲ ਕਰਦਿਆਂ ਕਿਹਾ ਕਿ ਉਹਨਾਂ ਵਿਚ ਸਕੂਲ ਦੇ ਅਧਿਆਪਕਾਂ ਨੂੰ ਜਰੂਰ ਥੋੜ੍ਹੀ ਪਛਾਣਨ ਵਿਚ ਦੁਚਿੱਤੀ ਹੋ ਜਾਂਦੀ ਹੈ ਪਰ ਮਾਤਾ-ਪਿਤਾ ਤੇ ਰਿਸ਼ਤੇਦਾਰ ਸਾਨੂੰ ਮਿੰਟ 'ਚ ਪਛਾਣ ਲੈਂਦੇ ਹਨ। ਉਹਨਾਂ ਕਿਹਾ ਕਿ ਸਾਡੇ ਦੋਹਾਂ ਦਾ ਗੱਲਬਾਤ ਕਰਨ ਦਾ ਤਰੀਕਾ ਵੀ ਇਕੋ ਜਿਹਾ ਹੈ ਤੇ ਸਾਡੇ ਦੋਸਤ ਵੀ ਸਾਰੇ ਇਕੋ ਹੀ ਹਨ। ਦੋਹਾਂ ਸਰਦਾਰਾਂ ਨੇ ਮਰਹੂਮ ਗਾਇਕ ਸਿੱਧੂ ਮੂਸੇਵਾਲਾ ਦਾ ਗੀਤ ਵੀ ਸੁਣਾਇਆ। ਇਸ ਦੇ ਨਾਲ ਹੀ ਜਦੋਂ ਸਕੂਲ ਦੇ ਅਧਿਆਪਕਾਂ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਹਨਾਂ ਨੇ ਕਿਹਾ ਕਿ ਉਹਨਾਂ ਨੂੰ ਥੋੜ੍ਹਾ ਸਮਾਂ ਪਹਿਲਾਂ ਹੀ ਇਸ ਬਾਰੇ ਪਤਾ ਲੱਗਾ ਹੈ ਕਿ ਉਹਨਾਂ ਦੇ ਸਕੂਲ ਵਿਚ 100 ਦੇ ਕਰੀਬ ਜੁੜਵਾਂ ਬੱਚੇ ਹਨ।
ਅਧਿਆਪਕਾਂ ਨੇ ਕਿਹਾ ਕਿ ਜਦੋਂ ਮਾਪੇ ਬੱਚਿਆਂ ਦਾ ਦਾਖਲਾ ਕਰਵਾਉਣ ਆਉਂਦੇ ਹਨ ਤਾਂ ਉਹ ਆ ਕੇ ਇਹ ਕਹਿੰਦੇ ਹਨ ਕਿ ਉਹਨਾਂ ਦੇ ਬੱਚਿਆਂ ਨੂੰ ਇਕੋ ਸੈਕਸ਼ਨ ਵਿਚ ਰੱਖਿਆ ਜਾਵੇ ਪਰ ਅਸੀਂ ਉਹਨਾਂ ਨੂੰ ਹਮੇਸ਼ਾ ਇਹ ਹੀ ਕਹਿੰਦੇ ਹਾਂ ਕਿ ਨਹੀਂ ਇਸ ਤਰ੍ਹਾਂ ਉਹ ਹਮੇਸ਼ਾ ਆਪਸ ਵਿਚ ਹੀ ਇਕੱਠੇ ਰਹਿਣਗੇ ਉਹਨਾਂ ਨੂੰ ਕੋਈ ਹੋਰ ਦੋਸਤ ਬਣਾਉਣਾ ਨਹੀਂ ਆਵੇਗਾ ਮਾਪਿਆਂ ਨੂੰ ਇਹ ਹੁੰਦਾ ਹੈ ਕਿ ਉਹਨਾਂ ਨੂੰ ਬੱਚਿਆਂ ਨੂੰ ਪੜ੍ਹਾਈ ਕਰਵਾਉਣੀ ਸੌਖੀ ਹੋ ਜਾਵੇਗੀ ਪਰ ਨਹੀਂ ਅਸੀਂ ਕਹਿੰਦੇ ਹਾਂ ਕਿ ਬੱਚੇ ਸਕੂਲ ਵਿਚ ਸਿਰਫ਼ ਪੜ੍ਹਨ ਹੀ ਨਹੀਂ ਆਉਂਦੇ ਹੋਰ ਵੀ ਕਈ ਸਮਾਜਿਕ ਕੰਮ ਕਰਨ ਤੇ ਰਹਿਣ ਸਹਿਣ ਸਿੱਖਣ ਆਉਂਦੇ ਹਨ।
ਉਹਨਾਂ ਕਿਹਾ ਕਿ ਕਈ ਬੱਚੇ ਤਾਂ ਅਜਿਹੇ ਹਨ ਜਿਨ੍ਹਾਂ ਦੀ ਸੋਚ ਬਿਲਕੁਲ ਹੀ ਸਮਾਨ ਹੈ ਜਿਵੇਂ ਪੱਤਰਕਾਰ ਨੇ ਜਦੋਂ ਦੋ ਵਿਦਿਆਰਥੀਆਂ ਨੂੰ 1 ਤੋਂ 10 ਤੱਕ ਕੁੱਝ ਲਿਖਣ ਲਈ ਕਿਹਾ ਤਾਂ ਉਹਨਾਂ ਦੋਹਾਂ ਵਿਦਿਆਰਥੀਆਂ ਨੇ 5 ਹੀ ਲਿਖਿਆ। ਇਸ ਦੇ ਨਾਲ ਹੀ ਹੋਰ ਅਧਿਆਪਕਾਂ ਨਾਲ ਜਦੋਂ ਗੱਲ ਕੀਤੀ ਗਈ ਤਾਂ ਉਹਨਾਂ ਨੇ ਕਿਹਾ ਕਿ ਦੋ ਹੋਰ ਵਿਦਿਆਰਥਣਾਂ ਹਨ ਜਿਨ੍ਹਾਂ ਦਾ ਲਿਖਣ ਅਤੇ ਬੋਲਚਾਲ ਦਾ ਤਰੀਕਾ ਇਕੋ ਜਿਹਾ ਹੀ ਹੈ। ਉਹਨਾਂ ਕਿਹਾ ਕਿ ਬੱਚੀਆਂ ਦੀ ਲਿਖਾਈ ਵੀ ਇਕੋ ਜਿਹੀ ਹੈ ਤੇ ਉਹ ਕਿਤਾਬਾਂ ਕਾਪੀਆਂ 'ਤੇ ਕਵਰ ਵੀ ਇਕੋ ਜਿਹਾ ਹੀ ਚੜਾਉਂਦੀਆਂ ਹਨ।
ਅਧਿਆਪਕਾਂ ਦਾ ਕਹਿਣਾ ਹੈ ਕਿ ਕਦੇ-ਕਦੇ ਤਾਂ ਇਕ ਬੱਚੇ ਦੀ ਗਲਤੀ ਦੀ ਸਜ਼ਾ ਦੂਜੇ ਬੱਚੇ ਨੂੰ ਮਿਲ ਜਾਂਦੀ ਹੈ ਪਰ ਜਦੋਂ ਇਸ ਤਰ੍ਹਾਂ ਦਾ ਕੁੱਝ ਹੁੰਦਾ ਹੈ ਤਾਂ ਸਾਨੂੰ ਵੀ ਬਹੁਤ ਅਚੰਬਾ ਹੁੰਦਾ ਹੈ ਤੇ ਇਹਨਾਂ ਨੂੰ ਪੜ੍ਹਾਉਣ ਵਿਚ ਵੀ ਬਹੁਤ ਮਜ਼ਾ ਆਉਂਦਾ ਹੈ। ਸਕੂਲ ਦੀ ਮੁੱਖ ਅਧਿਆਪਕਾ ਨੇ ਦੱਸਿਆ ਕਿ ਸਕੂਲ ਵਿਚ 5500 ਬੱਚੇ ਪੜ੍ਹਦੇ ਹਨ ਤੇ 20 ਤੋਂ 25 ਬੱਚੇ ਅਜਿਹੇ ਹਨ ਜੋ ਸਕੂਲ ਤੋਂ ਪੜ੍ਹਾਈ ਕਰ ਕੇ ਜਾ ਚੁੱਕੇ ਹਨ।