ਘਰ ਦੇ ਮਾਲਕ ਨੇ ਕਿਹਾ ਕਿ ਉਹ ਖੱਦਰ ਭੰਡਾਰ ਤੋਂ ਖ਼ਰੀਦਿਆਂ ਪੁਰਾਣਾ ਕੱਪੜਾ ਘਰ ਹੀ ਰੱਖਦੇ ਸਨ ਪਰ ਅੱਗ ਕਾਰਨ ਉਨ੍ਹਾਂ ਦਾ ਲੱਖਾਂ ਦਾ ਕੱਪੜਾ ਸੜ ਕੇ ਸੁਆਹ ਹੋ ਗਿਆ
ਜਗਰਾਓਂ: ਦੀਵਾਲੀ ਮੌਕੇ ਚਲਾਏ ਜਾ ਰਹੇ ਰਹੇ ਪਟਾਕਿਆਂ ਕਾਰਨ ਅਣਸੁਖਾਵੀਆਂ ਘਟਨਾ ਵਾਪਰ ਰਹੀਆਂ ਹਨ। ਜਗਰਾਓਂ ਦੇ ਈਸ਼ਰ ਚੌਂਕ ਨੇੜੇ ਮੁਹੱਲਾ ਇਦਲਪੂਰਾ 'ਚ ਇਕ ਬੰਦ ਪਏ ਘਰ ਨੂੰ ਅੱਗ ਲੱਗ ਜਾਣ ਦੀ ਖ਼ਬਰ ਸਾਹਮਣੇ ਆਈ ਹੈ।
ਜਾਣਕਾਰੀ ਮੁਤਾਬਕ ਘਰ 'ਚ ਲੱਗੀ ਅੱਗ ਹੌਲੀ-ਹੌਲੀ ਵੱਧਦੀ ਗਈ ਘਰ 'ਚ ਲੱਖਾਂ ਰੁਪਏ ਦਾ ਸਮਾਨ ਤੇ ਪੁਰਾਣੇ ਕੱਪੜੇ ਪਏ ਹੋਏ ਸਨ। ਇਨ੍ਹਾਂ ਕੱਪੜਿਆਂ ਕਾਰਨ ਅੱਗ ਨੇ ਜ਼ਿਆਦਾ ਜ਼ੋਰ ਫੜ੍ਹ ਲਿਆ ਪਰ ਮੁਹੱਲੇ ਦੇ ਲੋਕਾਂ ਅਤੇ ਫਾਇਰ ਬ੍ਰਿਗੇਡ ਦੇ ਸਹਿਯੋਗ ਨਾਲ ਅੱਗ 'ਤੇ ਕਾਬੂ ਪਾ ਲਿਆ ਗਿਆ ਅਤੇ ਵੱਡਾ ਹਾਦਸਾ ਹੋਣ ਤੋਂ ਬਚਾਅ ਹੋ ਗਿਆ।
ਅੱਗ ਇੰਨੀ ਭਿਆਨਕ ਸੀ ਕਿ ਇਸ ਦਾ ਧੂੰਆ ਦੂਰ-ਦੂਰ ਤੱਕ ਨਜ਼ਰ ਆ ਰਿਹਾ ਸੀ। ਦੱਸ ਦੇਈਏ ਕਿ ਘਰ ਦੇ ਮਾਲਕ ਖੱਦਰ ਭੰਡਾਰ ਦਾ ਕੰਮ ਕਰਦੇ ਹਨ ਤੇ ਲੋਕ ਉਨ੍ਹਾਂ ਕੋਲੋਂ ਨਵੇਂ ਕੱਪੜੇ ਖ਼ਰੀਦ ਕੇ ਪੁਰਾਣੇ ਕੱਪੜੇ ਦੇ ਜਾਂਦਾ ਹਨ। ਇਸੇ ਕਾਰਨ ਉਨ੍ਹਾਂ ਦੇ ਘਰ ਪੁਰਾਣੇ ਕੱਪੜੇ ਦਾ ਵੱਡਾ ਸਟਾਕ ਪਿਆ ਹੋਇਆ ਸੀ। ਪਰ ਤੜਕੇ ਲੱਗੀ ਇਸ ਭਿਆਨਕ ਅੱਗ ਨਾਲ ਸਾਰੇ ਕੱਪੜੇ ਸੜ ਕੇ ਸੁਆਹ ਹੋ ਗਏ ਅਤੇ ਅੱਗ ਫੈਲਣ ਤੋਂ ਪਹਿਲਾਂ ਹੀ ਮੁਹੱਲਾ ਵਾਸੀਆਂ ਨੇ ਫਾਇਰ ਬ੍ਰਿਗੇਡ ਨੂੰ ਜਾਣਕਾਰੀ ਦੇ ਕੇ ਇਸ ਅੱਗ ਨੂੰ ਫੈਲਣ ਤੋਂ ਬਚਾ ਲਿਆ। ਇਸ ਬਾਰੇ ਗੱਲ ਕਰਦਿਆਂ ਘਰ ਦੇ ਮਾਲਕ ਨੇ ਕਿਹਾ ਕਿ ਉਹ ਖੱਦਰ ਭੰਡਾਰ ਤੋਂ ਖ਼ਰੀਦਿਆਂ ਪੁਰਾਣਾ ਕੱਪੜਾ ਜ਼ਿਆਦਾਤਰ ਘਰ ਹੀ ਰੱਖਦੇ ਸਨ ਪਰ ਇਸ ਅੱਗ ਕਾਰਨ ਉਨ੍ਹਾਂ ਦਾ ਲੱਖਾਂ ਦਾ ਕੱਪੜਾ ਸੜ ਕੇ ਸੁਆਹ ਹੋ ਗਿਆ ਹੈ।
