ਪੰਜਾਬ ਸਰਕਾਰ ਦੀ ਸਿਫ਼ਾਰਸ਼ 'ਤੇ ਕੇਂਦਰ ਸਰਕਾਰ ਨੇ ਪੰਜਾਬ ਦੇ ਅੱਗ ਬੁਝਾਊ ਮਹਿਕਮੇ ਵਿਚੋਂ 13 ਵਿਅਕਤੀਆਂ ਦੇ ਪ੍ਰਵਾਰਾਂ ਨੂੰ 'ਬਹਾਦਰੀ ਐਵਾਰਡ' ਪ੍ਰਦਾਨ ਕਰਨ ਲਈ ਚੁਣਿਆ....
ਚੰਡੀਗੜ੍ਹ : ਪੰਜਾਬ ਸਰਕਾਰ ਦੀ ਸਿਫ਼ਾਰਸ਼ 'ਤੇ ਕੇਂਦਰ ਸਰਕਾਰ ਨੇ ਪੰਜਾਬ ਦੇ ਅੱਗ ਬੁਝਾਊ ਮਹਿਕਮੇ ਵਿਚੋਂ 13 ਵਿਅਕਤੀਆਂ ਦੇ ਪ੍ਰਵਾਰਾਂ ਨੂੰ 'ਬਹਾਦਰੀ ਐਵਾਰਡ' ਪ੍ਰਦਾਨ ਕਰਨ ਲਈ ਚੁਣਿਆ ਹੈ। ਲੁਧਿਆਣੇ ਦੀ ਫ਼ੈਕਟਰੀਆਂ ਵਿਚ 20 ਨਵੰਬਰ 2017 ਅਤੇ 11 ਮਈ 2017 ਨੂੰ ਲੱਗੀ ਅੱਗ ਦੌਰਾਨ ਇਨ੍ਹਾਂ 13 ਕਰਮਚਾਰੀਆਂ ਨੇ ਬਿਨਾਂ ਕਿਸੇ ਯੰਤਰਾਂ ਤੇ ਸੁਰੱਖਿਆ ਵਰਦੀਆਂ ਤੋਂ ਅਪਣੀ ਜਾਨ ਜ਼ੋਖ਼ਮ ਵਿਚ ਪਾ ਕੇ ਅੱਗ 'ਤੇ ਕਾਬੂ ਪਾ ਕੇ ਜਾਨ ਤੇ ਮਾਲ ਦੀ ਰਾਖੀ ਕੀਤੀ ਤੇ ਅੱਗੇ ਹੋਰ ਨੁਕਸਾਨ ਹੋਣੋ ਬਚਾਅ ਕੀਤਾ। ਇਨ੍ਹਾ 13 ਵਿਅਕਤੀਆਂ ਨੂੰ ਰਾਸ਼ਟਰਪਤੀ ਬਹਾਦਰੀ ਐਵਾਰਡ, ਕੇਂਦਰੀ ਗ੍ਰਹਿ ਮੰਤਰੀ ਰਾਜਨਾਥ ਸਿੰਘ ਪ੍ਰਦਾਨ ਕਰਨਗੇ।
ਅੱਜ ਪੰਜਾਬ ਭਵਨ 'ਚ ਪੰਜਾਬ ਸਰਕਾਰ ਵਲੋਂ ਇਨ੍ਹਾਂ ਨੂੰ ਸਨਮਾਨਤ ਕਰਦੇ ਹੋਏ ਸਥਾਨਕ ਸਰਕਾਰਾਂ ਦੇ ਮੰਤਰੀ ਨਵਜੋਤ ਸਿੰਘ ਸਿੱਧੂ ਨੇ ਕਿਹਾ ਕਿ ਪੰਜਾਬ ਦੇ ਪਿਛਲੇ 70 ਸਾਲਾਂ ਦੇ ਇਤਿਹਾਸ 'ਚ ਇਹ ਪਹਿਲੀ ਵਾਰ ਹੈ ਕਿ 13 ਵਿਅਕਤੀਆਂ ਦੀ ਬਹਾਦਰੀ ਬਦਲੇ ਉਨ੍ਹਾਂ ਨੂੰ 'ਰਾਸ਼ਟਰਪਤੀ ਐਵਾਰਡ' ਨਾਲ ਸਨਮਾਨਤ ਕੀਤਾ ਜਾਵੇਗਾ। ਇਨ੍ਹਾਂ ਵਿਚੋਂ 9 ਕਰਮਚਾਰੀ ਇਲਾਜ ਦੌਰਾਨ ਅਕਾਲ ਚਲਾਣਾ ਕਰ ਗਏ ਸਨ। ਇਨ੍ਹਾਂ ਦੇ ਪ੍ਰਵਾਰਾਂ ਵਿਚੋਂ ਪਿਤਾ, ਪਤਨੀ, ਲੜਕੀ, ਲੜਕੇ ਨੂੰ ਅੱਜ ਮੰਤਰੀ ਨੇ ਸ਼ਾਲ ਦੇ ਕੇ ਸਨਮਾਨਿਆ।
