ਯੂਐਨ ਸੁਰੱਖਿਆ ਕੌਂਸਲ ਦੀ ਮੀਟਿੰਗ, ਰੂਸ ਵਿਰੁਧ ਮਤਾ ਪਾਸ, ਭਾਰਤ ਨੇ ਨਹੀਂ ਦਿਤੀ ਵੋਟ

ਰੂਸ ਦੀ ਵੀਟੋ ਪਾਵਰ ਨੇ ਰੋਕੀ ਰਾਹ

ਨਵੀਂ ਦਿੱਲੀ, 26 ਫ਼ਰਵਰੀ : ਰੂਸ ਅਤੇ ਯੂਕਰੇਨ ਵਿਚਾਲੇ ਚਲ ਰਹੀ ਜੰਗ ਦੇ ਮੱਦੇਨਜ਼ਰ ਯੂਐਨ ਸਕਿਉਰਿਟੀ ਕਾਉਂਸਲ ਵਲੋਂ ਇਕ ਮੀਟਿੰਗ ਕੀਤੀ ਗਈ ਜਿਸ ਵਿਚ ਰੂਸ ਵਿਰੁਧ ਮਤਾ ਪਾਸ ਕੀਤਾ ਗਿਆ ਹੈ | ਇਸ ਦੌਰਾਨ ਰੂਸ ਨੇ ਪ੍ਰਸਤਾਵ 'ਤੇ ਵੀਟੋ ਕੀਤਾ | ਸੁਰੱਖਿਆ ਪ੍ਰੀਸ਼ਦ ਦੇ ਪੰਜ ਸਥਾਈ ਮੈਂਬਰਾਂ 'ਚ ਰੂਸ ਵੀ ਸ਼ਾਮਲ ਹੈ | ਇਸ ਮੀਟਿੰਗ ਵਿਚ 11 ਦੇਸ਼ਾਂ ਨੇ ਰੂਸ ਦੀ ਨਿੰਦਾ ਕਰਦੇ ਹੋਏ ਸੰਯੁਕਤ ਰਾਸ਼ਟਰ ਦੇ ਪ੍ਰਸਤਾਵ ਦੇ ਪੱਖ 'ਚ ਵੋਟਾਂ ਪਾਈਆਂ ਅਤੇ ਯੂਕਰੇਨ ਤੋਂ ਰੂਸੀ ਫੌਜੀਆਂ ਦੀ ਵਾਪਸੀ ਦੀ ਮੰਗ ਕੀਤੀ | ਹਾਲਾਂਕਿ ਭਾਰਤ ਨੇ ਇਸ ਵੋਟਿੰਗ ਤੋਂ ਦੂਰੀ ਬਣਾ ਕੇ ਰੱਖੀ ਅਤੇ ਇਸ ਵਿਚ ਚੀਨ ਤੇ ਸੰਯੁਕਤ ਅਰਬ ਅਮੀਰਾਤ ਵੀ ਸ਼ਾਮਲ ਹਨ | ਇਹ ਵੀ ਦੱਸਣਯੋਗ ਹੈ ਕਿ ਰੂਸ ਦੀ ਇਸ ਕਾਰਵਾਈ ਕਾਰਨ ਯੂਰਪ ਵਿਚ ਵੱਡੇ ਪੱਧਰ 'ਤੇ ਜੰਗ ਛਿੜਨ ਦਾ ਖ਼ਦਸ਼ਾ ਪੈਦਾ ਹੋ ਗਿਆ ਹੈ | ਨਾਲ ਹੀ ਜੰਗ ਨੂੰ  ਰੋਕਣ ਲਈ ਸਮੁੱਚੀ ਦੁਨੀਆਂ ਵਿਚ ਯਤਨ ਵੀ ਸ਼ੁਰੂ ਹੋ ਗਏ ਹਨ |  
  ਹਮਲੇ ਵਿਰੁਧ ਸੰਯੁਕਤ ਰਾਸ਼ਟਰ ਸੁਰੱਖਿਆ ਪ੍ਰੀਸ਼ਦ 'ਚ ਪੇਸ਼ ਕੀਤੇ ਗਏ ਪ੍ਰਸਤਾਵ ਦੇ ਪੱਖ 'ਚ 15 'ਚੋਂ 11 ਮੈਂਬਰ ਦੇਸ਼ਾਂ ਨੇ ਵੋਟ ਦਿਤੀ | ਇਸ ਦੇ ਨਾਲ ਹੀ ਰੂਸ ਨੇ ਇਸ ਪ੍ਰਸਤਾਵ ਵਿਰੁਧ ਵੀਟੋ ਦੀ ਵਰਤੋਂ ਕੀਤੀ | ਸੁਰੱਖਿਆ ਪ੍ਰੀਸ਼ਦ 'ਚ ਭਾਰਤ ਦੇ ਪ੍ਰਤੀਨਿਧ ਟੀ. ਐਸ. ਤਿਰੂਮੂਰਤੀ ਨੇ ਕਿਹਾ,''ਯੂਕਰੇਨ 'ਚ ਹਾਲ ਹੀ 'ਚ ਹੋਏ ਘਟਨਾਕ੍ਰਮ ਤੋਂ ਭਾਰਤ ਬਹੁਤ ਪ੍ਰੇਸ਼ਾਨ ਹੈ | ਅਸੀਂ ਅਪੀਲ ਕਰਦੇ ਹਾਂ ਕਿ ਹਿੰਸਾ ਅਤੇ ਦੁਸ਼ਮਣੀ ਨੂੰ  ਤੁਰਤ ਖ਼ਤਮ ਕਰਨ ਲਈ ਸਾਰੇ ਯਤਨ ਕੀਤੇ ਜਾਣ | ਨਾਗਰਿਕਾਂ ਦੀ ਜਾਨ-ਮਾਲ ਦੀ ਸੁਰੱਖਿਆ ਲਈ ਅਜੇ ਤਕ ਕੋਈ ਹਲ ਨਹੀਂ ਲਭਿਆ ਗਿਆ | ਅਸੀਂ ਭਾਰਤੀ ਭਾਈਚਾਰੇ ਦੀ ਭਲਾਈ ਅਤੇ ਸੁਰੱਖਿਆ ਬਾਰੇ ਚਿੰਤਤ ਹਾਂ, ਜਿਸ 'ਚ ਯੂਕਰੇਨ 'ਚ ਵੱਡੀ ਗਿਣਤੀ 'ਚ ਭਾਰਤੀ ਵਿਦਿਆਰਥੀ ਸ਼ਾਮਲ ਹਨ | ਅਫ਼ਸੋਸ ਦੀ ਗਲ ਹੈ ਕਿ ਕੂਟਨੀਤੀ ਦਾ ਰਾਹ ਛੱਡ ਦਿਤਾ ਗਿਆ ਹੈ | ਸਾਨੂੰ ਉਸ ਵਲ ਵਾਪਸ ਜਾਣਾ ਪਵੇਗਾ | ਇਨ੍ਹਾਂ ਸਾਰੇ ਕਾਰਨਾਂ ਕਰ ਕੇ ਭਾਰਤ ਨੇ ਇਸ ਪ੍ਰਸਤਾਵ ਤੋਂ ਗੁਰੇਜ਼ ਕਰਨ ਦਾ ਬਦਲ ਚੁਣਿਆ ਹੈ | ਸੰਯੁਕਤ ਰਾਸ਼ਟਰ 'ਚ ਅਮਰੀਕੀ ਰਾਜਦੂਤ ਲਿੰਡਾ ਥਾਮਸ ਗ੍ਰੀਨਫ਼ੀਲਡ ਨੇ ਕਿਹਾ,''ਸਾਡੇ ਬੁਨਿਆਦੀ ਸਿਧਾਂਤਾਂ 'ਤੇ ਰੂਸੀ ਹਮਲਾ ਢੀਠਪੁਣੇ ਅਤੇ ਬੇਸ਼ਰਮੀ ਵਾਲਾ ਹੈ | ਇਹ ਸਾਡੀ ਅੰਤਰਰਾਸ਼ਟਰੀ ਪ੍ਰਣਾਲੀ ਨੂੰ  ਲਈ ਖ਼ਤਰਾ ਹੈ | ਜਿਨ੍ਹਾਂ ਦੇਸ਼ਾਂ ਨੇ ਰੂਸ ਵਿਰੁਧ ਮਤੇ ਦੇ ਸਮਰਥਨ 'ਚ ਵੋਟਿੰਗ ਕੀਤੀ, ਉਨ੍ਹਾਂ 'ਚ ਅਮਰੀਕਾ, ਬਿ੍ਟੇਨ, ਫ਼ਰਾਂਸ, ਅਲਬਾਨੀਆ, ਬ੍ਰਾਜ਼ੀਲ, ਗੈਬਨ, ਘਾਨਾ, ਆਇਰਲੈਂਡ, ਕੀਨੀਆ, ਮੈਕਸੀਕੋ ਅਤੇ ਨਾਰਵੇ ਸ਼ਾਮਲ ਹਨ | (ਪੀਟੀਆਈ)