ਆਖ਼ਰ ਬਲਬੀਰ ਸਿੱਧੂ ਤੇ ਗੁਰਪ੍ਰੀਤ ਕਾਂਗੜ ਦਾ ਦਰਦ ਛਲਕ ਹੀ ਪਿਆ

ਸਿੱਧੂ ਨੇ ਹਾਈਕਮਾਨ ਨੂੰ  ਕਿਹਾ, ਮੇਰਾ ਕਸੂਰ ਤਾਂ ਦੱਸ ਦਿੰਦੇ

ਚੰਡੀਗੜ੍ਹ, 26 ਸਤੰਬਰ (ਗੁਰਉਪਦੇਸ਼ ਭੁੱਲਰ): ਕੈਪਟਨ ਨਾਲ ਮੰਤਰੀ ਰਹੇ ਬਲਬੀਰ ਸਿੰਘ ਸਿੱਧੂ ਅਤੇ ਗੁਰਪ੍ਰੀਤ ਸਿੰਘ ਕਾਂਗੜ ਨੂੰ  ਚੰਨੀ ਮੰਤਰੀ ਮੰਡਲ ਵਿਚ ਸ਼ਾਮਲ ਨਾ ਕੀਤੇ ਜਾਣ ਬਾਅਦ ਅੱਜ ਉਨ੍ਹਾਂ ਦਾ ਦਰਦ ਵੀ ਆਖ਼ਰ ਛਲਕ ਹੀ ਪਿਆ | ਭਾਵੇਂ ਦੋਹਾਂ ਹੀ ਮੰਤਰੀਆਂ ਨੇ ਪਾਰਟੀ ਹਾਈਕਮਾਨ ਦੇ ਫ਼ੈਸਲੇ ਪ੍ਰਵਾਨ ਕਰਨ ਅਤੇ ਚੰਨੀ ਸਰਕਾਰ ਨੂੰ  ਪੂਰਾ ਸਹਿਯੋਗ ਦੇਣ ਦੀ ਗੱਲ ਆਖੀ ਹੈ ਪਰ ਨਾਲ ਹੀ ਅਪਣਾ ਰੋਸ ਵੀ ਪ੍ਰੈਸ ਕਾਨਫ਼ਰੰਸ ਕਰ ਕੇ ਜ਼ਾਹਰ ਕਰ ਦਿਤਾ ਹੈ | ਬਲਬੀਰ ਸਿੱਧੂ ਨੇ ਤਾਂ ਪਾਰਟੀ ਹਾਈਕਮਾਨ ਨੂੰ  ਪੱਤਰ ਲਿਖ ਕੇ ਵੀ ਅਪਣੇ ਵਿਚਾਰ ਪ੍ਰਗਟ ਕੀਤੇ ਹਨ | ਦੋਵੇਂ ਹੀ ਮੰਤਰੀਆ ਨੇ ਜਿਥੇ ਅਪਣੇ ਮੰਤਰੀ ਹੁੰਦੇ ਸਮੇਂ ਕੀਤੇ ਢੇਰ ਕੰਮ ਗਿਣਾਏ ਉਥੇ ਨਾਲ ਹੀ ਮਨ ਅੰਦਰ ਪੈਦਾ ਨਿਰਾਸ਼ਤਾ ਤੇ ਰੋਸ ਦਾ ਵੀ ਪ੍ਰਗਟਾਵਾ ਕਰ ਦਿਤਾ | 
ਬਲਬੀਰ ਸਿੱਧੂ ਤਾਂ ਮੀਡੀਆ ਨਾਲ ਗੱਲਬਾਤ ਸਮੇਂ ਭਾਵੁਕ ਹੋ ਗਏ ਤੇ ਹਾਈਕਮਾਨ ਨੂੰ  ਸਵਾਲ ਕੀਤਾ ਕਿ ਉਸ ਨੂੰ  ਇਹ ਤਾਂ ਦਸਿਆ ਜਾਂਦਾ ਕਿ ਮੇਰਾ ਕੀ ਕਸੂਰ ਹੈ? ਜੇਕਰ ਕੋਈ ਕਸੂਰ ਸੀ ਤਾਂ ਬੁਲਾ ਕੇ ਦਸਿਆ ਜਾਂਦਾ ਤੇ ਅਸਤੀਫ਼ਾ ਮੰਗ ਲੈਂਦੇ ਪਰ ਜਿਸ ਤਰੀਕੇ ਨਾਲ ਉਨ੍ਹਾਂ ਨੂੰ  ਮੰਤਰੀ ਮੰਡਲ ਵਿਚੋਂ ਬਾਹਰ ਕੀਤਾ ਗਿਆ ਹੈ, ਉਸ ਨਾਲ ਉਹ ਜ਼ਲੀਲ ਹੋਏ ਹਨ | ਉਨ੍ਹਾਂ ਅੱਖਾਂ ਵਿਚ ਹੰਝੂ ਭਰਦਿਆਂ ਕਿਹਾ ਕਿ ਕਿਸੇ ਵਿਅਕਤੀ ਨੂੰ  ਫਾਂਸੀ ਦੀ ਸਜ਼ਾ ਦੇਣ ਤੋਂ ਪਹਿਲਾਂ ਵੀ ਉਸ ਦੀ ਆਖ਼ਰੀ ਇੱਛਾ ਪੁਛੀ ਜਾਂਦੀ ਹੈ | ਸਿੱਧੂ ਨੇ ਕਿਹਾ ਕਿ ਹਾਈਕਮਾਨ ਦੀ ਕਾਰਵਾਈ ਕਾਰਨ ਮੇਰੇ 
ਇਲਾਕੇ ਦੇ ਲੋਕਾਂ ਵਿਚ ਰੋਸ ਹੈ ਪਰ ਮੈਂ ਪਾਰਟੀ ਲਈ ਹੋਰ ਵੀ ਤਕੜਾ ਹੋ ਕੇ ਕੰਮ ਕਰਦਾ ਰਹਾਂਗਾ | ਗੁਰਪ੍ਰੀਤ ਕਾਂਗੜ ਨੇ ਵੀ ਕਿਹਾ ਕਿ ਮੰਤਰੀ ਹੁੰਦਿਆਂ ਇੰਨੇ ਕੰਮ ਕੀਤੇ ਪਰ ਪਤਾ ਨਹੀਂ ਕਿਸ ਗੱਲ ਦੀ ਸਜ਼ਾ ਦਿਤੀ ਗਈ ਹੈ? ਉਨ੍ਹਾਂ ਮੰਤਰੀ ਮੰਡਲ ਦੇ ਕੁੱਝ ਨਵੇਂ ਮੈਂਬਰਾਂ ਦੀ ਚੋਣ 'ਤੇ ਵੀ ਸਵਾਲ ਚੁਕਦਿਆਂ ਕਿਹਾ ਕਿ ਕਈ ਅਕਾਲੀਆਂ ਨੂੰ  ਤਕੜੀ ਟੱਕਰ ਦੇਣ ਵਾਲੇ ਵਿਧਾਇਕ ਵੀ ਸਨ, ਜਿਨ੍ਹਾਂ ਨੂੰ  ਤਾਕਤ ਦੇਣੀ ਚਾਹੀਦੀ ਸੀ |