ਅਗੱਸਤ 'ਚ 25 ਫ਼ੀ ਸਦੀ ਮੀਂਹ ਵੱਧ ਪਿਆ, ਪਿਛਲੇ 44 ਸਾਲਾਂ ਦਾ ਤੋੜਿਆ ਰੀਕਾਰਡ

ਕਈ ਸੂਬਿਆਂ 'ਚ ਨਦੀਆਂ ਦੇ ਪਾਣੀ ਦਾ ਪੱਧਰ ਵਧਣ ਕਾਰਨ ਹੜ੍ਹ ਦੇ ਹਾਲਾਤ ਬਣੇ

ਨਵੀਂ ਦਿੱਲੀ, 29 ਅਗੱਸਤ : ਭਾਰਤੀ ਮੌਸਮ ਵਿਗਿਆਨ ਵਿਭਾਗ (ਆਈ.ਐੱਮ.ਡੀ.) ਦੇ ਅੰਕੜਿਆਂ ਮੁਤਾਬਕ ਭਾਰਤ 'ਚ ਅਗੱਸਤ ਮਹੀਨੇ 'ਚ ਪਿਛਲੇ 44 ਸਾਲਾਂ 'ਚ ਸਭ ਤੋਂ ਵਧ ਮੀਂਹ ਪਿਆ ਹੈ, ਜਿਥੇ ਦੇਸ਼ ਦੇ ਕਈ ਹਿੱਸਿਆਂ 'ਚ ਹੜ੍ਹ ਦੀ ਸਥਿਤੀ ਹੈ। ਆਈ.ਐਮ.ਡੀ. ਮੁਤਾਬਕ ਅਗੱਸਤ 'ਚ 28 ਤਰੀਕ ਤਕ 25 ਫ਼ੀ ਸਦੀ ਵਧ ਮੀਂਹ ਦਰਜ ਕੀਤਾ ਗਿਆ ਹੈ। ਇਸ ਤੋਂ ਪਹਿਲਾਂ 1983 ਵਿਚ ਅਗੱਸਤ 'ਚ ਆਮ ਤੋਂ 23.8 ਫ਼ੀ ਸਦੀ ਵਧ ਮੀਂਹ ਪਿਆ ਸੀ।
ਦੇਸ਼ 'ਚ ਹੁਣ ਤਕ ਕੁਲ ਮਿਲਾ ਕੇ ਆਮ ਤੋਂ 9 ਫ਼ੀ ਸਦੀ ਵਧ ਮੀਂਹ ਪਿਆ ਹੈ। ਬਿਹਾਰ, ਆਂਧਰਾ ਪ੍ਰਦੇਸ਼, ਤੇਲੰਗਾਨਾ, ਤਾਮਿਲਨਾਡੂ, ਗੁਜਰਾਤ ਅਤੇ ਗੋਆ 'ਚ ਵਧ ਮੀਂਹ ਦਰਜ ਕੀਤਾ ਗਿਆ ਹੈ, ਉਥੇ ਹੀ ਸਿੱਕਮ 'ਚ ਸਭ ਤੋਂ ਵਧ ਮੀਂਹ ਪਿਆ। ਕਈ ਸੂਬਿਆਂ 'ਚ ਨਦੀਆਂ 'ਚ ਪਾਣੀ ਦਾ ਪੱਧਰ ਵਧਣ ਨਾਲ ਹੜ੍ਹ ਦੇ ਹਾਲਾਤ ਹਨ। ਕੇਂਦਰੀ ਜਲ ਕਮਿਸ਼ਨ (ਸੀ.ਡਬਲਿਊ.ਸੀ.) ਮੁਤਾਬਕ ਦੇਸ਼ 'ਚ 27 ਅਗੱਸਤ ਤਕ ਤਾਲਾਬਾਂ ਦੀ ਕੁਲ ਸਮਰੱਥਾ ਪਿਛਲੇ ਸਾਲ ਇਸ ਮਿਆਦ ਤੋਂ ਬਿਹਤਰ ਹੈ। ਇਹ ਪਿਛਲੇ 10 ਸਾਲਾਂ 'ਚ ਇਸ ਮਿਆਦ 'ਚ ਔਸਤ ਭੰਡਾਰਨ ਸਮਰੱਥਾ ਤੋਂ ਵੀ ਬਿਹਤਰ ਹੈ। ਸੀ.ਡਬਲਿਊ.ਸੀ. ਨੇ ਕਿਹਾ ਕਿ ਗੰਗਾ, ਨਰਮਦਾ, ਤਾਪੀ, ਮਾਹੀ, ਸਾਬਰਮਤੀ ਦੀ ਨਦੀ ਘਾਟੀਆਂ 'ਚ, ਕੱਛ, ਗੋਦਾਵਰੀ, ਕ੍ਰਿਸ਼ਨਾ, ਮਹਾਨਦੀ ਅਤੇ ਕਾਵੇਰੀ ਅਤੇ ਦਖਣੀ ਭਾਰਤ 'ਚ ਪੱਛਮ ਵਲ ਵਗਦੀਆਂ ਨਦੀਆਂ 'ਚ ਪਾਣੀ ਦਾ ਪੱਧਰ ਆਮ ਨਾਲੋਂ ਵਧ ਹੈ।           (ਪੀਟੀਆਈ)image