ਏਸ਼ੀਆ ਕੱਪ : ਭਾਰਤ ਨੇ ਪਾਕਿਸਤਾਨ ਨੂੰ ਪੰਜ ਵਿਕਟਾਂ ਨਾਲ ਹਰਾਇਆ

ਰਵਿੰਦਰ ਜਡੇਜਾ ਤੇ ਹਾਰਦਿਕ ਪਾਂਡਿਆ ਦੀ ਸ਼ਾਨਦਾਰ ਬੱਲੇਬਾਜ਼ੀ ਨੇ ਪਲਟਿਆ ਮੈਚ

ਦੁਬਈ, 28 ਅਗੱਸਤ : ਏਸ਼ੀਆ ਕੱਪ ਦੇ ਦੂਜੇ ਮੈਚ ਵਿਚ ਭਾਰਤ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫ਼ੈਸਲਾ ਕੀਤਾ | ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਪਾਕਿਸਤਾਨ ਦੀ ਟੀਮ ਨੇ ਭਾਰਤ ਨੂੰ  ਜਿੱਤ ਲਈ 148 ਦੌੜਾਂ ਦਾ ਟੀਚਾ ਦਿਤਾ ਸੀ | ਜਿਸ ਦਾ ਪਿੱਛਾ ਕਰਦੇ ਹੋਏ ਭਾਰਤੀ ਟੀਮ ਨੇ 5 ਵਿਕਟਾਂ ਰਹਿੰਦੇ ਹੋਏ 148 ਦੌੜਾਂ ਦੇ ਟੀਚੇ ਨੂੰ  ਹਾਸਲ ਕਰ ਲਿਆ |
ਭਾਰਤ ਵਲੋਂ ਗੇਂਦਬਾਜ਼ੀ ਕਰਦੇ ਹੋਏ ਸੱਭ ਤੋਂ ਵਧ 4 ਵਿਕਟਾਂ ਭੁਵਨੇਸ਼ਵਰ ਕੁਮਾਰ ਨੇ ਲਈਆਂ | ਇਸ ਤੋਂ ਬਾਅਦ ਹਾਰਦਿਕ ਪਾਂਡਿਆ ਨੇ ਤਿੰਨ ਵਿਕਟਾਂ ਅਪਣੇ ਨਾਂ ਕੀਤੀਆਂ | ਪਹਿਲੀ ਵਾਰ ਏਸ਼ੀਆ ਕੱਪ ਖੇਡ ਰਹੇ ਰਹੇ ਅਰਸ਼ਦੀਪ ਸਿੰਘ ਨੇ 2 ਵਿਕਟਾਂ ਲਈਆਂ ਅਤੇ ਆਵੇਸ਼ ਖ਼ਾਨ ਨੂੰ  ਸਿਰਫ਼ ਇਕ ਵਿਕਟ ਮਿਲੀ |
ਟੀਚੇ ਦਾ ਪਿਛਾ ਕਰਨ ਉਤਰੀ ਭਾਰਤੀ ਟੀਮ ਨੂੰ  ਪਹਿਲਾ ਝਟਕਾ ਕੇ.ਐਲ ਰਾਹੁਲ ਦੇ ਰੂਪ 'ਚ ਲੱਗਾ | ਰਾਹੁਲ ਬਿਨਾਂ ਕੋਈ ਦੌੜ ਬਣਾਏ ਨਸੀਮ ਸ਼ਾਹ ਦੇ ਸ਼ਿਕਾਰ ਬਣੇ | ਭਾਰਤ ਦੀ ਦੂਜੀ ਵਿਕਟ ਰੋਹਿਤ ਸ਼ਰਮਾ ਦੇ ਰੂਪ 'ਚ ਡਿੱਗੀ ਤੇ ਉਹ 12 ਦੌੜਾਂ ਬਣਾ ਕੇ ਇਫ਼ਤਿਖ਼ਾਰ ਦਾ ਸ਼ਿਕਾਰ ਬਣਿਆ | ਇਸੇ ਦੌਰਾਨ ਵਿਰਾਟ ਕੋਹਲੀ ਨੇ ਪਾਰੀ ਨੂੰ  ਸੰਭਾਲਣ ਦੀ ਕੋਸ਼ਿਸ਼ ਕੀਤੀ ਪਰ 35 ਦੌੜਾਂ ਬਣਾ ਕੇ ਇਫ਼ਤਿਖ਼ਾਰ ਦਾ ਸ਼ਿਕਾਰ ਬਣ ਗਿਆ | ਇਸ ਤੋਂ ਬਾਅਦ ਸੂਰਯ ਕੁਮਾਰ ਯਾਦਵ 18 ਦੌੜਾਂ ਬਣਾ ਕੇ ਆਊਟ ਹੋ ਗਏ |
ਭਾਰਤੀ ਟੀਮ ਦੀ ਪਾਰੀ ਸੰਭਾਲਣ ਉਤਰੇ ਰਵਿੰਦਰ ਜਡੇਜਾ 35 ਦੌੜਾਂ ਹੀ ਬਣਾ ਸਕੇ ਅਤੇ ਹਾਰਦਿਕ ਪਾਂਡਿਆ ਨੇ 33 ਦੌੜਾਂ ਬਣਾ ਕੇ ਭਾਰਤ ਨੂੰ  ਮੈਚ ਜਿਤਾ ਦਿਤਾ | ਇਸ ਤੋਂ ਪਹਿਲਾਂ ਬੱਲੇਬਾਜ਼ੀ ਕਰਨ ਉਤਰੀ ਪਾਕਿਸਤਾਨੀ ਟੀਮ ਨੂੰ  ਪਹਿਲਾ ਝਟਕਾ ਉਦੋਂ ਲੱਗਾ ਜਦੋਂ ਉਸ ਦਾ ਕਪਤਾਨ ਤੇ ਸਲਾਮੀ ਬੱਲੇਬਾਜ਼ ਬਾਬਰ ਆਜ਼ਮ 10 ਦੌੜਾਂ ਦੇ ਨਿਜੀ ਸਕੋਰ 'ਤੇ ਆਊਟ ਹੋ ਗਿਆ | ਪਾਕਿਸਤਾਨ ਦੀ ਦੂਜੀ ਵਿਕਟ ਫ਼ਖ਼ਰ ਜ਼ਮਾਨ ਦੇ ਤੌਰ 'ਤੇ ਡਿੱਗੀ | ਪਾਕਿ ਨੂੰ  ਤੀਜਾ ਝਟਕਾ ਉਦੋਂ ਲੱਗਾ ਜਦੋਂ ਇਫ਼ਤਿਖ਼ਾਰ ਅਹਿਮਦ 28 ਦੌੜਾਂ ਦੇ ਨਿਜੀ ਸਕੋਰ 'ਤੇ ਹਾਰਦਿਕ ਪੰਡਯਾ ਵਲੋਂ ਆਊਟ ਹੋ ਕੇ ਪਵੇਲੀਅਨ ਪਰਤ ਗਿਆ | ਪਾਕਿ ਦੀ ਚੌਥੀ ਵਿਕਟ ਮੁਹੰਮਦ ਰਿਜ਼ਵਾਨ ਦੇ ਤੌਰ 'ਤੇ ਡਿੱਗੀ | ਰਿਜ਼ਵਾਨ 43 ਦੌੜਾਂ ਦੇ ਨਿਜੀ ਸਕੋਰ 'ਤੇ ਹਾਰਦਿਕ ਪੰਡਯਾ ਦਾ ਸ਼ਿਕਾਰ ਬਣਿਆ | ਪਾਕਿ ਦੀ ਪੰਜਵੀਂ ਵਿਕਟ ਖੁਰਸ਼ੀਦ ਸ਼ਾਹ ਦੇ ਤੌਰ 'ਤੇ ਡਿੱਗੀ | ਪਾਕਿਸਤਾਨ ਨੂੰ  ਛੇਵਾਂ ਝਟਕਾ ਉਦੋਂ ਲੱਗਾ ਜਦੋਂ ਆਸਿਫ਼ ਅਲੀ 9 ਦੌੜਾਂ ਦੇ ਨਿਜੀ ਸਕੋਰ 'ਤੇ ਭੁਵਨੇਸ਼ਵਰ ਦਾ ਸ਼ਿਕਾਰ ਬਣਿਆ |