ਹਰਿਆਣਾ ਪੰਥਕ ਕਨਵੈਨਸ਼ਨ 'ਚ ਬਲਜੀਤ ਸਿੰਘ ਦਾਦੂਵਾਲ ਵਿਰੁਧ ਮਤਾ ਪਾਸ, ਹਰਿਆਣਾ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਪ੍ਰਧਾਨ ਮੰਨਣ ਤੋਂ ਇਨਕਾਰ

ਕਰਨਾਲ, 28 ਅਗੱਸਤ (ਪਲਵਿੰਦਰ ਸਿੰਘ ਸੱਗੂ): ਕਰਨਾਲ ਵਿਚ ਅੱਜ ਹਰਿਆਣੇ ਦੇ ਸਿੱਖ ਬੁੱਧੀਜੀਵੀਆਂ ਵੱਲੋਂ ਗੁਰਦੁਆਰਾ ਸਿੰਘ ਸਭਾ ਪ੍ਰੇਮ ਨਗਰ ਵਿਖੇ ਪੰਥਕ ਕਨਵੈਨਸ਼ਨ ਕੀਤੀ ਗਈ, ਜਿਸ ਦੀ ਪ੍ਰਧਾਨਗੀ ਬਾਬਾ ਬਲਵਿੰਦਰ ਸਿੰਘ, ਨੋਜਵਾਨ ਪੰਥਕ ਆਗੂ ਅੰਗਰੇਜ਼ ਸਿੰਘ ਪੰਨੂ, ਦੀਦਾਰ ਸਿੰਘ ਨਲਵੀ, ਗੁਰਦੀਪ ਸਿੰਘ ਰੰਬਾ ਨੇ ਕੀਤੀ |
ਇਸ ਪੰਥਕ ਕਨਵੈਨਸ਼ਨ ਵਿਚ ਮਤਾ ਪਾਸ ਕਰ ਕੇ ਐਲਾਨ ਕੀਤਾ ਗਿਆ ਕਿ ਬਲਜੀਤ ਸਿੰਘ ਦਾਦੂਵਾਲ ਹਰਿਆਣਾ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਨਹੀਂ ਹਨ ਅਤੇ ਸੰਗਤਾਂ ਨੇ ਇਸ ਨੂੰ  ਰੱਦ ਕਰ ਦਿਤਾ ਹੈ, ਮੌਜੂਦਾ ਸਮੇਂ ਵਿਚ ਉਹ ਹਰਿਆਣਾ ਸਿੱਖ ਗੁਰਦੁਆਰਾ ਕਮੇਟੀ 'ਤੇ ਨਾਜਾਇਜ਼ ਕਬਜ਼ਾ ਕਰੀ ਬੈਠੇ ਹਨ | ਇਸੇ ਲਈ ਹਰਿਆਣੇ ਦੀ ਸੰਗਤ ਉਸ ਨੂੰ  ਮੁਖੀ ਨਹੀਂ ਮੰਨਦੀ | ਕਿਉਂਕਿ ਹਰਿਆਣਾ ਕਮੇਟੀ ਦੀ ਐਡਹਾਕ ਕਮੇਟੀ ਦੇ ਸੰਵਿਧਾਨ ਦੀ ਧਾਰਾ 16(8) ਦੀ ਵਿਵਸਥਾ ਹੈ, ਜਿਸ ਦੀ ਮਿਆਦ ਸਿਰਫ਼ 18 ਮਹੀਨੇ ਹੈ, ਜਿਸ ਨੂੰ  ਦਾਦੂਵਾਲ ਨੇ ਇਹ ਕਾਰਜਕਾਲ ਪੂਰਾ ਕੀਤਾ ਹੈ ਅਤੇ ਦਾਦੂਵਾਲ ਅੱਜ ਤਕ ਜਨਰਲ ਹਾਊਸ ਦੀ ਮੀਟਿੰਗ ਨਹੀਂ ਬੁਲਾ ਸਕੇ ਅਤੇ ਇਸ ਕਾਰਜਕਾਰਨੀ ਨੂੰ  ਚੋਣ ਕਰਨ ਦਾ ਅਧਿਕਾਰ ਨਹੀਂ ਸੀ ਅਤੇ ਨਾ ਹੀ ਇਸ ਨੇ ਅੱਜ ਤਕ ਜਨਰਲ ਬਾਡੀ ਦੀ ਮੀਟਿੰਗ ਵਿਚ ਬਜਟ ਪਾਸ ਕੀਤਾ ਹੈ |
ਇਸ ਮੌਕੇ ਪੰਥਕ ਕਨਵੈਨਸ਼ਨ ਨੂੰ  ਸੰਬੋਧਨ ਕਰਦਿਆਂ ਸ਼੍ਰੋਮਣੀ ਅਕਾਲੀ ਦਲ ਦਿੱਲੀ ਦੇ ਜਨਰਲ ਸਕੱਤਰ ਸਰਦਾਰ ਹਰਵਿੰਦਰ ਸਿੰਘ ਸਰਨਾ ਨੇ ਕਿਹਾ ਕਿ ਹਰਿਆਣੇ ਦੇ ਸਿੱਖਾਂ ਨੂੰ  ਜਾਗਣਾ ਚਾਹੀਦਾ ਹੈ ਅਤੇ ਅਜਿਹੇ ਮੁਖੀ ਦੀ ਚੋਣ ਕਰਨੀ ਚਾਹੀਦੀ ਹੈ ਜੋ ਸਿੱਖ ਕੌਮ ਦੀਆਂ ਭਾਵਨਾਵਾਂ ਅਨੁਸਾਰ ਕੰਮ ਕਰੇ ਨਾ ਕਿ ਸਿੱਖ ਕੌਮ ਦੀਆਂ ਖ਼ਿਲਾਫ਼ਤ ਕਰਨ ਵਾਲਿਆ ਏਜੰਸੀਆਂ ਦੇ  ਹੱਥਾਂ ਦੀ ਕਠਪੁਤਲੀ ਬਣ ਕੇ ਅਤੇ ਨੇ ਹੀ ਦਾਦੂਵਾਲ ਵਾਂਗ ਹੁਣ ਹਰਿਆਣੇ ਦੀ ਸਿੱਖ ਸੰਗਤ ਨੂੰ  ਜਾਗ ਕੇ ਅਪਣੀ ਲੜਾਈ ਆਪ ਲੜਨੀ ਪਵੇਗੀ | ਇਸ ਮੌਕੇ ਚੰਡੀਗੜ੍ਹ ਤੋਂ ਸ਼੍ਰੋਮਣੀ ਖ਼ਾਲਸਾ ਪੰਚਾਇਤ ਦੇ ਮੁਖੀ ਰਾਜਿੰਦਰ ਸਿੰਘ ਖ਼ਾਲਸਾ ਨੇ ਕਿਹਾ ਕਿ ਸਮੇਂ ਦੀ ਲੋੜ ਹੈ ਕਿ ਅਜਿਹੇ ਵਿਅਕਤੀਆਂ ਨੂੰ  ਸਿੱਖ ਸੰਪਰਦਾ ਦੇ ਮੁਖੀ ਵਜੋਂ ਚੁਣਿਆ ਜਾਵੇ ਜਿਨ੍ਹਾਂ ਨੂੰ  ਗੁਰੂਵਾਣੀ, ਸਿੱਖ ਇਤਿਹਾਸ ਅਤੇ ਦੇਸ਼ ਦੇ ਸੰਵਿਧਾਨ ਦਾ ਗਿਆਨ ਹੋਵੇ ਲ ਉਹਨਾਂ ਕਿਹਾ ਕਿ ਸਾਡੇ ਸਿੱਖਾਂ ਨੇ ਵੱਡੀਆਂ ਕੁਰਬਾਨੀਆਂ ਦੇ ਕੇ ਗੁਰਦੁਆਰਿਆਂ ਨੂੰ  ਮਹੰਤਾਂ ਤੋਂ ਆਜ਼ਾਦ ਕਰਵਾਇਆ ਸੀ ਪਰ ਅੱਜ ਸਾਡੀ ਬਦਕਿਸਮਤੀ ਹੈ ਕਿ ਮਹੰਤਾਂ ਦਾ ਫਿਰ ਤੋਂ ਗੁਰਦੁਆਰਿਆਂ 'ਤੇ ਕਬਜ਼ਾ ਹੈ |ਇਸ ਮੌਕੇ ਸਿੱਖ ਵਿਦਵਾਨ ਤੇ ਕਿਸਾਨ ਆਗੂ ਬਲਦੇਵ ਸਿੰਘ ਸਿਰਸਾ ਨੇ ਆਪਣੇ ਸੰਬੋਧਨ ਵਿੱਚ ਕਿਹਾ ਕਿ ਦਾਦੂਵਾਲ ਸ਼ੁਰੂ ਤੋਂ ਹੀ ਇੱਕ ਬਦਮਾਸ਼ ਆਦਮੀ ਹੈ ਅਤੇ ਹਰਿਆਣਾ ਦੀ ਕਮੇਟੀ ਵਿੱਚ ਕਾਬਜ਼ ਹੋ ਗਿਆ ਹੈ, ਜਿਸ ਨੂੰ  ਹਟਾਉਣ ਲਈ ਹਰਿਆਣੇ ਦੇ ਸਿੱਖ ਨੌਜਵਾਨਾਂ ਨੂੰ  ਅੱਗੇ ਆਉਣਾ ਪਵੇਗਾ ਅਤੇ ਇਸ ਲਈ ਸਿੱਖ ਨੌਜਵਾਨਾਂ ਨੂੰ  ਆਪਣੇ ਇਤਿਹਾਸ ਅਤੇ ਗੁਰਬਾਣੀ ਨਾਲ ਜੁੜੇ ਰਹਿਣ ਦੀ ਸਖ਼ਤ ਲੋੜ ਹੈ |ਇਸ ਪੰਥਕ ਕਨਵੈਨਸ਼ਨ ਨੂੰ  ਟੋਹਾਣਾ ਦੇ ਸ਼੍ਰੋਮਣੀ ਕਮੇਟੀ ਮੈਂਬਰ ਬਲਦੇਵ ਸਿੰਘ ਖਾਲਸਾ, ਹਰਿਆਣਾ ਕਮੇਟੀ ਮੈਂਬਰ ਤੇ ਪੰਥਕ ਕਨਵੈਨਸ਼ਨ ਦੇ ਮੈਂਬਰ ਦੀਦਾਰ ਸਿੰਘ ਨਲਵੀ, ਹਰਿਆਣਾ ਕਮੇਟੀ ਮੈਂਬਰ ਅਪਾਰ ਸਿੰਘ, ਅਵਤਾਰ ਸਿੰਘ ਚੱਕੂ, ਸੁਰਿੰਦਰ ਸਿੰਘ ਸ਼ਾਹ, ਗੁਰਮੀਤ ਸਿੰਘ ਨੰਗਲ, ਦਵਿੰਦਰ ਸਿੰਘ ਮੱਟੂ, ਰਣਜੋਧ ਸਿੰਘ ਸਰਪੰਚ ਆਦਿ ਨੇ ਸੰਬੋਧਨ ਕੀਤਾ ਇਸ ਮੋਕੇ ਸੁਖਵਿੰਦਰ ਝੱਬਰ, ਬੀਬੀ ਭੁਪਿੰਦਰ ਕੌਰ ਖਾਲਸਾ, ਅਮੀਰ ਸਿੰਘ ਆਦਿ ਨੇ ਸੰਬੋਧਨ ਕੀਤਾ |ਇਸ ਮੌਕੇ ਬਾਬਾ ਲੱਖਾ ਸਿੰਘ, ਸਰਪੰਚ ਐਸੋਸੀਏਸ਼ਨ ਦੇ ਸਾਬਕਾ ਪ੍ਰਧਾਨ ਸਰਦਾਰ ਰਣਜੋਧ ਸਿੰਘ ਰੁਖਸਾਣਾ, ਕੁਲਦੀਪ ਸਿੰਘ ਪ੍ਰਧਾਨ ਸੇਵਾਦਾਰ ਸਭਾ, ਤਿ੍ਲੋਕ ਸਿੰਘ ਅਸੰਧ, ਗੁਰਮੀਤ ਸਿੰਘ ਕੰਬੋਜ, ਗੁਰਮੇਜ ਸਿੰਘ ਅਤੇ ਸੈਂਕੜੇ ਸਿੱਖ ਸੰਗਤਾਂ ਹਾਜ਼ਰ ਸਨ |
1