ਹੁਣ ਪੰਜਾਬ ਦੇ ਕਈ ਜ਼ਿਲਿ੍ਹਆਂ 'ਚ ਝੋਨੇ ਦੀ ਫ਼ਸਲ ਚੀਨੀ ਵਾਇਰਸ ਦੀ ਲਪੇਟ ਵਿਚ

ਚੰਡੀਗੜ੍ਹ 28 ਅਗੱਸਤ (ਗੁਰਉਪਦੇਸ਼ ਭੁੱਲਰ) : ਪੰਜਾਬ 'ਚ ਫ਼ਸਲ ਪੱਕਣ ਸਮੇਂ ਕਿਸਾਨਾਂ ਨੂੰ ਕਦੇ ਮੀਂਹ ਤੇ ਗੜ੍ਹਮਾਰੀ ਤੇ ਕਦੇ ਕਿਸੇ ਬੀਮਾਰੀ ਕਾਰਨ ਅਕਸਰ ਹੀ ਨੁਕਸਾਨ ਝੱਲਣਾ ਪੈਂਦਾ ਹੈ | ਇਸ ਵਾਰ ਝੋਨੇ ਦੀ ਪੱਕ ਰਹੀ ਫਸਲ ਚੀਨੀ ਵਾਇਰਸ ਦੀ ਚਪੇਟ 'ਚ ਆ ਚੁੱਕੀ ਹੈ |
ਮਿਲੀ ਜਾਣਕਾਰੀ ਕਾਰਨ ਪੰਜਾਬ ਦੇ ਕਈ ਜ਼ਿਲਿ੍ਹਆਂ 'ਚ ਇਸ ਵਾਇਰਸ ਕਾਰਨ ਝੋਨੇ ਦੇ ਪੌਦਿਆਂ ਦਾ ਵਿਕਾਸ ਰੁਕ ਜਾਣ ਕਾਰਨ ਉਹ ਛੋਟੇ ਰਹਿ ਗਏ ਹਨ | ਪੌਦਿਆਂ ਦੀਆਂ ਜੜ੍ਹਾਂ ਤੇ ਪੱਤੀਆਂ 'ਤੇ ਵੀ ਪ੍ਰਭਾਵ ਦੇਖਣ ਨੂੰ ਮਿਲ ਰਿਹਾ ਹੈ | ਇਸ ਨਾਲ ਝੋਨੇ ਦੀ ਫ਼ਸਲ ਦੀ ਪੈਦਾਵਾਰ ਘਟ ਸਕਦੀ ਹੈ | ਭਾਵੇਂ ਪੰਜਾਬ ਖੇਤੀ ਯੂਨੀਵਰਸਿਟੀ ਇਸ ਚੀਨੀ ਵਾਇਰਸ ਬਾਰੇ ਜਾਗਰੂਕ ਹੈ ਅਤੇ ਅਪਣਾ ਕੰਮ ਕਰ ਰਹੀ ਹੈ ਪਰ ਸੂਬੇ ਦੀ ਖੇਤੀ ਵਿਭਾਗ ਇਸ ਵਾਇਰਸ ਨੂੰ ਲੈ ਕੇ ਬੇਅਸਰ ਹੈ | ਸਬੰਧਤ ਜ਼ਿਲਿਆਂ ਦੇ ਖੇਤੀ ਅਫ਼ਸਰਾਂ ਨੂੰ ਹਾਲੇ ਪਤਾ ਹੀ ਨਹੀਂ ਲੱਗਾ ਕਿ ਝੋਨੇ ਦੀ ਫ਼ਸਲ ਚੀਨੀ ਵਾਇਰਸ ਦੀ ਮਾਰ ਹੇਠ ਆ ਚੁੱਕੀ ਹੈ | ਪੰਜਾਬ ਖੇਤੀ ਯੂਨੀਰਸਿਟੀ ਦੇ ਵੀ.ਸੀ. ਡਾ. ਸਤਬੀਰ ਸਿੰਘ ਗੋਸਲ ਨੇ ਦਸਿਆ ਹੈ ਕਿ ਝੋਨੇ ਦੀ ਫ਼ਸਲ ਦੇ ਪੌਦੇ ਐਸ.ਆਰ. ਬੀ.ਐਸ.ਡੀ.ਬੀ. (ਚੀਨੀ ਵਾਇਰਸ) ਕਾਰਨ ਹੀ ਛੋਟੇ ਰਹਿ ਰਹੇ ਹਨ | ਉਨ੍ਹਾਂ ਦਾ ਕਹਿਣਾ ਹੈ ਕਿ ਫਤਿਹਗੜ੍ਹ ਸਾਹਿਬ, ਮੋਹਾਲੀ, ਪਟਿਆਲਾ, ਹੁਸ਼ਿਆਰਪੁਰ, ਲੁਧਿਆਣਾ, ਪਠਾਨਕੋਟ ਤੇ ਗੁਰਦਾਸਪੁਰ ਆਦਿ ਜ਼ਿਲਿ੍ਹਆਂ ਤੋਂ ਇਸ ਬਾਰੇ ਯੂਨੀਵਰਸਿਟੀ ਨੂੰ ਜਾਣਕਾਰੀ ਮਿਲੀ ਸੀ | ਇਸ ਤੋਂ ਬਾਅਦ ਯੂਨੀਵਰਸਿਟੀ ਦੇ ਵਿਗਿਆਨੀਆਂ ਨੇ ਪ੍ਰਭਾਵਿਤ ਜ਼ਿਲਿ੍ਹਆਂ ਦਾ ਦੌਰਾ ਕਰ ਕੇ ਸੈਂਪਲ ਲਏ | ਇਸ ਦੀ ਜਾਂਚ ਬਾਅਦ ਇਹ ਗੱਲ ਸਾਹਮਣੇ ਆਈ ਹੈ ਕਿ 15 ਤੋਂ 25 ਜੂਨ ਵਿਚਕਾਰ ਬਿਜਾਈ ਅਧੀਨ ਆਈ ਝੋਨੇ ਦੀ ਫ਼ਸਲ ਜ਼ਿਆਦਾ ਪ੍ਰਭਾਵਿਤ ਹੈ | ਖੇਤੀ ਯੂਨੀਵਰਸਿਟੀ ਦੇ ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਪੰਜਾਬ 'ਚ ਪਹਿਲੀ ਵਾਰੀ ਇਸ ਵਾਇਰਸ ਦੇ ਹਮਲੇ ਦਾ ਪਤਾ ਲੱਗਿਆ ਹੈ | ਸਾਲ 2021 'ਚ ਇਸੇ ਤਰ੍ਹਾਂ ਦੇ ਵਾਇਰਸ ਦਾ ਚੀਨ ਦੇ ਦੱਖਣੀ ਹਿੱਸਿਆਂ 'ਚ ਅਸਰ ਹੋਣ ਨਾਲ ਫਸਲ ਦੀ ਪੈਦਾਵਾਰ ਦਾ ਕਾਫੀ ਨੁਕਸਾਨ ਹੋਇਆ ਸੀ | ਇਸ ਵਾਇਰਸ ਦਾ ਕੋਈ ਹੱਲ ਫਿਲਹਾਲ ਖੇਤੀ ਯੂਨੀਵਰਸਿਟੀ ਕੋਲ ਨਹੀਂ ਪਰ ਯੂਨੀਵਰਸਿਟੀ ਦੇ ਮਾਹਰ ਹੱਲ ਦੀ ਖੋਜ਼ 'ਚ ਲੱਗੇ ਹੋਏ ਹਨ |