ਮਾਪੇ ਲਾਸ਼ ਨੂੰ ਉਡੀਕਦੇ ਹੀ ਰਹਿ ਗਏ
ਚੰਡੀਗੜ੍ਹ : ਭਾਰਤ ਛੱਡ ਕੇ ਪਾਕਿਸਤਾਨ 'ਚ ਰਹਿਣ ਵਾਲੇ ਤੇ ਦੇਸ਼ ਵਿਰੋਧੀ ਗਤੀਵਿਧੀਆਂ 'ਚ ਲਿਪਤ ਰਹੇ ਹੈਪੀ ਪੀ.ਐਚ.ਡੀ ਨੂੰ ਸਸਕਾਰ ਵੇਲੇ ਵੀ ਅਪਣੀ ਧਰਤੀ ਨਸੀਬ ਨਾ ਹੋ ਸਕੀ। ਪਾਕਿਸਤਾਨ ਦੇ ਜ਼ਿਲ੍ਹਾ ਲਾਹੌਰ ਦੇ ਸਰਹੱਦੀ ਪਿੰਡ ਡੇਰਾ ਚਾਹਲ 'ਚ ਬੀਤੇ ਦਿਨੀਂ ਮਾਰੇ ਗਏ ਹਰਪ੍ਰੀਤ ਸਿੰਘ ਉਰਫ਼ ਹੈਪੀ ਪੀ.ਐਚ.ਡੀ. ਦਾ ਲਾਹੌਰ ਵਿਚ ਚੁਪ ਚੁਪੀਤੇ ਸਸਕਾਰ ਕੀਤੇ ਜਾਣ ਦੀ ਖ਼ਬਰ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਹੈਪੀ ਪੀ.ਐਚ.ਡੀ ਜੋ ਕਿ ਪਾਕਿਸਤਾਨ ਵਿਚ ਭੁਪਿੰਦਰ ਸਿੰਘ ਦੇ ਨਾਂ ਨਾਲ ਰਹਿ ਰਿਹਾ ਸੀ, ਦੀ ਲਾਸ਼ ਦਾ ਸਸਕਾਰ ਬੁਧਵਾਰ ਦੁਪਹਿਰ ਨੂੰ ਲਾਹੌਰ 'ਚ ਰਾਵੀ ਦਰਿਆ ਦੇ ਨਜ਼ਦੀਕ ਬਣੇ ਸ਼ਮਸ਼ਾਨ ਘਾਟ ਵਿਚ ਕੀਤਾ ਗਿਆ। ਸਸਕਾਰ ਮੌਕੇ ਉਸ ਦਾ ਇਕ ਪੁਰਾਣਾ ਸਾਥੀ ਮੌਕੇ 'ਤੇ ਮੌਜੂਦ ਹੋਣ ਦੀ ਖ਼ਬਰ ਹੈ।
ਹੈਪੀ ਪੀ.ਐਚ.ਡੀ. ਇੰਟਰਨੈਸ਼ਨਲ ਸਿੱਖ ਯੂਥ ਫ਼ੈਡਰੇਸ਼ਨ ਦੇ ਆਗੂ ਲਖਬੀਰ ਸਿੰਘ ਰੋਡੇ ਦਾ ਨਜ਼ਦੀਕੀ ਦਸਿਆ ਜਾਂਦਾ ਹੈ। ਪਤਾ ਲੱਗਾ ਹੈ ਕਿ ਲਾਹੌਰ ਵਿਚ ਉਹ ਭੁਪਿੰਦਰ ਸਿੰਘ ਪੁੱਤਰ ਸੰਤ ਸਿੰਘ ਮੁਹੱਲਾ ਬਲੀਲਾ ਲਾਰੜ ਗੁਰਦੁਆਰਾ ਭੱਟੀ ਸਾਹਿਬ ਨਨਕਾਣਾ ਸਾਹਿਬ ਵਿਖੇ ਰਹਿ ਰਿਹਾ ਸੀ। ਉਸ ਕੋਲ ਜੋ ਸ਼ਨਾਖ਼ਤੀ ਕਾਰਡ ਸੀ, ਉਹ 31 ਮਈ 2024 ਤਕ ਵੈਲਿਡ ਸੀ।
ਦਸਿਆ ਇਹ ਜਾ ਰਿਹਾ ਹੈ ਕਿ ਪਾਕਿਸਤਾਨ ਨੇ ਹੈਪੀ ਦੀ ਲਾਸ਼ ਨੂੰ ਭਾਰਤ ਹਵਾਲੇ ਇਸ ਲਈ ਨਹੀਂ ਕੀਤਾ ਕਿਉਂਕਿ ਉਹ ਦਿਖਾਉਣਾ ਚਾਹੁੰਦਾ ਹੈ ਕਿ ਉਸ ਦੀ ਧਰਤੀ ਤੋਂ ਅਤਿਵਾਦੀ ਕਾਰਵਾਈਆਂ ਨਹੀਂ ਚਲਦੀਆਂ। ਹਾਲਾਂਕਿ ਹੈਪੀ ਦੇ ਪਿਤਾ ਅਵਤਾਰ ਸਿੰਘ ਤੇ ਮਾਤਾ ਖ਼ੁਸ਼ਬੀਰ ਕੌਰ ਜੋ ਕਿ ਅੰਮ੍ਰਿਤਸਰ ਦੇ ਛੇਹਰਟਾ ਇਲਾਕੇ ਵਿਚ ਰਹਿ ਰਹੇ ਹਨ, ਨੇ ਅਪਣੇ ਪੁੱਤਰ ਦੀ ਲਾਸ਼ ਮੰਗੀ ਸੀ।
ਇਸ ਦੇ ਨਾਲ ਹੀ ਉਨ੍ਹਾਂ ਸਪੱਸ਼ਟ ਕਰ ਦਿਤਾ ਸੀ ਕਿ ਹੈਪੀ ਅਤਿਵਾਦੀ ਗਤੀਵਿਧੀਆਂ 'ਚ ਪੈ ਕੇ ਪਾਕਿਸਤਾਨ ਚਲਾ ਗਿਆ ਸੀ ਤੇ ਮੁੜ ਕੇ ਉਸ ਦਾ ਪਰਵਾਰਕ ਮੈਂਬਰਾਂ ਨਾਲ ਕੋਈ ਸੰਪਰਕ ਨਹੀਂ ਹੋਇਆ। ਹੁਣ ਉਨ੍ਹਾਂ ਨੂੰ ਆਸ ਸੀ ਕਿ ਪਾਕਿਸਤਾਨ ਉਸ ਦੀ ਲਾਸ਼ ਉਨ੍ਹਾਂ ਨੂੰ ਸੌਂਪ ਦੇਵੇਗਾ ਪਰ ਅਜਿਹਾ ਨਹੀਂ ਹੋ ਸਕਿਆ।