ਹਿਮਾਚਲ ਪ੍ਰਦੇਸ਼ ਦੇ ਸਿਰਮੌਰ 'ਚ ਵਾਹਨ ਖੱਡ 'ਚ ਡਿੱਗਾ, 10 ਮੌਤਾਂ

ਮੋਦੀ ਨੇ ਦੁੱਖ ਪ੍ਰਗਟਾਇਆ, ਮਿ੍ਤਕਾਂ ਦੇ ਪ੍ਰਵਾਰ ਨੂੰ  ਦੋ ਦੋ ਲੱਖ ਦਾ ਮੁਆਵਜ਼ਾ

ਨਾਹਨ, 29 ਜੂਨ : ਸ਼ਿਲਾਈ ਉਪਮੰਡਲ 'ਚ ਟਿਮਬੀ-ਬਕਰਾਸ ਮਾਰਗ 'ਤੇ ਇਕ ਵਾਹਨ ਦੇ ਖੱਡ 'ਚ ਡਿੱਗਣ ਨਾਲ 10 ਲੋਕਾਂ ਦੀ ਦਰਦਨਾਕ ਮੌਤ ਹੋ ਗਈ ਅਤੇ ਦੋ ਜ਼ਖ਼ਮੀ ਹੋ ਗਏ | 
ਸ਼ੁਰੂਆਤੀ ਜਾਣਕਾਰੀ ਮੁਤਾਬਕ, ਇਲਾਕਾ ਵਾਸੀਆਂ ਨੇ ਤੁਰਤ ਹੀ ਬਚਾਅ ਕਾਰਜ ਸ਼ੁਰੂ ਕਰ ਦਿਤਾ ਸੀ ਪਰ ਜ਼ਖ਼ਮੀ ਹੋਏ ਲੋਕਾਂ 'ਚੋਂ ਜ਼ਿਆਦਾਤਰ ਨੇ ਘਟਨਾ ਵਾਲੀ ਥਾਂ 'ਤੇ ਹੀ ਦਮ ਤੋੜ ਦਿਤਾ | ਜਾਣਕਾਰੀ ਮੁਤਾਬਕ, ਚੜੇਊ ਤੋਂ ਬਰਾਤੀਆਂ ਨੂੰ  ਲੈ ਕੇ ਬਲੈਰੋ ਕੈਂਪਰ ਬਕਰਾਸ ਵਲ ਜਾ ਰਹੀ ਸੀ | ਪਸ਼ੋਗ ਨਾਂ ਦੀ ਥਾਂ 'ਤੇ ਵਾਹਨ ਚਾਲਕ ਦੇ ਕਾਬੂ ਤੋਂ ਬਾਹਰ ਹੋ ਗਿਆ ਜਿਸ ਕਾਰਨ ਸਵਾਰੀਆਂ ਸਮੇਤ ਬਲੈਰੋ ਕੈਂਪਰ ਖੱਡ 'ਚ ਜਾ ਡਿੱਗੀ | ਸੂਚਨਾ ਮਿਲਦੇ ਹੀ ਸ਼ਿਲਾਈ ਤੋਂ ਥਾਣਾ ਇੰਚਾਰਜ ਅਤੇ ਐਸ.ਡੀ.ਐਮ. ਘਟਨਾ ਸਥਾਨ 'ਤੇ ਪਹੁੰਚੇ | ਫਿਲਹਾਲ ਲਾਸ਼ਾਂ ਦੀ ਪਛਾਣ ਨਹੀਂ ਹੋ ਸਕੀ ਪਰ ਦਸਿਆ ਜਾ ਰਿਹਾ ਹੈ ਕਿ ਜ਼ਿਆਦਾਤਰ ਨੌਜਵਾਨ ਹੀ ਇਸ ਵਾਹਨ 'ਚ ਸਵਾਰ ਸਨ | ਪੂਰੀ ਘਾਟੀ 'ਚ ਹਾਦਸੇ ਤੋਂ ਬਾਅਦ ਸ਼ੋਕ ਦੀ ਲਹਿਰ ਹੈ | ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਵੀ ਇਸ ਹਾਦਸੇ 'ਚ ਜਾਨ ਗੁਆਉਣ ਵਾਲੇ ਲੋਕਾਂ ਲਈ ਦੁੱਖ ਪ੍ਰਗਟਾਇਆ | ਉਨ੍ਹਾਂ ਨੇ ਮਿ੍ਤਕਾਂ ਦੇ ਪ੍ਰਵਾਰਾਂ ਲਈ ਪ੍ਰਧਾਨ ਮੰਤਰੀ ਰਾਹਤ ਫੰਡ 'ਚੋਂ ਦੋ-ਦੋ ਲੱਖ ਰੁਪਏ ਅਤੇ ਜ਼ਖ਼ਮੀਆਂ ਲਈ 50-50 ਹਜ਼ਾਰ ਰੁਪਏ ਦੀ ਰਾਸ਼ੀ ਦੇਣ ਦਾ ਐਲਾਨ ਕੀਤਾ | 
ਪ੍ਰਧਾਨ ਮੰਤਰੀ ਦਫ਼ਤਰ ਨੇ ਸੋਮਵਾਰ ਨੂੰ  ਟਵੀਟ ਕੀਤਾ,''ਹਿਮਾਚਲ ਪ੍ਰਦੇਸ਼ ਦੇ ਸਿਰਮੌਰ 'ਚ ਇਕ ਦੁਰਘਟਨਾ ਕਾਰਨ ਲੋਕਾਂ ਦੀ ਮੌਤ ਤੋਂ ਦੁਖੀ ਹਾਂ | ਪੀ.ਐਮ.ਐਨ.ਆਰ.ਐਫ਼. 'ਚੋਂ ਮਿ੍ਤਕਾਂ ਦੇ ਪ੍ਰਵਾਰ ਨੂੰ  ਦੋ-ਦੋ ਲੱਖ ਰੁਪਏ ਦੀ ਰਾਸ਼ੀ ਦਿਤੀ ਜਾਵੇਗੀ | ਜ਼ਖ਼ਮੀਆਂ ਨੂੰ  50-50 ਹਜ਼ਾਰ ਰੁਪਏ ਦਿਤੇ ਜਾਣਗੇ, ਪ੍ਰਧਾਨ ਮੰਤਰੀ ਮੋਦੀ |''       (ਏਜੰਸੀ)