ਇਕ ਦਿਨ ਵਿਚ 80 ਹਜ਼ਾਰ ਦੇ ਕਰੀਬ ਨਵੇਂ ਮਰੀਜ਼ ਆਏ
ਕੋਰੋਨਾ ਵਾਇਰਸ ਲਾਗ ਦੇ ਮਾਮਲੇ 35 ਲੱਖ ਦੇ ਪਾਰ
to
ਨਵੀਂ ਦਿੱਲੀ, 30 ਅਗੱਸਤ : ਦੇਸ਼ ਵਿਚ ਇਕ ਦਿਨ ਵਿਚ ਕੋਰੋਨਾ ਵਾਇਰਸ ਲਾਗ ਦੇ 78761 ਨਵੇਂ ਮਾਮਲੇ ਸਾਹਮਣੇ ਆਏ ਜਿਸ ਤੋਂ ਬਾਅਦ ਐਤਵਾਰ ਨੂੰ ਲਾਗ ਦੇ ਕੁਲ ਮਾਮਲਿਆਂ ਦੀ ਗਿਣਤੀ 35 ਲੱਖ ਦੇ ਪਾਰ ਪਹੁੰਚ ਗਈ। ਹਫ਼ਤਾ ਭਰ ਪਹਿਲਾਂ ਹੀ ਪੀੜਤਾਂ ਦੀ ਗਿਣਤੀ 30 ਲੱਖ ਤੋਂ ਵੱਧ ਹੋਈ ਸੀ। ਕੇਂਦਰੀ ਸਿਹਤ ਮੰਤਰਾਲੇ ਦੁਆਰਾ ਦਿਤੇ ਗਏ ਅੰਕੜਿਆਂ ਵਿਚ ਇਹ ਜਾਣਕਾਰੀ ਸਾਹਮਣੇ ਆਈ।
ਮੰਤਰਾਲੇ ਨੇ ਦਸਿਆ ਕਿ ਐਤਵਾਰ ਤਕ ਕੋਵਿਡ-19 ਦੇ 2713933 ਮਰੀਜ਼ ਠੀਕ ਹੋ ਚੁਕੇ ਹਨ। ਸਵੇਰੇ ਅੱਠ ਵਜੇ ਤਕ ਪ੍ਰਾਪਤ ਅੰਕੜਿਆਂ ਮੁਤਾਬਕ ਲਾਗ ਦੇ ਕੁਲ ਮਾਮਲਿਆਂ ਦੀ ਗਿਣਤੀ ਵੱਧ ਕੇ 3542733 ਹੋ ਗਈ ਅਤੇ ਕੋਵਿਡ-19 ਨਾਲ ਮਰਨ ਵਾਲਿਆਂ ਦੀ ਗਿਣਤੀ 63498 'ਤੇ ਪਹੁੰਚ ਗਈ। ਅੰਕੜਿਆਂ ਮੁਤਾਬਕ ਪਿਛਲੇ ਚੌਵੀ ਘੰਟਿਆਂ ਵਿਚ ਕੋਵਿਡ-19 ਦੇ 948 ਮਰੀਜ਼ਾਂ ਦੀ ਮੌਤ ਹੋ ਗਈ। ਮਹਾਂਮਾਰੀ ਦਾ ਸ਼ਿਕਾਰ ਹੋਏ ਮਰੀਜ਼ਾਂ ਦੇ ਠੀਕ ਹੋਣ ਦੀ ਦਰ ਵੱਧ ਕੇ 76.61 ਫ਼ੀ ਸਦੀ ਹੋ ਗਈ ਅਤੇ ਇਸ ਨਾਲ ਹੋਣ ਵਾਲੀਆਂ ਮੌਤਾਂ ਦੀ ਦਰ ਘੱਟ ਕੇ 1.79 ਫ਼ੀ ਸਦੀ ਰਹਿ ਗਈ।
ਮੰਤਰਾਲੇ ਤੋਂ ਪ੍ਰਾਪਤ ਅੰਕੜਿਆਂ ਮੁਤਾਬਕ ਦੇਸ਼ ਵਿਚ ਇਸ ਵੇਲੇ ਕੋਵਿਡ-19 ਦੇ 765302 ਮਰੀਜ਼ਾਂ ਦਾ ਇਲਾਜ ਚੱਲ ਰਿਹਾ ਹੈ ਜੋ ਲਾਗ ਦੇ ਕੁਲ ਮਾਲਿਆਂ ਦਾ 21.60 ਫ਼ੀ ਸਦੀ ਹੈ। ਇੰਡੀਅਨ ਮੈਡੀਕਲ ਰਿਸਰਚ ਕੌਂਸਲ ਮੁਤਾਬਕ ਸਨਿਚਰਵਾਰ ਨੂੰ 1055027 ਨਮੂਨਿਆਂ ਦੀ ਜਾਂਚ ਹੋਈ। ਆਈਸੀਐਮਆਰ ਨੇ ਕਿਹਾ ਕਿ 29 ਅਗੱਸਤ ਤਕ ਕੁਲ 41461636 ਨਮੂਨਿਆਂ ਦੀ ਜਾਂਚ ਹੋਈ। ਕੋਵਿਡ ਨਾਲ ਜੁੜੀਆਂ ਹਾਲੀਆ ਮੌਤਾਂ ਵਿਚੋਂ 328 ਮਰੀਜ਼ ਮਹਾਰਾਸ਼ਟਰ ਅਤੇ 115 ਕਰਨਾਟਕ ਦੇ ਸਨ।
ਤਾਮਿਲਨਾਡੂ ਦੇ 87, ਆਂਧਰਾ ਪ੍ਰਦੇਸ਼ ਦੇ 82, ਯੂਪੀ ਦੇ 62, ਪਛਮੀ ਬੰਗਾਲ ਦੇ 53, ਪੰਜਾਬ ਦੇ 41, ਮੱਧ ਪ੍ਰਦੇਸ਼ ਦੇ 22, ਝਾਰਖੰਡ ਦੇ 16, ਦਿੱਲੀ ਦੇ 15, ਉੜੀਸਾ ਦੇ 14, ਗੁਜਰਾਤ ਅਤੇ ਰਾਜਸਥਾਨ ਦੇ 13-13, ਪੁਡੂਚੇਰੀ ਦੇ 12 ਅਤੇ ਛੱਤੀਸਗੜ੍ਹ ਤੇ ਉਤਰਾਖੰਡ ਦੇ 11-11 ਮਰੀਜ਼ਾਂ ਦੀ ਮੌਤ ਹੋ ਗਈ। ਕੋਵਿਡ ਨਾਲ ਤੇਲੰਗਾਨਾ ਵਿਚ 10, ਹਰਿਆਣਾ ਵਿਚ ਨੌਂ, ਜੰਮੂ ਕਸ਼ਮੀਰ ਵਿਚ ਸੱਤ, ਕੇਰਲਾ ਵਿਚ ਲਦਾਖ਼ ਅਤੇ ਤ੍ਰਿਪੁਰਾ ਵਿਚ ਚਾਰ-ਚਾਰ, ਆਸਾਮ, ਗੋਆ ਅਤੇ ਬਿਹਾਰ ਵਿਚ ਤਿੰਨ-ਤਿੰਨ ਅਤੇ ਨਿਕੋਬਾਰ ਦੀਪ ਸਮੂਹ ਵਿਚ ਦੋ ਅਤੇ ਹਿਮਾਚਲ ਪ੍ਰਦੇਸ ਤੇ ਮਣੀਪੁਰ ਵਿਚ ਇਕ ਇਕ ਮਰੀਜ਼ ਨੇ ਦਮ ਤੋੜ ਦਿਤਾ। ਹੁਣ ਤਕ ਹੋਈਆਂ ਕੁਲ ਮੌਤਾਂ ਵਿਚ ਸੱਭ ਤੋਂ ਵੱਧ ਮਹਾਰਾਸ਼ਟਰ ਦੇ 24103 ਮਰੀਜ਼ ਸਨ। ਤਾਮਿਲਨਾਡੂ ਦੇ 71137, ਕਰਨਾਟਕ ਦੇ 5483, ਦਿੱਲੀ ਦੇ 4404, ਆਂਧਰਾ ਪ੍ਰਦੇਸ਼ ਦੇ 3796, ਯੂਪੀ ਦੇ 3365, ਪਛਮੀ ਬੰਗਾਲ ਦੇ 3126, ਗੁਜਰਾਤ ਦੇ 2989 ਅ ਤੇ ਪੰਜਾਬ ਦੇ 1348 ਮਰੀਜ਼ਾਂ ਨੇ ਜਾਨ ਗਵਾਈ। ਸਿਹਤ ਮੰਤਰਾਲੇ ਦਾ ਕਹਿਣਾ ਹੈ ਕਿ ਮ੍ਰਿਤਕਾਂ ਵਿਚ 70 ਫ਼ੀ ਸਦੀ ਅਜਿਹੇ ਮਰੀਜ਼ ਸਨ ਜਿਨ੍ਹਾਂ ਨੂੰ ਹੋਰ ਵੀ ਕਈ ਬੀਮਾਰੀਆਂ ਸਨ। (ਏਜੰਸੀ)