ਪਤੀ ਨਾਲ ਲੜੀ ਔਰਤ ਨੂੰ 2 ਔਰਤਾਂ ਨੇ ਸਹਾਰਾ ਦੇਣ ਦਾ ਝਾਂਸਾ ਦੇ ਕੇ ਦੇਹ ਵਪਾਰ ਵਰਗੇ ਧੰਦੇ ਵਿਚ ਧਕੇਲ ਦਿਤਾ
ਲੁਧਿਆਣਾ : ਪਤੀ ਨਾਲ ਲੜੀ ਔਰਤ ਅਤੇ ਉਸਦੀ 5 ਸਾਲ ਦੀ ਕੁੜੀ ਨੂੰ 2 ਔਰਤਾਂ ਨੇ ਸਹਾਰਾ ਦੇਣ ਦਾ ਝਾਂਸਾ ਦੇ ਕੇ ਦੇਹ ਵਪਾਰ ਵਰਗੇ ਧੰਦੇ ਵਿਚ ਧਕੇਲ ਦਿਤਾ। 9 ਮਹੀਨੇ ਤਕ ਨਸ਼ੇ ਦੀਆਂ ਗੋਲੀਆਂ ਦੇ ਕੇ ਉਸ ਕੋਲੋਂ ਦੇਹ ਵਪਾਰ ਕਰਵਾਉਂਦੀਆਂ ਰਹੀਆਂ। ਜਦਕਿ ਔਰਤ ਦਾ ਪਤੀ ਅਤੇ ਉਸਦੇ ਪੇਕੇ ਪਰਿਵਾਰ ਵਾਲੇ ਲਾਪਤਾ ਹੋਈ ਦੋਵੇਂ ਮਾਂ-ਧੀ ਨੂੰ ਥਾਂ-ਥਾਂ ਭਾਲਦੇ ਰਹੇ। ਇਨਾਂ ਦੋਸ਼ੀਆਂ ਨੇ ਔਰਤ ਦਾ ਕਿਸੇ ਨਾਲ ਵਿਆਹ ਕਰਵਾਉਣ ਦੀ ਗੱਲ ਕੀਤੀ। ਨਾਂਹ ਕਰਨ ਤੇ ਉਨਾਂ ਨੇ ਔਰਤ ਅਤੇ ਉਸਦੀ 5 ਸਾਲ ਦੀ ਮਾਸੂਮ ਬੱਚੀ ਨਾਲ ਬੁਰੇ ਤਰੀਕੇ ਨਾਲ ਕੱਟ-ਮਾਰ ਕੀਤੀ।
ਔਰਤ ਨੇ ਉਥੇ ਮੁਹੱਲੇ ਵਿਚ ਇਕ ਗੁਆਂਢੀ ਨੂੰ ਸਾਰੀ ਗਲ ਦਸੀ ਜਿਸਤੋ ਬਾਅਦ ਦਰਿੰਦਗੀ ਦਾ ਇਹ ਮਾਮਲਾ ਉਜਾਗਰ ਹੋਇਆ। ਔਰਤ ਅਤੇ ਉਸਦੀ ਧੀ ਨੂੰ ਲੋਕਾਂ ਨੇ ਹਸਪਤਾਲ ਵਿਖੇ ਦਾਖਲ ਕਰਵਾਇਆ ਅਤੇ ਪੁਲਿਸ ਨੂੰ ਸੂਚਨਾ ਦਿਤੀ, ਜਿਸਤੇ ਪੁਲਿਸ ਨੇ ਦੋਹਾ ਔਰਤਾਂ ਨੂੰ ਫਿਲਹਾਲ ਹਿਰਾਸਤ ਵਿਚ ਲੈ ਲਿਆ ਹੈ। ਔਰਤ ਨੇ ਦਸਿਆ ਕਿ ਉਹ ਪਤੀ ਤੋਂ ਵੱਖ ਹੋ ਚੁੱਕੀ ਹੈ। ਉਸਦ 5 ਸਾਲ ਦੀ ਬੇਟੀ ਹੈ। ਪਰਿਵਾਰ ਵਾਲਿਆਂ ਨੇ ਉਸਦਾ ਵਿਆਹ ਹਿਸਾਰ ਵਿਚ ਕਰਵਾਇਆ ਸੀ। ਉਸਦਾ ਦੋਸ਼ ਹੈ ਕਿ ਉਸਦਾ ਪਤੀ ਉਸਨਾਲ ਮਾਰ ਕੁੱਟ ਕਰਦਾ ਸੀ।
ਇਸਲਈ ਇਸ ਸਾਲ ਜਨਵਰੀ ਵਿਚ ਆਪਣੀ ਬੇਟੀ ਨੂੰ ਨਾਲ ਲੈ ਕੇ ਉਹ ਪੇਕੇ ਆ ਗਈ। ਔਰਤ ਨੇ ਕਿਹਾ ਕਿ 18 ਜਨਵਰੀ ਨੂੰ ਉਸਦੇ ਪਿਤਾ ਨੇ ਦੋਹਾਂ ਮਾਂ-ਧੀ ਨੂੰ ਹਿਸਾਰ ਜਾਣ ਵਾਲੀ ਗੱਡੀ ਵਿਚ ਬਿਠਾ ਦਿਤਾ। ਔਰਤ ਦਾ ਕਹਿਣਾ ਹੈ ਕਿ ਪਤੀ ਦੀ ਮਾਰ-ਕੁੱਟ ਕਾਰਨ ਉਹ ਉਥੇ ਨਹੀਂ ਜਾਣਾ ਚਾਹੁੰਦੀ ਸੀ। ਉਸਨੇ ਅਪਣੀ ਇਕ ਮਹਿਲਾ ਜਾਣਕਾਰ ਨੂੰ ਆਪਸੀ ਸਮੱਸਿਆ ਦਸੀ। ਉਸ ਔਰਤ ਨੇ ਉਸਨੂੰ ਸਹਾਰਾ ਦੇਣ ਦੀ ਗਲ ਕਹੀ ਅਤੇ ਉਸਦੀ ਧੀ ਦਾ ਪਾਲਣ-ਪੋਸ਼ਣ ਕਰਨ ਦਾ ਵਾਦਾ ਵੀ ਕੀਤਾ। ਉਸਦੇ ਕਹਿਣ ਤੇ ਉਹ ਅਹਿਮਦਗੜ ਮੰਡੀ ਰੇਲਵੇ ਸਟੇਸ਼ਨ ਤੇ ਉਤਰ ਗਈ।
ਕੁਝ ਸਮੇਂ ਬਾਅਦ ਉਹ ਮਹਿਲਾ ਅਪਣੀ ਇਕ ਸਹੇਲੀ ਨਾਲ ਆਈ ਤੇ ਉਸਦੀ ਧੀ ਨੂੰ ਅਪਣੇ ਘਰ ਲੈ ਗਈ। ਔਰਤ ਦਾ ਦੋਸ਼ ਹੈ ਕਿ ਇਸਤੋਂ ਬਾਅਦ ਉਨਾਂ ਔਰਤਾਂ ਨੇ ਉਸਨੂੰ ਨਸ਼ੇ ਦੀਆਂ ਗੋਲੀਆਂ ਦੇ ਕੇ ਜ਼ਬਰਦਸਤੀ ਦੇਹ ਵਪਾਰ ਦੇ ਧੰਦੇ ਵਿਚ ਧਕੇਲ ਦਿਤਾ। 9 ਮਹੀਨ ਤੱਕ ਉਸ ਨਾਲ ਇਹ ਸਬ ਕੁਝ ਕਰਵਾਉਂਦੀ ਰਹੀ।
