ਬੀਤੀ 26 ਜਨਵਰੀ ਨੂੰ ਪੰਜਾਬ ਪੁਲਿਸ ਵੱਲੋਂ ਕੀਤੇ ਗਏ ਵਿੱਕੀ ਗੌਂਡਰ, ਪ੍ਰੇਮ ਲਾਹੌਰੀਆ ਅਤੇ ਸਵਿੰਦਰ ਗਿੱਲ ਦੇ ਐਨਕਾਉਂਟਰ ਤੋਂ ਬਾਅਦ ਜਿੱਥੇ ਪੰਜਾਬ ਸਰਕਾਰ ਅਤੇ ਹੋਰਨਾਂ ਦਿੱਗਜਾਂ ਵੱਲੋਂ ਪੰਜਾਬ ਪੁਲਿਸ ਨੂੰ ਵਧਾਈਆਂ ਦਿੱਤੀਆਂ ਜਾ ਰਹੀਆਂ ਹਨ, ਉਥੇ ਹੀ ਪਰਿਵਾਰਿਕ ਮੈਂਬਰਾਂ ਵੱਲੋਂ ਪੂਰੇ ਘਟਨਾਕ੍ਰਮ ਦੀ ਸੀ.ਬੀ.ਆਈ ਜਾਂਚ ਦੀ ਮੰਗ ਦੇ ਚਲਦਿਆਂ ਇਸ ਐਨਕਾਉਂਟਰ ‘ਤੇ ਹੁਣ ਉਂਗਲ ਉਠਣੀ ਸ਼ੁਰੂ ਹੋ ਗਈ ਹੈ।
ਪਹਿਲਾਂ ਇਸ ਟੀਮ ਦੇ ਐਨਕਾਊਂਟਰ ਟੀਮ ਦੇ ਲੀਡਰ ਵਿਕਰਮਜੀਤ ਸਿੰਘ ਬਰਾਡ਼ ‘ਤੇ ਉਂਗਲ ਉਠੀ ਸੀ ਕਿ ਉਸ ਨੇ ਧੋਖੇ ਨਾਲ ਸਰੰਡਰ ਕਰਨ ਲਈ ਬੁਲਾ ਕੇ ਵਿੱਕੀ ਗੌਂਡਰ ਅਤੇ ਉਸਦੇ ਸਾਥੀਆਂ ਨੂੰ ਮਾਰਿਆ ਹੈ। ਹੁਣ ਇਹ ਮਾਮਲਾ ਐਥੋਂ ਤੱਕ ਪਹੁੰਚ ਗਿਆ ਹੈ ਕਿ ਹੁਣ ਐਨਕਾਉਂਟਰ ਕਰਨ ਵਾਲੀ ਟੀਮ ਦੇ ਹਥਿਆਰਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਇਹ ਆਦੇਸ਼ ਰਾਜਸਥਾਨ ਦੀ ਅਦਾਲਤ ਨੇ ਦਿੱਤੇ ਹਨ, ਕਿਉਂਕਿ ਐਨਕਾਉਂਟਰ ਰਾਜਸਥਾਨ ਦੇ ਇਲਾਕੇ ਵਿੱਚ ਹੋਇਆ ਸੀ।
ਜਾਂਚ ਕਰਨ ਵਾਲੀ ਟੀਮ ਨੇ ਪੰਜਾਬ ਪੁਲਿਸ ਦੀ ਉਸ ਟੀਮ ਦੇ ਹਥਿਆਰ ਜ਼ਬਤ ਕਰ ਲਏ ਹਨ, ਜਿਸ ਟੀਮ ਨੇ ਐਨਕਾਉਂਟਰ ਕੀਤਾ ਸੀ। ਐਨਕਾਉਂਟਰ ਟੀਮ ਦੇ 10 ਤੋਂ ਵੱਧ ਹਥਿਆਰਾਂ ਨੂੰ ਜ਼ਬਤ ਕੀਤਾ ਗਿਆ ਹੈ। ਪੂਰੇ ਮਾਮਲੇ ਦੀ ਜਾਂਚ ਰਾਜਸਥਾਨ ਪੁਲਿਸ ਦੇ ਐਸ.ਪੀ ਸੁਰਿੰਦਰ ਰਾਠੌਰ ਨੂੰ ਸੌਂਪੀ ਗਈ ਹੈ। ਇਸਦੇ ਨਾਲ ਹੀ ਪ੍ਰਸਾਸ਼ਨ ਅਤੇ ਹਲਕਾ ਪਟਵਾਰੀ ਨੂੰ ਵੀ ਨੋਟਿਸ ਭੇਜਿਆ ਗਿਆ ਹੈ।
ਇਹ ਨੋਟਿਸ ਇਸ ਲਈ ਭੇਜਿਆ ਗਿਆ ਹੈ ਤਾਂ ਜੋ ਸਹੀ ਤਰੀਕੇ ਨਾਲ ਪਤਾ ਲਗਾਇਆ ਜਾ ਸਕੇ ਕਿ ਐਨਕਾਉਂਟਰ ਵਾਲੀ ਥਾਂ ਵਾਕਿਆ ਹੀ ਰਾਜਸਥਾਨ ਅਧੀਨ ਆਉਂਦੀ ਹੈ ਜਾਂ ਫਿਰ ਪੰਜਾਬ ਵਿੱਚ। ਪਰ ਪਟਵਾਰੀ ਦੂਜੇ ਦਿਨ ਵੀ ਮੌਕੇ ‘ਤੇ ਨਹੀਂ ਪਹੁੰਚਿਆ, ਜਿਸ ਕਾਰਨ ਪੈਮਾਇਸ਼ ਨਹੀਂ ਹੋ ਸਕੀ। ਇਸ ਤਰ੍ਹਾਂ ਮਾਮਲੇ ਦੀ ਪੁਲਿਸ ਤੇ ਪ੍ਰਸਾਸ਼ਨਿਕ ਜਾਂਚ ਸ਼ੁਰੂ ਹੋ ਗਈ ਹੈ। ਓਧਰ ਪੀਡ਼ਤ ਪਰਿਵਾਰ ਅਤੇ ਰਿਸ਼ਤੇਦਾਰਾਂ ਵੱਲੋਂ ਪੂਰੇ ਮਾਮਲੇ ਨੂੰ ਫਰਜੀ ਦੱਸਿਆ ਜਾ ਰਿਹਾ ਹੈ।
ਉਨ੍ਹਾਂ ਦਾ ਕਹਿਣਾ ਹੈ ਕਿ ਵਿੱਕੀ ਗੌਂਡਰ, ਪ੍ਰੇਮਾ ਲਾਹੌਰੀਆ ਅਤੇ ਸਵਿੰਦਰ ਗਿੱਲ ਵੱਲੋਂ ਆਤਮ-ਸਮਰਪਣ ਕਰਨਾ ਸੀ, ਪਰ ਉਸ ਤੋਂ ਪਹਿਲਾਂ ਹੀ ਸਾਜਿਸ਼ ਦੇ ਤਹਿਤ ਫਰਜੀ ਐਨਕਾਉਂਟਰ ਕਰਕੇ ਉਨ੍ਹਾਂ ਨੂੰ ਮਾਰ ਮੁਕਾਇਆ ਗਿਆ। ਪੰਜਾਬ ਪੁਲਿਸ ਉਤੇ ਲੱਗ ਰਹੇ ਇਲਜਾਮਾਂ ਵਿੱਚ ਕਿੰਨੀ ਕੁ ਸੱਚਾਈ ਹੈ, ਇਹ ਤਾਂ ਹੁਣ ਮੁਕੰਮਲ ਜਾਂਚ ਤੋਂ ਬਾਅਦ ਹੀ ਪਤਾ ਚੱਲੇਗਾ। ਜ਼ਿਕਰਯੋਗ ਹੈ ਕਿ ਮਾਰੇ ਗਏ ਤਿੰਨੇ ਗੈਂਗਸਟਰ ਚੋਟੀ ਦੀ ਖਿਡਾਰੀ ਵੀ ਸਨ।
