ਫਿਲੌਰ, 1 ਮਾਰਚ (ਰਾਜ) : ਕਾਂਗਰਸ ਦੇ ਰਾਜ ਵਿਚ ਕਾਂਗਰਸੀਆਂ ਵਲੋਂ ਅੱਜ ਇਥੇ ਥਾਣੇ ਸਾਹਮਣੇ ਰੋਸ ਧਰਨਾ ਦਿਤਾ ਗਿਆ। ਨਗਰ ਕੌਂਸਲ ਦੇ ਪ੍ਰਧਾਨ ਨਰਿੰਦਰ ਗੋਇਲ ਨੇ ਦਸਿਆ ਕਿ ਬੀਤੀ ਰਾਤ 9 ਵਜੇ ਦੇ ਕਰੀਬ ਕੁੱਝ ਵਿਅਕਤੀ ਦਾਣਾ ਮੰਡੀ ਫਿਲੌਰ 'ਚ ਉਨ੍ਹਾਂ ਦੇ ਘਰ ਦੇ ਬਾਹਰ ਆ ਕੇ ਲਲਕਾਰੇ ਮਾਰਨ ਲੱਗੇ ਅਤੇ ਗੰਦੀਆਂ ਗਾਲਾਂ ਕੱਢਣ ਲੱਗੇ। ਪ੍ਰਧਾਨ ਗੋਇਲ ਨੇ ਦਸਿਆ ਕਿ ਉਸ ਨੇ ਉਸੇ ਵੇਲੇ ਐਸ.ਐਚ.ਓ. ਫਿਲੌਰ ਨੂੰ ਫ਼ੋਨ ਕੀਤਾ ਪਰ ਉਸ ਨੇ ਫ਼ੋਨ ਨਹੀਂ ਚੁੱਕਿਆ, ਉਸ ਨੇ ਡੀ.ਐਸ.ਪੀ. ਫਿਲੌਰ ਨੂੰ ਫ਼ੋਨ ਕੀਤਾ ਪਰ ਉਸ ਨੇ ਵੀ ਫ਼ੋਨ ਨਹੀਂ ਚੁੱਕਿਆ। ਅਖ਼ੀਰ ਉਸ ਨੇ ਥਾਣੇ ਫ਼ੋਨ ਕੀਤਾ ਤਾਂ ਥਾਣੇ ਤੋਂ 2 ਕਰਮਚਾਰੀ ਮੌਕੇ 'ਤੇ ਪਹੁੰਚੇ ਪਰ ਪੁਲਿਸ ਮੁਲਾਜ਼ਮਾਂ ਦੇ ਸਾਹਮਣੇ ਵੀ ਉਕਤ ਵਿਅਕਤੀ ਗੁੰਡਾਗਰਦੀ ਕਰਦੇ ਰਹੇ ਅਤੇ ਉਸ ਨੂੰ ਧਮਕੀਆਂ ਦਿੰਦੇ ਰਹੇ। ਗੋਇਲ ਨੇ ਦਸਿਆ ਕਿ ਉਨ੍ਹਾਂ ਨੇ ਉਕਤ ਵਿਅਕਤੀਆਂ ਦੀ ਫ਼ੋਨ 'ਤੇ ਮੂਵੀ ਬਣਾ ਕੇ ਸਵੇਰੇ ਅਪਣੇ ਸਾਰੇ ਸਹਿਯੋਗੀਆਂ ਅਤੇ ਮੀਡੀਆ ਨੂੰ ਦਿਖਾਈ। ਉਨ੍ਹਾਂ ਰੋਸ ਪ੍ਰਗਟ ਕਰਦੇ ਹੋਏ ਦਸਿਆ ਕਿ ਪੁਲਿਸ ਨੇ ਉਨ੍ਹਾਂ ਦੀ ਸ਼ਿਕਾਇਤ ਹੀ ਨਹੀਂ ਸੁਣੀ, ਟਾਲ ਮਟੋਲ ਕਰਦੀ ਰਹੀ ਅਤੇ ਬਣਦੀ ਕਾਰਵਾਈ ਵੀ ਨਹੀਂ ਕੀਤੀ। ਅਖ਼ੀਰ ਉਨ੍ਹਾਂ ਨੇ ਮਜ਼ਬੂਰ ਹੋ ਕੇ ਅਪਣੇ ਸਾਥੀਆਂ ਨੂੰ ਨਾਲ ਲੈ ਕੇ ਥਾਣੇ ਦੇ ਬਾਹਰ ਰੋਸ ਧਰਨੇ 'ਤੇ ਬੈਠੇ ਹਨ।
ਐਸ.ਐਚ.ਓ. ਜਸਵਿੰਦਰ ਸਿੰਘ ਨੇ ਮੌਕੇ ਪਹੁੰਚ ਕੇ ਧਰਨਾਕਾਰੀਆਂ ਨੂੰ ਕਿਹਾ ਕਿ ਪੁਲਿਸ ਬਣਦੀ ਕਾਰਵਾਈ ਕਰ ਰਹੀ ਹੈ, ਉਨ੍ਹਾਂ ਨੇ ਇਕ ਦੋਸ਼ੀ ਨੂੰ ਹਿਰਾਸਤ ਵਿਚ ਵੀ ਲੈ ਲਿਆ ਹੈ, ਬਾਕੀ ਵੀ ਫੜੇ ਜਾਣਗੇ ਪਰ ਆਪਣੀ ਸਰਕਾਰ ਵਿਚ ਧਰਨਾ ਲਾਉਣਾ ਉਨ੍ਹਾਂ ਨੂੰ ਸ਼ੋਭਦਾ ਨਹੀਂ ਦਿੰਦਾ।
ਦੂਜੀ ਧਿਰ ਦੇ ਚਤਿੰਦਰ ਕੁਮਾਰ ਸੀਟਾ ਨੇ ਮੀਡੀਆ ਨਾਲ ਗੱਲ ਕਰਦੇ ਹੋਏ ਦਸਿਆ ਕਿ ਨਰਿੰਦਰ ਗੋਇਲ ਦੀ ਘਰ ਵਾਲੀ ਆਏ ਦਿਨ ਉਨ੍ਹਾਂ ਦੇ ਘਰ ਅੱਗੇ ਟੂਣਾ ਟਾਮਣ ਕਰਦੀ ਰਹਿੰਦੀ ਹੈ, ਉਨ੍ਹਾਂ ਨੇ ਕਈ ਵਾਰ ਉਨ੍ਹਾਂ ਨੂੰ ਅਜਿਹਾ ਕਰਨ ਤੋਂ ਰੋਕਿਆ ਵੀ ਹੈ ਪਰ ਉਹ ਹਟਦੇ ਹੀ ਨਹੀਂ, ਇਸੇ ਮਾਨਸਕ ਪ੍ਰੇਸ਼ਾਨੀ ਵਿਚ ਉਸ ਦੀ ਲੱਤ ਖ਼ਰਾਬ ਹੋ ਗਈ। ਦੂਸਰਾ ਉਨ੍ਹਾਂ ਦੇ ਕਾਰੋਬਾਰ ਵੱਡੇ ਪੱਧਰ 'ਤੇ ਚਲਦੇ ਹਨ ਅਤੇ ਨਰਿੰਦਰ ਗੋਇਲ ਉਨ੍ਹਾਂ ਤੋਂ ਨਗਰ ਕੌਂਸਲ ਦਾ ਪ੍ਰਧਾਨ ਹੋਣ ਦੇ ਨਾਤੇ ਗੁੰਡਾ ਟੈਕਸ ਦੇ ਰੂਪ ਵਿਚ ਵੱਡੀਆਂ ਰਕਮਾਂ ਮੰਗ ਕੇ ਬਲੈਕਮੇਲ ਕਰਦਾ ਹੈ। ਨਰਿੰਦਰ ਗੋਇਲ ਨੇ ਉਕਤ ਦੋਸ਼ਾਂ ਨੂੰ ਪੂਰੀ ਤਰ੍ਹਾਂ ਨਕਾਰਿਆ ਹੈ।ਰੋਸ ਧਰਨੇ ਵਿਚ ਨਗਰ ਕੌਂਸਲ ਫਿਲੌਰ ਦੇ ਪ੍ਰਧਾਨ ਨਰਿੰਦਰ ਗੋਇਲ, ਬਜ਼ੁਰਗ ਕਾਂਗਰਸੀ ਲਾਲਾ ਕਾਂਸ਼ੀ ਰਾਮ, ਕੌਂਸਲਰ ਯਸ਼ਪਾਲ ਗਿੰਡਾ, ਕੌਂਸਲਰ ਰਾਏ ਵਰਿੰਦਰ, ਕੌਂਸਲਰ ਡਾ.ਵੈਭਵ ਸ਼ਰਮਾ, ਕੌਂਸਲਰ ਅਸ਼ੋਕ ਸ਼ਰਮਾ, ਕੌਂਸਲਰ ਬੀਬੀ ਦੇ ਪਤੀ ਸੁਰਿੰਦਰ ਡਾਬਰ, ਕੌਂਸਲਰ ਦੇ ਪਤੀ ਰਾਜ ਕੁਮਾਰ ਵਿੱਕੀ, ਕੌਂਸਲਰ ਰਾਜ ਕੁਮਾਰ ਸੰਧੂ, ਕੌਂਸਲਰ ਪਰਮਜੀਤ ਭਾਰਤੀ, ਸੁਰਜੀਤ ਸਿੰਘ ਦੁਲ੍ਹੇ, ਸਤਿਨਾਮ ਸਿੰਘ ਬੇਗਮਪੁਰ, ਪਰਦੀਪ ਦੁਸਾਂਝ, ਮਤਵਿੰਦਰ ਸਿੰਘ ਸੱਚਦੇਵਾ ਬੰਟੀ, ਨੰਬਰਦਾਰ ਬਲਦੇਵ ਸਿੰਘ ਔਲਖ,ਕੌਂਸਲਰ ਬੀਬੀ ਦੇ ਪਤੀ ਕਾਮਰੇਡ ਜਰਨੈਲ ਤੋਂ ਇਲਾਵਾ ਦਾਣਾ ਮੰਡੀ ਦੇ ਵਪਾਰੀ ਵੀ ਹਾਜ਼ਰ ਸਨ।
