ਚੰਡੀਗੜ੍ਹ, 25 ਅਕਤੂਬਰ (ਨੀਲ ਭਲਿੰਦਰ ਸਿੰਘ): ਸੀਬੀਆਈ (ਕੇਂਦਰੀ ਜਾਂਚ ਬਿਊਰੋ) ਨੇ ਬਲਾਤਕਾਰ ਦੇ ਦੋਸ਼ਾਂ 'ਚ ਜੇਲੀ ਡੱਕੇ ਸੌਦਾ ਸਾਧ ਰਾਮ ਰਹੀਮ, ਡੇਰੇ ਦੇ ਕੁੱਝ ਤਤਕਾਲੀ ਡਾਕਟਰਾਂ ਅਤੇ ਕੁੱਝ ਹੋਰਨਾਂ ਡੇਰਾ ਪ੍ਰਬੰਧਕਾਂ ਵਿਰੁਧ ਲੱਗੇ ਸੈਂਕੜੇ ਸਾਧੂਆਂ ਨੂੰ ਜਬਰੀ ਨਿਪੁੰਸਕ ਬਣਾਉਣ ਦੇ ਦੋਸ਼ਾਂ ਦੀ ਜਾਂਚ ਤਹਿਤ ਅੱਜ ਹਾਈ ਕੋਰਟ ਨੂੰ ਅਪਣੀ ਜਾਂਚ ਬਾਬਤ ਹੁਣ ਤਕ ਦੀ ਦਸਵੀਂ ਲਿਫ਼ਾਫ਼ਾਬੰਦ ਸਟੇਟਸ ਰੀਪੋਰਟ ਸੌਂਪ ਦਿਤੀ ਹੈ। ਹਾਲਾਂਕਿ ਅੱਜ ਉਮੀਦ ਮੁਕੰਮਲ ਜਾਂਚ ਰੀਪੋਰਟ ਦੀ ਕੀਤੀ ਜਾ ਰਹੀ ਸੀ ਪਰ ਏਜੰਸੀ ਦੇ ਅੰਦਰੂਨੀ ਸੂਤਰਾਂ ਮੁਤਾਬਕ ਸੌਦਾ ਸਾਧ ਅਤੇ ਉਸ ਦੇ ਡੇਰੇ ਦਾ ਸਿਆਸੀ ਪ੍ਰਭਾਵ ਲਗਭਗ ਖ਼ਤਮ ਹੋ ਚੁਕਾ ਹੋਣ ਮਗਰੋਂ ਏਜੰਸੀ ਨੇ ਹੁਣ ਇਸ ਮਾਮਲੇ ਦੀ ਪੂਰੀ ਤਹਿ ਤਕ ਜਾਣ ਦਾ ਮਨ ਬਣਾ ਲਿਆ ਹੈ। ਸੀਬੀਆਈ ਵਲੋਂ ਅੱਜ ਪੇਸ਼ ਕੀਤੀ ਰੀਪੋਰਟ ਪੂਰੀ ਤਰ੍ਹਾਂ ਗੁਪਤ ਹੈ। ਭਰੋਸੇਯੋਗ ਸੂਤਰਾਂ ਦੇ ਹਵਾਲੇ ਨਾਲ ਮਿਲੀਆਂ ਕਨਸੋਆਂ ਮੁਤਾਬਕ ਪੰਚਕੂਲਾ ਹਿੰਸਾ ਦੌਰਾਨ ਸੌਦਾ ਸਾਧ ਦੇ ਫੜੇ ਗਏ ਕਰੀਬੀਆਂ ਖ਼ਾਸਕਰ ਨਿਜੀ ਮਰਦ ਸਟਾਫ ਦੇ ਕਈ ਜਣੇ ਨਿੰਪੁਸਕ ਪਾਏ ਗਏ ਹਨ।
'ਰੋਜ਼ਾਨਾ ਸਪੋਕਸਮੈਨ' ਵਲੋਂ ਦੋ ਹਫ਼ਤੇ ਪਹਿਲਾਂ ਹੀ ਇਹ ਪ੍ਰਗਟਾਵਾ ਕੀਤਾ ਜਾ ਚੁਕਾ ਹੈ ਕਿ ਪੰਚਕੂਲਾ ਹਿੰਸਾ ਮਾਮਲੇ 'ਚ ਫੜੇ ਗਏ ਕੁੱਝ ਅਹਿਮ ਡੇਰਾ ਪ੍ਰੇਮੀ ਖਾਸਕਰ ਸਾਧ ਦੇ ਰਸੋਈਏ ਧਰਮ ਸਿੰਘ, ਰਤਨ ਸਿੰਘ, ਰਾਕੇਸ਼ ਕੁਮਾਰ ਆਦਿ ਇਕ ਵਿਸ਼ੇਸ਼ ਵਿੰਗ (ਮਨ ਸੁਧਾਰ ਫ਼ੋਰਸ) ਨਾਲ ਸਬੰਧਤ ਹਨ ਅਤੇ ਉਨ੍ਹਾਂ ਨੂੰ ਨਿਪੁੰਸਕ ਬਣਾਇਆ ਜਾ ਚੁੱਕਾ ਹੈ। ਇਸ ਬਾਰੇ ਪੁਲਿਸ ਰੀਮਾਂਡ ਦੌਰਾਨ ਮੈਡੀਕਲ ਪੁਸ਼ਟੀ ਹੋ ਚੁਕੀ ਹੋਣ ਦੀ ਵੀ ਜਾਣਕਾਰੀ ਮਿਲੀ ਹੈ। 

ਇਸ ਸਬੰਧ ਵਿਚ ਮਹੀਨਾ ਕੁ ਪਹਿਲਾਂ ਸੀ.ਬੀ.ਆਈ. ਦੀ ਇਕ ਵਿਸ਼ੇਸ਼ ਟੀਮ ਨੇ ਸਿਰਸਾ ਦਾ ਉਚੇਚਾ ਦੌਰਾ ਵੀ ਕੀਤਾ ਹੈ ਅਤੇ ਕੁੱਝ ਗਵਾਹਾਂ ਨਾਲ ਮੁਲਾਕਾਤ ਕੀਤੀ ਹੈ। ਇਸ ਤੋਂ ਇਲਾਵਾ ਪਿਛਲੇ ਡੇਢ ਕੁ ਮਹੀਨੇ ਦੌਰਾਨ ਕਈ ਹੋਰ ਪੀੜਤ ਸਾਧੂ ਵੀ ਸਾਹਮਣੇ ਆਏ ਹਨ ਅਤੇ ਇਨ੍ਹਾਂ ਚੋਂ ਕਈਆਂ ਦੀਆਂ ਗਵਾਹੀਆਂ ਦਿੱਲੀ ਵਿਖੇ ਏਜੰਸੀ ਰੀਕਾਰਡ ਵੀ ਕਰ ਚੁਕੀ ਹੈ।
ਜਾਣਕਾਰੀ ਮੁਤਾਬਕ ਸੀਬੀਆਈ ਨੇ ਇਨ੍ਹਾਂ ਤੱਥਾਂ ਅਤੇ ਨਵੇਂ ਡਿਵੈਲਪਮੈਂਟ ਦੇ ਆਧਾਰ ਉਤੇ ਹੀ ਅੱਜ ਹਾਈ ਕੋਰਟ ਕੋਲੋਂ ਰਤਾ ਹੋਰ ਸਮਂੇ ਦੀ ਤਵੱਕੋਂ ਕੀਤੀ। ਇਸ ਸਬੰਧ ਵਿਚ ਏਜੰਸੀ ਵਲੋਂ ਸੁਨਾਰੀਆ ਜੇਲ ਅੰਦਰ ਸੌਦਾ ਸਾਧ ਕੋਲੋਂ ਵੀ  ਇਸ ਕੇਸ ਬਾਰੇ ਵੀ ਪੁੱਛਗਿਛ ਕੀਤੀ ਜਾ ਚੁਕੀ ਹੈ। ਜਾਣਕਾਰੀ ਮਿਲੀ ਹੈ ਕਿ ਡੇਰੇ ਅੰਦਰ ਵਰਤੇ ਜਾਂਦੇ ਕਈ ਅਹਿਮ ਕੋਡ-ਵਰਡ ਵੀ ਸਾਹਮਣੇ ਆਏ ਹਨ ਜਿਨ੍ਹਾਂ ਤਹਿਤ ਜਿਹੜੇ ਮਰਦ ਪੈਰੋਕਾਰਾਂ ਨੂੰ ਨਿਪੁੰਸਕ ਬਣਾ ਦਿਤਾ ਜਾਂਦਾ ਸੀ ਉਨ੍ਹਾਂ ਲਈ ਸੰਕੇਤਕ ਸ਼ਬਦ 'ਐਸ.ਬੀ.ਐਸ' ਵਰਤਿਆ ਜਾਂਦਾ ਰਿਹਾ ਹੈ ਜਿਸ ਦੀ ਫੁੱਲ ਫ਼ਾਰਮ 'ਸਤ ਬ੍ਰਹਮਚਾਰੀ ਸੇਵਾਦਾਰ' ਦਸਿਆ ਜਾ ਰਿਹਾ ਹੈ। ਸੂਤਰਾਂ ਮੁਤਾਬਕ ਇਨ੍ਹਾਂ ਨੂੰ ਸੌਦਾ ਸਾਧ ਦੀ ਆਗਿਆ ਤੋਂ ਬਿਨਾਂ ਕੁੱਝ ਵੀ ਕਰ ਸਕਣ ਦੀ ਇਜਾਜ਼ਤ ਨਹੀਂ ਸੀ ਅਤੇ ਇਨ੍ਹਾਂ 'ਤੇ ਨਿਗਰਾਨੀ ਲਈ ਇਕ ਵਿਸ਼ੇਸ਼ ਦਸਤੇ ਦਾ ਗਠਨ ਕਰ ਉਸ ਨੂੰ ਐਮ.ਐਸ.ਐਸ (ਮਨ ਸੁਧਾਰ ਫ਼ੋਰਸ) ਦਾ ਨਾਮ ਦਿਤਾ ਗਿਆ।