ਫ਼ਤਿਹਗੜ੍ਹ ਸਾਹਿਬ, 19 ਫ਼ਰਵਰੀ (ਸੁਰਜੀਤ ਸਿੰਘ ਸਾਹੀ): ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਪ੍ਰਧਾਨ ਸਿਮਰਨਜੀਤ ਸਿੰਘ ਮਾਨ ਨੇ ਕਿਹਾ ਕਿ ਜੋ ਪੰਜਾਬ ਨੈਸ਼ਨਲ ਬੈਂਕ ਨਾਲ ਨੀਰਵ ਮੋਦੀ ਵਰਗੇ ਹੀਰਿਆਂ ਦੇ ਵੱਡੇ ਵਪਾਰੀ ਨੇ 13,000 ਕਰੋੜ ਰੁਪਏ ਤੋਂ ਲੈ ਕੇ 20,000 ਕਰੋੜ ਰੁਪਏ ਤਕ ਵੱਡਾ ਘਪਲਾ ਕਰ ਕੇ ਧੋਖਾ ਕੀਤਾ ਹੈ, ਉਸ ਵਿਚ ਦੇਸ਼ ਉਤੇ ਰਾਜ ਕਰਨ ਵਾਲੀਆਂ ਦੋਵੇਂ ਕਾਂਗਰਸ ਤੇ ਬੀਜੇਪੀ ਦੀਆਂ ਜਮਾਤਾਂ ਬਰਾਬਰ ਦੀਆਂ ਦੋਸ਼ੀ ਹਨ ਕਿਉਂਕਿ ਜਦੋਂ ਕਾਂਗਰਸ ਦੀ ਹਕੂਮਤ ਹੁੰਦੀ ਹੈ ਤਾਂ ਕਾਂਗਰਸ ਅਜਿਹੇ ਵੱਡੇ ਧਨਾਢਾਂ ਤੇ ਧੋਖੇਬਾਜ਼ਾਂ ਦੀ ਪੈਰਵੀ ਕਰਦੀ ਹੈ ਅਤੇ ਬੀਜੇਪੀ ਦੀ ਹਕੂਮਤ ਆਉਣ 'ਤੇ ਅਜਿਹਿਆਂ ਵਿਰੁਧ ਕੋਈ ਕਾਰਵਾਈ ਨਹੀਂ ਕੀਤੀ ਜਾਂਦੀ।
ਜਿਸ ਤੋਂ ਸਪੱਸਟ ਹੈ ਕਿ ਅਜਿਹੇ ਵੱਡੇ ਧਨਾਢਾਂ ਤੇ ਘਪਲੇਬਾਜ਼ਾਂ ਦੀ ਸਰਪ੍ਰਸਤੀ ਕਾਂਗਰਸ ਤੇ ਬੀਜੇਪੀ ਦੀਆਂ ਜਮਾਤਾਂ ਕਰਦੀਆ ਆ ਰਹੀਆ ਹਨ। ਉਨ੍ਹਾਂ ਕਿਹਾ ਕਿ ਨਰਿੰਦਰ ਮੋਦੀ ਨੇ ਇਥੋਂ ਦੇ ਵੱਡੇ-ਵੱਡੇ ਉਦਯੋਗਪਤੀਆਂ ਦੇ 75,000 ਹਜ਼ਾਰ ਕਰੋੜ ਰੁਪਏ ਦੇ ਕਰਜਿਆ ਤੇ ਤਾਂ ਲੀਕ ਮਾਰ ਦਿਤੀ ਜਦਕਿ ਇਨ੍ਹਾਂ ਉਦਯੋਗਪਤੀਆਂ ਕੋਲ ਕਰੋੜਾਂ-ਅਰਬਾਂ ਰੁਪਏ ਦੇ ਦੋ ਨੰਬਰ ਦੇ ਖ਼ਜ਼ਾਨੇ ਵੀ ਹਨ । ਦੂਜੇ ਪਾਸੇ ਜੋ ਕਿਸਾਨ ਤੇ ਖੇਤ-ਮਜ਼ਦੂਰ, ਸੈਂਟਰ ਤੇ ਸੂਬਿਆਂ ਦੀਆਂ ਖੇਤੀ ਨਾਲ ਸਬੰਧਤ ਦੋਸ਼ ਪੂਰਨ ਨੀਤੀਆਂ ਦੀ ਬਦੌਲਤ ਕਰਜ਼ੇ ਥੱਲੇ ਦੱਬੇ ਹੋਏ ਹਨ ਅਤੇ ਖ਼ੁਦਕਸ਼ੀਆਂ ਕਰਨ ਲਈ ਮਜ਼ਬੂਰ ਹੋ ਰਹੇ ਹਨ।
