ਬਠਿੰਡਾ, 5 ਜਨਵਰੀ (ਸੁਖਜਿੰਦਰ ਮਾਨ) : ਥਰਮਲ ਬੰਦ ਕਰਨ ਵਿਰੁਧ ਕੱਚੇ ਕਾਮਿਆਂ ਨੇ ਅੱਜ ਮਿੰਨੀ ਸਕੱਤਰੇਤ ਤੋਂ ਹੱਥਾਂ ਵਿਚ ਖਾਲੀ ਬਰਤਨ ਲੈ ਕੇ ਵਿਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਦੇ ਦਫ਼ਤਰ ਤਕ ਰੋਸ ਮਾਰਚ ਕੀਤਾ। ਇਸ ਤੋਂ ਇਲਾਵਾ ਸੰਘਰਸ਼ ਵਿਚ ਡਟ ਕੇ ਸਾਥ ਦੇ ਰਹੇ ਕੱਚੇ ਕਾਮਿਆਂ ਦੇ ਬੱਚਿਆਂ ਨੇ ਵੀ ਸ. ਬਾਦਲ ਦੇ ਦਫ਼ਤਰ ਅੱਗੇ ਭਾਂਡੇ ਖ਼ੜਕਾ ਕੇ ਅਪਣੇ ਮਾਪਿਆਂ ਦੇ ਚੁੱਲ੍ਹੇ ਭਖਦੇ ਰੱਖਣ ਲਈ ਸਰਕਾਰ ਦੇ ਕੰਨਾਂ ਤਕ ਆਵਾਜ਼ ਪਹੁੰਚਾਉਣ ਦਾ ਯਤਨ ਕੀਤਾ। ਪੰਜਾਬ ਸਰਕਾਰ ਦੇ ਬਠਿੰਡਾ ਥਰਮਲ ਦੇ ਚਾਰੇ ਯੂਨਿਟ ਅਤੇ ਰੋਪੜ ਥਰਮਲ ਦੇ ਦੋ ਯੂਨਿਟ ਮੁਕੰਮਲ ਰੂਪ 'ਚ ਬੰਦ ਕਰਨ ਦੇ ਫ਼ੈਸਲੇ ਨੂੰ ਰੱਦ ਕਰਵਾਉਣ ਲਈ ਕੱਚੇ ਕਾਮਿਆਂ ਵਲੋਂ ਪਿਛਲੇ ਪੰਜ ਦਿਨਾਂ ਤੋਂ ਕੀਤੇ ਜਾ ਰਹੇ ਸੰਘਰਸ਼ ਦੀ ਕੜੀ ਤਹਿਤ ਠੇਕਾ ਮੁਲਾਜ਼ਮਾਂ ਦਾ ਪੱਕਾ ਮੋਰਚਾ ਅੱਜ ਪੰਜਵੇਂ ਦਿੱਨ ਵੀ ਜਾਰੀ ਰਿਹਾ।
ਬਠਿੰਡਾ ਸਕੱਤਰੇਤ ਮੂਹਰੇ ਟੈਂਟ ਤੇ ਲੰਗਰ ਲਗਾ ਕੇ ਬੱਚਿਆਂ ਸਮੇਤ ਬੈਠੇ ਥਰਮਲ ਦੇ ਠੇਕਾ ਕਾਮਿਆਂ ਦੀ ਜਥੇਬੰਦੀ ਦੇ ਕਨਵੀਨਰ ਰਾਜਿੰਦਰ ਸਿੰਘ ਢਿੱਲੋਂ ਨੇ ਧਰਨੇ ਦੇ ਪੰਜ ਦਿਨ ਬੀਤਣ ਦੇ ਬਾਵਜੂਦ ਪ੍ਰਸ਼ਾਸਨ ਦੇ ਕਿਸੇ ਵੀ ਅਧਿਕਾਰੀ ਜਾਂ ਸਰਕਾਰ ਦੇ ਕਿਸੇ ਵੀ ਮੰਤਰੀ ਨੇ ਮੋਰਚੇ ਵਿਚ ਆ ਕੇ ਸੰਘਰਸ਼ ਕਰ ਰਹੇ ਠੇਕਾ ਮੁਲਾਜ਼ਮਾਂ ਦੀ ਸਾਰ ਤਕ ਨਹੀਂ ਲਈ। ਜਿਸ ਤੋਂ ਮਹਿਸੂਸ ਹੁੰਦਾ ਹੈ ਕਿ ਸਰਕਾਰ ਥਰਮਲ ਕਾਮਿਆਂ ਦਾ ਸਬਰ ਪਰਖ ਰਹੀ ਹੈ ਪ੍ਰੰਤੂ ਮੋਰਚੇ ਵਿਚ ਬੈਠੇ ਸੰਘਰਸ਼ਸ਼ੀਲ ਕਾਮਿਆਂ ਦੇ ਹੌਂਸਲੇ ਬੁਲੰਦ ਹਨ।
