ਸਿਡਨੀ ਦੇ ਗਲੇਨਵੁੱਡ ਦੇ ਇਕ ਗੁਰਦੁਆਰੇ ਦੀ ਨਵੀਂ ਰਸੋਈ ਦਾ ਉਦਘਾਟਨ ਵੀ ਕੀਤਾ
ਕੈਨਬਰਾ : ਆਸਟਰੇਲੀਆ ਦੇ ਪ੍ਰਧਾਨ ਮੰਤਰੀ ਐਂਥਨੀ ਅਲਬਾਨੀਜ਼ ਨੇ ਸ਼ੁਕਰਵਾਰ ਨੂੰ ਦੀਵਾਲੀ ਦੇ ਮੌਕੇ ’ਤੇ ਇਕ ਮੰਦਰ ’ਚ ਦਰਸ਼ਨ ਕੀਤੇ ਅਤੇ ਬੰਦੀ ਛੋੜ ਦਿਵਸ ਦੇ ਮੌਕੇ ’ਤੇ ਇਕ ਗੁਰਦੁਆਰੇ ’ਚ ਮੱਥਾ ਟੇਕਿਆ। 61 ਸਾਲ ਦੇ ਅਲਬਾਨੀਜ਼ ਨੇ ‘ਐਕਸ’ ’ਤੇ ਅਪਣੀਆਂ ਤਸਵੀਰਾਂ ਵੀ ਸਾਂਝੀਆਂ ਕੀਤੀਆਂ ਹਨ, ਜਿਸ ’ਚ ਉਹ ਸਿਡਨੀ ਦੇ ਗਲੇਨਵੁੱਡ ਦੇ ਇਕ ਗੁਰਦੁਆਰੇ ’ਚ ਸੰਤਰੀ ਰੰਗ ਦੀ ਪੱਗ ਬੰਨ੍ਹੇ ਨਜ਼ਰ ਆ ਰਹੇ ਹਨ। ਉਨ੍ਹਾਂ ਇਸ ਮੌਕੇ ਗੁਰਦੁਆਰੇ ਦੀ ਨਵੀਂ ਰਸੋਈ ਦਾ ਉਦਘਾਟਨ ਵੀ ਕੀਤਾ।
ਉਨ੍ਹਾਂ ਨੇ ‘ਐਕਸ’ ’ਤੇ ਲਿਖਿਆ, ‘‘ਬੰਦੀ ਛੋੜ ਦਿਵਸ ਮੁਬਾਰਕ। ਅੱਜ ਇੱਥੇ ਗੁਰਦੁਆਰਾ ਸਾਹਿਬ ਗਲੇਨਵੁੱਡ ਵਿਖੇ ਆ ਕੇ ਨਵੀਂ ਰਸੋਈ ਦਾ ਉਦਘਾਟਨ ਕਰਨਾ ਬਹੁਤ ਵਧੀਆ ਸੀ।’’ ਤਸਵੀਰਾਂ ’ਚ ਆਸਟਰੇਲੀਆ ਦੇ ਪ੍ਰਧਾਨ ਮੰਤਰੀ ਨੂੰ ਸਿੱਖ ਭਾਈਚਾਰੇ ਦੇ ਮੈਂਬਰਾਂ ਨਾਲ ਮੁਸਕਰਾਉਂਦੇ ਅਤੇ ਸ਼ਰਧਾਲੂਆਂ ਨਾਲ ਸੈਲਫੀ ਲੈਂਦੇ ਹੋਏ ਵੀ ਵੇਖਿਆ ਜਾ ਸਕਦਾ ਹੈ। ਅਲਬਾਨੀਜ਼ ਨੇ ਸਿਡਨੀ ਦੇ ਮੁਰੂਗਨ ਮੰਦਰ ਜਾ ਕੇ ਤਾਮਿਲ ਆਸਟ੍ਰੇਲੀਆਈ ਭਾਈਚਾਰੇ ਦੇ ਮੈਂਬਰਾਂ ਨਾਲ ਦੀਵਾਲੀ ਮਨਾਈ।
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਦੀਵਾਲੀ ਹਨੇਰੇ ’ਤੇ ਚਾਨਣ ਦੀ ਜਿੱਤ ਦਾ ਜਸ਼ਨ ਮਨਾਉਂਦੀ ਹੈ। ਅੱਜ ਸਿਡਨੀ ਦੇ ਮੁਰੂਗਨ ਮੰਦਰ ’ਚ ਤਾਮਿਲ ਆਸਟਰੇਲੀਆਈ ਭਾਈਚਾਰੇ ਨਾਲ ਤਿਉਹਾਰ ਮਨਾਉਣਾ ਖੁਸ਼ੀ ਦੀ ਗੱਲ ਸੀ। ਇਹ ਮੰਦਰ ਰੋਜ਼ਾਨਾ ਹਰ ਖੇਤਰ ਦੇ ਲੋਕਾਂ ਵਲੋਂ ਆਉਂਦਾ ਹੈ ਅਤੇ ਪਛਮੀ ਸਿਡਨੀ ਦੇ ਦਖਣੀ ਏਸ਼ੀਆਈ ਹਿੰਦੂ ਭਾਈਚਾਰੇ ਦਾ ਕੇਂਦਰ ਬਣ ਗਿਆ ਹੈ। ਇਸ ਤੋਂ ਪਹਿਲਾਂ ਆਸਟਰੇਲੀਆ ਦੇ ਪ੍ਰਧਾਨ ਮੰਤਰੀ ਨੇ ਰੌਸ਼ਨੀ ਦਾ ਤਿਉਹਾਰ ਮਨਾਉਣ ਵਾਲੇ ਸਾਰੇ ਲੋਕਾਂ ਨੂੰ ਵਧਾਈ ਦਿਤੀ ।
