ਫ਼ੜੇ ਗਏ ਭਾਰਤੀਆਂ ਬਾਰੇ ਹੋਰ ਵੇਰਵਿਆਂ ਦੀ ਉਡੀਕ
ਜੇਨੇਵਾ: ਹਾਈਵੇਅ ਟ੍ਰੈਫ਼ਿਕ ਚੈਕਿੰਗ ਦੌਰਾਨ ਸਵਿਸ ਪੁਲਿਸ ਨੂੰ ਇੱਕ ਡਿਲੀਵਰੀ ਵੈਨ ਰਾਹੀਂ ਲਿਜਾਏ ਜਾ ਰਹੇ 23 ਪਰਵਾਸੀ ਮਿਲੇ, ਜਿਨ੍ਹਾਂ ਵਿੱਚੋਂ ਕਈ ਭਾਰਤੀ ਵੀ ਸ਼ਾਮਲ ਹਨ। ਪੁਲਿਸ ਨੇ ਦੱਸਿਆ ਹੈ ਕਿ ਫ਼ੜੇ ਗਏ ਪਰਵਾਸੀਆਂ ਦੀ ਉਮਰ 20 ਤੋਂ 50 ਸਾਲ ਦੇ ਵਿਚਕਾਰ ਹੈ, ਅਤੇ ਉਹ ਅਫ਼ਗ਼ਾਨਿਸਤਾਨ, ਭਾਰਤ, ਸੀਰੀਆ ਅਤੇ ਬੰਗਲਾਦੇਸ਼ ਨਾਲ ਸੰਬੰਧ ਰੱਖਦੇ ਹਨ। ਨਿਡਵਾਲਡਨ ਕੈਂਟਨ ਦੀ ਪੁਲਿਸ ਨੇ ਕਿਹਾ ਕਿ ਇੱਕ ਇਤਾਲਵੀ ਰਜਿਸਟਰੇਸ਼ਨ ਨੰਬਰ ਵਾਲੀ ਗੱਡੀ ਨੂੰ ਕੇਂਦਰੀ ਸ਼ਹਿਰ ਲੂਸਰਨ ਦੇ ਨੇੜੇ, ਬਾਓਚਸ ਵਿੱਚ ਏ2 ਹਾਈਵੇਅ 'ਤੇ ਉੱਤਰ ਵੱਲ੍ਹ ਮੁੜਦੇ ਸਮੇਂ ਰੋਕਿਆ ਗਿਆ।
ਜਾਂਚ ਦੌਰਾਨ ਅਧਿਕਾਰੀਆਂ ਨੇ ਦੇਖਿਆ ਕਿ ਡਿਲੀਵਰੀ ਵੈਨ ਦੀ ਸਮਾਨ ਰੱਖਣ ਵਾਲੀ ਸਾਰੀ ਥਾਂ ਪਰਵਾਸੀਆਂ ਨਾਲ ਭਰੀ ਹੋਈ ਸੀ ਅਤੇ ਇੱਥੇ ਕੋਈ ਖਿੜਕੀ ਵੀ ਨਹੀਂ ਸੀ। ਪੁਲਿਸ ਮੁਤਾਬਿਕ ਪਰਵਾਸੀ ਖੜ੍ਹੇ ਹੋ ਕੇ ਸਫ਼ਰ ਕਰ ਰਹੇ ਸਨ। ਵੈਨ ਦੇ ਦਰਵਾਜ਼ੇ ਬੰਦ ਸਨ ਅਤੇ ਇਹ ਕਈ ਘੰਟਿਆਂ ਤੱਕ ਬਿਨਾਂ ਰੁਕੇ ਲਗਾਤਾਰ ਚੱਲ ਰਹੀ ਸੀ।
ਪੁਲਿਸ ਵੱਲੋਂ ਦੱਸੇ ਅਨੁਸਾਰ ਇਹ ਪਰਵਾਸੀ ਸਵਿਟਜ਼ਰਲੈਂਡ ਤੋਂ ਬਾਹਰ ਯੂਰਪੀ ਦੇਸ਼ਾਂ ਦੀ ਯਾਤਰਾ ਕਰਨਾ ਚਾਹੁੰਦੇ ਸਨ। ਵੈਨ ਦਾ ਡਰਾਈਵਰ 27 ਸਾਲਾ ਗਾਂਬੀਆ ਦਾ ਇੱਕ ਨੌਜਵਾਨ ਹੈ ਜੋ ਇਟਲੀ ਵਿੱਚ ਰਹਿੰਦਾ ਹੈ। ਪੁਲਿਸ ਨੇ ਡਰਾਈਵਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ ਅਤੇ ਮਨੁੱਖੀ ਤਸਕਰੀ ਦੇ ਮਾਮਲੇ ਵਿੱਚ ਉਸ ਖ਼ਿਲਾਫ਼ ਜਾਂਚ ਕੀਤੀ ਜਾ ਰਹੀ ਹੈ।