ਵੈਸਟਇੰਡੀਜ਼ ਦੀ ਅੱਧੀ ਟੀਮ 97 ਦੌੜਾਂ 'ਤੇ ਪੈਵੇਲੀਅਨ ਪਹੁੰਚ ਚੁੱਕੀ ਸੀ
T20 World Cup 2024: ਦੋ ਵਾਰ ਦੀ ਚੈਂਪੀਅਨ ਵੈਸਟਇੰਡੀਜ਼ ਨੂੰ ਐਤਵਾਰ ਨੂੰ ਇਥੇ ਟੀ-20 ਵਿਸ਼ਵ ਕੱਪ ਦੇ ਮੈਚ ਵਿਚ ਪਾਪੂਆ ਨਿਊ ਗਿਨੀ (ਪੀਐਨਜੀ) ਨੂੰ ਪੰਜ ਵਿਕਟਾਂ ਨਾਲ ਹਰਾਉਣ ਲਈ ਕਾਫੀ ਸੰਘਰਸ਼ ਕਰਨਾ ਪਿਆ। ਅਪਣਾ ਦੂਜਾ ਟੀ-20 ਵਿਸ਼ਵ ਕੱਪ ਖੇਡ ਰਹੀ ਪਾਪੂਆ ਨਿਊ ਗਿਨੀ ਨੇ ਮਜ਼ਬੂਤ ਖਿਡਾਰੀਆਂ ਨਾਲ ਭਰੀ ਵੈਸਟਇੰਡੀਜ਼ ਨੂੰ ਦਬਾਅ 'ਚ ਪਾ ਕੇ ਚੰਗਾ ਪ੍ਰਦਰਸ਼ਨ ਕੀਤਾ ਅਤੇ ਅਜਿਹਾ ਲੱਗ ਰਿਹਾ ਸੀ ਕਿ ਟੂਰਨਾਮੈਂਟ ਦੀ ਸ਼ੁਰੂਆਤ 'ਚ ਉਲਟਫੇਰ ਦੇਖਣ ਨੂੰ ਨਾ ਮਿਲ ਜਾਵੇ ਪਰ ਰੋਸਟਨ ਚੇਜ਼ (ਅਜੇਤੂ 42) ਅਤੇ ਆਂਦਰੇ ਰਸਲ (ਅਜੇਤੂ 15) ਨੇ ਮਿਲ ਕੇ ਛੇਵੇਂ ਵਿਕਟ ਲਈ 18 ਗੇਂਦਾਂ ਵਿਚ 40 ਦੌੜਾਂ ਦੀ ਅਟੁੱਟ ਸਾਂਝੇਦਾਰੀ ਕਰਕੇ ਵੈਸਟਇੰਡੀਜ਼ ਨੂੰ ਜਿੱਤ ਦਿਵਾਈ।
ਵੈਸਟਇੰਡੀਜ਼ ਦੀ ਅੱਧੀ ਟੀਮ 97 ਦੌੜਾਂ 'ਤੇ ਪੈਵੇਲੀਅਨ ਪਹੁੰਚ ਚੁੱਕੀ ਸੀ ਪਰ ਚੇਜ਼ ਅਤੇ ਰਸਲ ਨੇ ਤਿੰਨ ਛੱਕੇ ਅਤੇ ਚਾਰ ਚੌਕੇ ਜੜਨ ਨਾਲ ਟੀਮ ਨੇ 19 ਓਵਰਾਂ 'ਚ ਪੰਜ ਵਿਕਟਾਂ 'ਤੇ 137 ਦੌੜਾਂ ਬਣਾ ਕੇ ਮੁਹਿੰਮ ਦੀ ਸ਼ੁਰੂਆਤ ਜਿੱਤ ਨਾਲ ਕੀਤੀ। ਪੀਐਨਜੀ ਦੇ ਕਪਤਾਨ ਅਸਦ ਵਾਲਾ ਨੇ ਦੋ ਵਿਕਟਾਂ ਲਈਆਂ। ਇਸ ਤੋਂ ਪਹਿਲਾਂ ਬੱਲੇਬਾਜ਼ੀ ਦਾ ਸੱਦਾ ਮਿਲਣ ਮਗਰੋਂ ਪੀਐਨਜੀ ਨੇ ਮੱਧਕ੍ਰਮ ਦੇ ਬੱਲੇਬਾਜ਼ ਸੇਸੇ ਬਾਊ (50 ਦੌੜਾਂ) ਦੇ ਅਰਧ ਸੈਂਕੜੇ ਦੀ ਮਦਦ ਨਾਲ ਅੱਠ ਵਿਕਟਾਂ ’ਤੇ 136 ਦੌੜਾਂ ਬਣਾਈਆਂ।
ਵੈਸਟਇੰਡੀਜ਼ ਲਈ ਚੰਗੀ ਸ਼ੁਰੂਆਤ ਕਰਨ ਵਾਲੇ ਬ੍ਰੈਂਡਨ ਕਿੰਗ (34 ਦੌੜਾਂ) ਨੇ ਪਹਿਲੇ ਹੀ ਓਵਰ 'ਚ ਸਿੱਧੇ ਅਤੇ ਸਕਵੇਅਰ ਲੈੱਗ 'ਤੇ ਦੋ ਚੌਕੇ ਲਗਾਏ ਪਰ ਜੌਹਨਸਨ ਚਾਰਲਸ ਬਿਨਾਂ ਖਾਤਾ ਖੋਲ੍ਹੇ ਦੂਜੇ ਓਵਰ ਵਿਚ ਅਲੇਈ ਨਾਓ ਦੀ ਗੇਂਦ ’ਤੇ ਐਲਬੀਡਬਲਿਊ ਆਊਟ ਹੋ ਗਏ। ਇਸ ਓਵਰ ਦੇ ਵਿਚਕਾਰ ਮੀਂਹ ਆ ਗਿਆ ਅਤੇ 20 ਮਿੰਟ ਦੀ ਦੇਰੀ ਤੋਂ ਬਾਅਦ ਓਵਰ ਪੂਰਾ ਹੋਇਆ।
ਕਿੰਗ ਨੇ ਤੀਜੇ ਓਵਰ ਦੀ ਪਹਿਲੀ ਗੇਂਦ 'ਤੇ ਕਬੂਆ ਮੋਰੀਆ ਨੂੰ ਕਵਰ ਅਤੇ ਮਿਡ-ਆਫ 'ਤੇ ਚੌਕਾ ਲਗਾਉਣ ਤੋਂ ਬਾਅਦ ਇਕ ਹੋਰ ਚਾਰ ਓਵਰ ਪੁਆਇੰਟ ਮਾਰਿਆ। ਕਿੰਗ ਨੇ ਚੌਥੇ ਓਵਰ ਦੇ ਅੰਤ 'ਤੇ ਨਾਓ 'ਤੇ ਲਗਾਤਾਰ ਚੌਕੇ ਲਗਾਏ। ਨਿਕੋਲਸ ਪੂਰਨ (27 ਦੌੜਾਂ) ਨੇ ਛੇਵੇਂ ਓਵਰ ਵਿਚ ਸੇਸੇ ਬਾਊ ਦੀ ਪਹਿਲੀ ਗੇਂਦ 'ਤੇ ਛੱਕਾ ਲਗਾ ਕੇ ਇਸ ਓਵਰ ਵਿਚ 18 ਦੌੜਾਂ ਜੋੜੀਆਂ, ਦੂਜੀ ਗੇਂਦ 'ਤੇ ਗੇਂਦਬਾਜ਼ ਦੇ ਸਿਰ 'ਤੇ ਚੌਕਾ ਅਤੇ ਅਗਲੀ ਗੇਂਦ 'ਤੇ ਇਕ ਛੱਕਾ ਲਗਾਇਆ।
