ਕੈਨੇਡਾ 'ਚ ਰਹਿ ਰਹੇ ਹਾਕੀ ਖਿਡਾਰੀ 'ਪਨੇਸਰ ਭਰਾ' ਪੰਜਾਬੀਆਂ ਦੀ ਬੱਲੇ-ਬੱਲੇ ਕਰਵਾਉਣ ਲਈ ਖੇਡ ਮੈਦਾਨ 'ਚ ਉਤਰਨ ਜਾ ਰਹੇ ਹਨ।
ਬ੍ਰਿਟਿਸ਼ ਕੋਲੰਬੀਆ: ਕੈਨੇਡਾ 'ਚ ਰਹਿ ਰਹੇ ਹਾਕੀ ਖਿਡਾਰੀ 'ਪਨੇਸਰ ਭਰਾ' (ਬਲਰਾਜ ਪਨੇਸਰ ਅਤੇ ਸੁਖਪਾਲ ਪਨੇਸਰ) ਪੰਜਾਬੀਆਂ ਦੀ ਬੱਲੇ-ਬੱਲੇ ਕਰਵਾਉਣ ਲਈ ਖੇਡ ਮੈਦਾਨ 'ਚ ਉਤਰਨ ਜਾ ਰਹੇ ਹਨ। ਆਸਟਰੇਲੀਆ ਦੇ ਸ਼ਹਿਰ ਗੋਲਡ ਕੋਸਟ 'ਚ ਹੋ ਰਹੀਆਂ ਕਾਮਨਵੈੱਲਥ ਗੇਮਜ਼ (ਰਾਸ਼ਟਰਮੰਡਲ ਖੇਡਾਂ) 'ਚ ਕੈਨੇਡੀਅਨ-ਪੰਜਾਬੀ ਹਾਕੀ ਖਿਡਾਰੀ ਪਨੇਸਰ ਭਰਾ ਅਪਣੇ ਪਿਤਾ ਬਲਬੀਰ ਪਨੇਸਰ ਦੇ ਸੁਪਨਿਆਂ ਨੂੰ ਪੂਰਾ ਕਰਨ ਜਾ ਰਹੇ ਹਨ। ਦਸ ਦਈਏ ਕਿ ਆਸਟਰੇਲੀਆ 'ਚ 4 ਅਪ੍ਰੈਲ ਤੋਂ 15 ਅਪ੍ਰੈਲ ਤਕ ਖੇਡਾਂ ਹੋ ਰਹੀਆਂ ਹਨ ਅਤੇ ਇਸ 'ਚ ਬਹੁਤ ਸਾਰੇ ਦੇਸ਼ਾਂ ਨੇ ਹਿੱਸਾ ਲਿਆ ਹੈ।
ਘਰੇਲੂ ਮਜ਼ਬੂਰੀ ਕਾਰਨ ਬਲਬੀਰ ਦਾ ਸੁਪਨਾ ਰਿਹਾ ਅਧੂਰਾ
ਬਲਰਾਜ ਪਨੇਸਰ ਅਤੇ ਸੁਖਪਾਲ ਪਨੇਸਰ ਦੇ ਪਿਤਾ ਬਲਬੀਰ ਸਿੰਘ ਨੇ ਦਸਿਆ ਕਿ ਉਹ ਹਾਕੀ ਖੇਡਣ ਦੇ ਬਹੁਤ ਸ਼ੌਕੀਨ ਸਨ ਪਰ ਘਰੇਲੂ ਕੰਮਾਂ ਕਾਰਨ ਉਨ੍ਹਾਂ ਦਾ ਇਹ ਸ਼ੌਂਕ ਅਧੂਰਾ ਹੀ ਰਹਿ ਗਿਆ। ਬਲਬੀਰ ਪਨੇਸਰ ਨੇ ਦਸਿਆ ਕਿ ਉਹ ਪੰਜਾਬ 'ਚ ਜ਼ਿਲ੍ਹਾ ਲੁਧਿਆਣਾ ਦੇ ਪਿੰਡ ਚਚਰਾਲੀ ਦੇ ਰਹਿਣ ਵਾਲੇ ਹਨ। ਬਚਪਨ ਤੋਂ ਹੀ ਉਹ ਹਾਕੀ ਖੇਡਣ ਦੇ ਸ਼ੌਕੀਨ ਰਹੇ ਹਨ। ਬਲਬੀਰ ਦੇ ਪਿਤਾ ਵਰਿਆਮ ਸਿੰਘ ਪੰਜਾਬ ਤੋਂ ਕੈਨੇਡਾ ਚਲੇ ਗਏ ਸਨ ਅਤੇ 1976 'ਚ 14 ਸਾਲ ਦੀ ਉਮਰ 'ਚ ਬਲਬੀਰ ਵੀ ਕੈਨੇਡਾ ਚਲੇ ਗਏ। ਬਲਬੀਰ ਚਾਹੁੰਦੇ ਸਨ ਕਿ ਉਹ ਖੇਡਾਂ 'ਚ ਅਪਣਾ ਭਵਿੱਖ ਬਣਾਉਣ ਪਰ ਘਰ ਦੀ ਮਜ਼ਬੂਰੀ ਕਾਰਨ ਉਹ ਵੀ ਪਿਤਾ ਦੇ ਨਾਲ ਹੀ ਕੰਮ ਕਰਨ ਲੱਗ ਗਏ। ਬਲਬੀਰ ਦਾ ਇਹ ਸੁਪਨਾ 40 ਸਾਲਾਂ ਬਾਅਦ ਪੂਰਾ ਹੋਣ ਜਾ ਰਿਹਾ ਹੈ ਕਿਉਂਕਿ ਉਨ੍ਹਾਂ ਦੇ ਪੁੱਤ ਵੀ ਹਾਕੀ ਖਿਡਾਰੀ ਹਨ।
ਪਹਿਲਾਂ ਵੀ ਖੇਡ ਚੁੱਕੇ ਹਨ ਕਈ ਮੈਚ
ਬਲਬੀਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਸੁਪਨਿਆਂ ਨੂੰ ਉਨ੍ਹਾਂ ਦੇ ਪੁੱਤ ਸੱਚ ਕਰ ਰਹੇ ਹਨ, ਇਸ ਤੋਂ ਵਧੇਰੇ ਉਨ੍ਹਾਂ ਲਈ ਕੁੱਝ ਵੀ ਨਹੀਂ ਹੈ। ਬਲਬੀਰ ਪਨੇਸਰ ਦਾ ਵੱਡਾ ਪੁੱਤਰ ਸੁਖਪਾਲ (27) ਕੈਨੇਡੀਅਨ ਹਾਕੀ ਖੇਡ 'ਚ ਚੰਗਾ ਨਾਮਣਾ ਖੱਟ ਚੁੱਕਾ ਹੈ। ਉਸ ਨੂੰ ਸੁੱਖੀ ਦੇ ਨਾਂ ਤੋਂ ਵੀ ਜਾਣਿਆ ਜਾਂਦਾ ਹੈ। ਸੁਖਪਾਲ ਨੇ 2010 'ਚ ਸੀਨੀਅਰ ਇੰਟਰਨੈਸ਼ਨਲ ਡੈਬੁਊਟ ਮੈਚ 'ਚ ਹਿੱਸਾ ਲਿਆ ਅਤੇ ਹੁਣ ਤਕ ਉਹ 100 ਤੋਂ ਵਧੇਰੇ ਮੈਚ ਖੇਡ ਚੁੱਕਾ ਹੈ। ਉਸ ਨੇ 2014 'ਚ ਗਲਾਸ ਗੋਅ ਕਾਮਨਵੈੱਲਥ ਖੇਡਾਂ ਅਤੇ 2016 'ਚ ਰੀਓ ਉਲੰਪਿਕ 'ਚ ਹਿੱਸਾ ਲਿਆ ਸੀ। ਉਥੇ ਹੀ 25 ਸਾਲਾ ਬਲਰਾਜ ਪਨੇਸਰ ਹੁਣ ਤਕ 27 ਮੈਚ ਖੇਡ ਚੁੱਕਾ ਹੈ ਅਤੇ ਉਹ 2014 'ਚ ਸੀਨੀਅਰ ਇੰਟਰਨੈਸ਼ਨਲ ਮੈਚ ਖੇਡ ਚੁੱਕਾ ਹੈ। ਆਸਟਰੇਲੀਆ ਦੀਆਂ ਕਾਮਨਵੈੱਲਥ ਖੇਡਾਂ 'ਚ ਹਿੱਸਾ ਲੈਣ ਦਾ ਮੌਕਾ ਮਿਲਣ 'ਤੇ ਉਹ ਬਹੁਤ ਉਤਸ਼ਾਹਿਤ ਨਜ਼ਰ ਆ ਰਿਹਾ ਹੈ। ਸਾਬਕਾ ਕੈਨੇਡੀਅਨ ਉਲੰਪਿਕ ਖਿਡਾਰੀ ਸੁਖਵਿੰਦਰ ਸਿੰਘ ਨੇ ਦਸਿਆ ਕਿ ਉਨ੍ਹਾਂ ਨੂੰ ਇਨ੍ਹਾਂ ਦੋਹਾਂ ਖਿਡਾਰੀਆਂ 'ਤੇ ਮਾਣ ਹੈ। ਉਨ੍ਹਾਂ ਦਸਿਆ ਕਿ 1987 'ਚ ਯੁਨਾਈਟਡ ਬ੍ਰਦਰ ਕਲਬ ਦੀ ਸਥਾਪਨਾ ਕੀਤੀ ਗਈ ਸੀ, ਜਿਸ ਨਾਲ ਵਿਦੇਸ਼ੀ ਭਾਰਤੀ ਜੁੜੇ ਹੋਏ ਹਨ। ਇਸ ਕਲੱਬ ਨਾਲ ਜੁੜੇ ਖਿਡਾਰੀਆਂ 'ਚੋਂ ਬਲਰਾਜ ਅਤੇ ਸੁਖਪਾਲ ਵੀ ਹਨ ਅਤੇ ਉਨ੍ਹਾਂ ਲਈ ਇਹ ਮਾਣ ਵਾਲੀ ਗੱਲ ਹੈ ਕਿ ਵਿਦੇਸ਼ੀ ਧਰਤੀ 'ਤੇ ਪੰਜਾਬੀਆਂ ਨੇ ਇੰਨਾ ਨਾਮਣਾ ਖੱਟਿਆ ਹੈ।