ਆਸਟਰੇਲੀਆ ਨੇ ਬਾਅਦ ਵਿਚ ਬੱਲੇਬਾਜ਼ੀ ਕਰਦਿਆਂ ਸਭ ਤੋਂ ਜ਼ਿਆਦਾ ਦੌੜਾਂ ਦਾ ਰੀਕਾਰਡ ਵੀ ਬਣਾਇਆ
ਵਿਸ਼ਾਖਾਪਟਨਮ : ਕਪਤਾਨ ਐਲਿਸਾ ਹੀਲੀ ਨੇ ਪ੍ਰਤਿਭਾ ਅਤੇ ਧੀਰਜ ਨਾਲ ਸੈਂਕੜਾ ਲਗਾਉਂਦੇ ਹੋਏ ਆਸਟਰੇਲੀਆ ਨੂੰ ਅਪਣੇ ਵਿਸ਼ਵ ਕੱਪ ਮੈਚ ਵਿਚ ਭਾਰਤ ਵਿਰੁਧ ਤਿੰਨ ਵਿਕਟਾਂ ਨਾਲ ਜਿੱਤ ਦਿਵਾਈ।
ਹੀਲੀ ਨੇ 107 ਗੇਂਦਾਂ ’ਤੇ 21 ਚੌਕਿਆਂ ਅਤੇ 3 ਛੱਕਿਆਂ ਦੀ ਮਦਦ ਨਾਲ 142 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ। ਸੱਤ ਵਾਰ ਦੀ ਚੈਂਪੀਅਨ ਟੀਮ ਨੇ ਸੱਤ ਵਿਕਟਾਂ ਉਤੇ 331 ਦੌੜਾਂ ਬਣਾ ਕੇ ਭਾਰਤੀ ਟੀਮ ਵਲੋਂ ਦਿਤੇ ਵਿਸ਼ਾਲ ਟੀਚੇ ਨੂੰ ਇਕ ਓਵਰ ਰਹਿੰਦੇ ਹੀ ਪੂਰਾ ਕਰ ਲਿਆ। ਮੇਜ਼ਬਾਨ ਟੀਮ ਨੇ ਸਮ੍ਰਿਤੀ ਮੰਧਾਨਾ ਅਤੇ ਪ੍ਰਤਿਕਾ ਰਾਵਲ ਦੇ ਅਰਧ ਸੈਂਕੜੇ ਬਦੌਲਤ ਸ਼ਾਨਦਾਰ 330 ਦੌੜਾਂ ਬਣਾਈਆਂ ਸਨ। ਪਰ ਵਿਸ਼ਾਲ ਟੀਚੇ ਦਾ ਬਚਾਅ ਨਾ ਕਰ ਸਕੀ।
ਆਸਟਰੇਲੀਆ ਨੇ ਬਾਅਦ ਵਿਚ ਬੱਲੇਬਾਜ਼ੀ ਕਰਦਿਆਂ ਸਭ ਤੋਂ ਜ਼ਿਆਦਾ ਦੌੜਾਂ ਦਾ ਰੀਕਾਰਡ ਵੀ ਬਣਾਇਆ। ਇਸ ਤੋਂ ਪਹਿਲਾਂ ਸੱਭ ਤੋਂ ਵੱਧ ਸਫਲ ਦੌੜਾਂ ਦਾ ਪਿੱਛਾ ਸ੍ਰੀਲੰਕਾ ਨੇ 2024 ਵਿਚ ਦਖਣੀ ਅਫਰੀਕਾ ਦੇ ਵਿਰੁਧ 302 ਦੌੜਾਂ ਬਣਾ ਕੇ ਕੀਤਾ ਸੀ।
ਅੱਜ ਦੀ ਜਿੱਤ ਨਾਲ ਆਸਟਰੇਲੀਆਈ ਟੀਮ ਸੱਤ ਅੰਕਾਂ ਨਾਲ ਸੂਚੀ ਵਿਚ ਸਿਖਰ ਉਤੇ ਹੈ, ਜਦਕਿ ਭਾਰਤ ਚਾਰ ਅੰਕਾਂ ਨਾਲ ਤੀਜੇ ਸਥਾਨ ਉਤੇ ਹੈ।
ਮੰਧਾਨਾ ਨੇ ਇਕ ਸਾਲ ਵਿਚ ਇਕ ਹਜ਼ਾਰ ਦੌੜਾਂ ਬਣਾ ਕੇ ਰਚਿਆ ਇਤਿਹਾਸ, ਇਕ ਰੋਜ਼ਾ ਮੈਚਾਂ ਵਿਚ 5,000 ਦਾ ਅੰਕੜਾ ਪਾਰ ਕਰ ਲਿਆ
ਵਿਸਾਖਾਪਟਨਮ : ਭਾਰਤੀ ਉਪ-ਕਪਤਾਨ ਸਮਿ੍ਰਤੀ ਮੰਧਾਨਾ ਐਤਵਾਰ ਨੂੰ ਆਸਟ੍ਰੇਲੀਆ ਵਿਰੁਧ ਮਹਿਲਾ ਵਿਸ਼ਵ ਕੱਪ ਗਰੁੱਪ ਮੈਚ ਦੌਰਾਨ ਮਹਿਲਾ ਇਕ ਰੋਜ਼ਾ ਵਿਚ ਇਕ ਕੈਲੰਡਰ ਸਾਲ ਵਿਚ 1,000 ਦੌੜਾਂ ਬਣਾਉਣ ਵਾਲੀ ਪਹਿਲੀ ਖਿਡਾਰਨ ਬਣ ਗਈ। 29 ਸਾਲਾ ਓਪਨਰ ਨੇ ਮਹਿਲਾ ਇਕ ਰੋਜ਼ਾ ਵਿਚ 5,000 ਦੌੜਾਂ ਵੀ ਪੂਰੀਆਂ ਕੀਤੀਆਂ, ਇਹ ਕਾਰਨਾਮਾ ਹਾਸਲ ਕਰਨ ਵਾਲੀ ਮਿਤਾਲੀ ਰਾਜ ਤੋਂ ਬਾਅਦ ਸਿਰਫ਼ ਪੰਜਵੀਂ ਅਤੇ ਦੂਜੀ ਭਾਰਤੀ ਬੱਲੇਬਾਜ਼ ਬਣ ਗਈ। ਉਹ ਇਹ ਕਾਰਨਾਮਾ ਹਾਸਲ ਕਰਨ ਵਾਲੀ ਸੱਭ ਤੋਂ ਛੋਟੀ ਉਮਰ ਦੀ ਖਿਡਾਰਨ ਹੈ ਅਤੇ ਸੱਭ ਤੋਂ ਘੱਟ ਪਾਰੀਆਂ ਵਿਚ 1,000 ਦੌੜਾਂ ਪੂਰੀਆਂ ਕੀਤੀਆਂ। ਮੰਧਾਨਾ ਨੇ ਇਹ ਕਾਰਨਾਮਾ 112 ਪਾਰੀਆਂ ਅਤੇ 5,569 ਗੇਂਦਾਂ ਵਿਚ ਹਾਸਲ ਕੀਤਾ, ਸਟੈਫਨੀ ਟੇਲਰ ਦੀਆਂ 129 ਪਾਰੀਆਂ ਅਤੇ ਸੂਜੀ ਬੇਟਸ ਦੀਆਂ 6,182 ਗੇਂਦਾਂ ਨੂੰ ਪਛਾੜ ਦਿਤਾ।
ਹਾਲਾਂਕਿ ਮੰਧਾਨਾ ਨੇ ਟੂਰਨਾਮੈਂਟ ਦੀ ਸ਼ੁਰੂਆਤ ਹੌਲੀ ਕੀਤੀ ਸੀ, ਪਰ ਖੱਬੇ ਹੱਥ ਦੀ ਬੱਲੇਬਾਜ਼ ਨੇ ਸ਼ਾਨਦਾਰ ਵਾਪਸੀ ਕੀਤੀ, 66 ਗੇਂਦਾਂ ’ਤੇ 80 ਦੌੜਾਂ (ਨੌਂ ਚੌਕੇ ਅਤੇ ਤਿੰਨ ਛੱਕੇ) ਬਣਾਈਆਂ ਅਤੇ ਪ੍ਰਤੀਕਾ ਰਾਵਲ ਨਾਲ 155 ਦੌੜਾਂ ਦੀ ਸਾਂਝੇਦਾਰੀ ਕੀਤੀ, ਜੋ ਕਿ ਟੂਰਨਾਮੈਂਟ ਵਿਚ ਓਪਨਰਾਂ ਵਿਚਕਾਰ ਪਹਿਲੀ ਸੈਂਕੜਾ ਸਾਂਝੇਦਾਰੀ ਵੀ ਸੀ। ਇਸ ਮੈਚ ਤੋਂ ਪਹਿਲਾਂ, ਮੰਧਾਨਾ ਨੇ 17 ਮੈਚਾਂ ਵਿਚ 982 ਦੌੜਾਂ ਬਣਾਈਆਂ ਸਨ। ਉਸ ਨੇ ਅੱਠਵੇਂ ਓਵਰ ਵਿਚ 1,000 ਦੌੜਾਂ ਦਾ ਅੰਕੜਾ ਪਾਰ ਕੀਤਾ, ਆਸਟ੍ਰੇਲੀਆਈ ਖੱਬੇ ਹੱਥ ਦੀ ਸਪਿਨਰ ਸੋਫੀ ਮੋਲੀਨੇਕਸ ਨੂੰ ਇਕ ਚੌਕਾ, ਇਕ ਛੱਕਾ ਅਤੇ ਇਕ ਚੌਕਾ ਮਾਰਿਆ, ਜਿਸ ਦੇ ਨਤੀਜੇ ਵਜੋਂ 16 ਦੌੜਾਂ ਬਣੀਆਂ। ਇਸ ਤਰ੍ਹਾਂ ਮੰਧਾਨਾ ਨੇ ਆਸਟ੍ਰੇਲੀਆ ਦੀ ਬੇਲਿੰਡਾ ਕਲਾਰਕ ਦਾ ਮਹਿਲਾ ਵਨਡੇ ਵਿਚ ਇਕ ਕੈਲੰਡਰ ਸਾਲ ਵਿਚ ਸੱਭ ਤੋਂ ਵੱਧ ਦੌੜਾਂ ਦਾ ਪਿਛਲਾ ਰੀਕਾਰਡ (1997 ਵਿੱਚ 970 ਦੌੜਾਂ) ਤੋੜ ਦਿਤਾ। ਉਸ ਨੇ ਅਪਣੀ ਪਾਰੀ ਦੀ ਸ਼ੁਰੂਆਤ ਸਾਕਾਰਾਤਮਕ ਨੋਟ ’ਤੇ ਕੀਤੀ, ਕਿਮ ਗਾਰਥ ਦੇ ਪਹਿਲੇ ਓਵਰ ਦੀ ਆਖਰੀ ਗੇਂਦ ’ਤੇ ਚੌਕਾ ਲਗਾ ਕੇ ਅਪਣਾ ਖਾਤਾ ਖੋਲ੍ਹਿਆ।
ਪਰ ਮੋਲਿਨੋ ਦੇ ਓਵਰ ਵਿਚ ਮੰਧਾਨਾ ਨੇ ਪਹਿਲੀ ਗੇਂਦ ’ਤੇ ਮਿਡ-ਆਨ ’ਤੇ ਚੌਕਾ ਮਾਰਿਆ, ਅਗਲੀ ਗੇਂਦ ਦਾ ਬਚਾਅ ਕੀਤਾ, ਫਿਰ ਤੀਜੀ ਗੇਂਦ ’ਤੇ ਲੌਂਗ-ਆਨ ’ਤੇ ਛੱਕਾ ਮਾਰਿਆ ਅਤੇ ਫਿਰ ਸਕੁਏਅਰ ਲੈੱਗ ’ਤੇ ਹੋਰ ਚਾਰ ਮਾਰ ਕੇ ਰੀਕਾਰਡ ਬੁੱਕ ਵਿਚ ਦਾਖ਼ਲ ਹੋ ਗਈ। ਮੰਧਾਨਾ ਨੇ ਪਹਿਲਾਂ ਟੂਰਨਾਮੈਂਟ ਵਿੱਚ ਸ੍ਰੀਲੰਕਾ, ਪਾਕਿਸਤਾਨ ਅਤੇ ਦੱਖਣੀ ਅਫ਼ਰੀਕਾ ਵਿਰੁਧ ਕ੍ਰਮਵਾਰ 8, 23 ਅਤੇ 23 ਦੌੜਾਂ ਬਣਾਈਆਂ ਸਨ।
