ਕਿਹਾ, ਜੂਨੀਅਰ ਅਤੇ ਸੀਨੀਅਰ ਪੱਧਰ ’ਤੇ ਹਾਕੀ ਖੇਡਣ ’ਚ ਬਹੁਤ ਫਰਕ ਹੁੰਦੈ
ਨਵੀਂ ਦਿੱਲੀ: ਭਾਰਤ ਦੇ ਨੌਜੁਆਨ ਫਾਰਵਰਡ ਅਰਾਈਜੀਤ ਸਿੰਘ ਹੁੰਦਲ ਦਾ ਮੰਨਣਾ ਹੈ ਕਿ ਜੂਨੀਅਰ ਅਤੇ ਸੀਨੀਅਰ ਪੱਧਰ ’ਤੇ ਹਾਕੀ ਖੇਡਣ ’ਚ ਬਹੁਤ ਫਰਕ ਹੈ ਅਤੇ ਟੀਮ ਦੇ ਤਜਰਬੇਕਾਰ ਖਿਡਾਰੀਆਂ ਨੇ ਉਨ੍ਹਾਂ ਦੀ ਇਸ ਬਦਲਾਅ ’ਚ ਮਦਦ ਕਰਨ ਲਈ ਵੱਡੀ ਭੂਮਿਕਾ ਨਿਭਾਈ ਹੈ। ਅਪਣੇ ਪਰਵਾਰ ਵਿਚ ਤੀਜੀ ਪੀੜ੍ਹੀ ਦੇ ਹਾਕੀ ਖਿਡਾਰੀ ਹੁੰਦਲ ਨੇ ਕਿਹਾ ਕਿ ਉਹ ਪੈਰਿਸ ਓਲੰਪਿਕ ਲਈ ਜਾਣ ਵਾਲੀ ਟੀਮ ਵਿਚ ਜਗ੍ਹਾ ਪੱਕੀ ਕਰਨ ਲਈ ਕੋਈ ਕਸਰ ਬਾਕੀ ਨਹੀਂ ਛੱਡਣਗੇ।
ਹੁੰਦਲ ਨੇ ਇਕ ਇੰਟਰਵਿਊ ’ਚ ਕਿਹਾ, ‘‘ਸੀਨੀਅਰ ਹਾਕੀ ਜੂਨੀਅਰ ਹਾਕੀ ਤੋਂ ਬਿਲਕੁਲ ਵੱਖਰੀ ਹੈ। ਮੈਂ ਤਿੰਨ-ਚਾਰ ਸਾਲ ਜੂਨੀਅਰ ਹਾਕੀ ਖੇਡੀ ਅਤੇ ਦੋ ਜੂਨੀਅਰ ਵਿਸ਼ਵ ਕੱਪ ਵੀ ਖੇਡੇ ਹਨ। ਮੈਨੂੰ ਨੀਦਰਲੈਂਡਜ਼ ਅਤੇ ਆਸਟਰੇਲੀਆ ਵਰਗੀਆਂ ਵੱਡੀਆਂ ਟੀਮਾਂ ਵਿਰੁਧ ਭਾਰਤ ’ਚ ਐਫ.ਆਈ.ਐਚ. ਪ੍ਰੋ ਲੀਗ ’ਚ ਖੇਡਣ ਦਾ ਮੌਕਾ ਮਿਲਿਆ। ਅਸੀਂ ਖੁਸ਼ਕਿਸਮਤ ਹਾਂ ਕਿ ਅਸੀਂ ਅਪਣੇ ਸੀਨੀਅਰ ਕਰੀਅਰ ਦੀ ਸ਼ੁਰੂਆਤ ’ਚ ਓਲੰਪਿਕ ਤੋਂ ਪਹਿਲਾਂ ਕੈਂਪ ’ਚ ਸ਼ਾਮਲ ਹੋਏ।’’
ਹੁੰਦਲ ਨੇ ਅਪਣੇ ਪਰਵਾਰ ਦੇ ਕਈ ਮੈਂਬਰਾਂ ਨੂੰ ਕੌਮੀ ਪੱਧਰ ’ਤੇ ਹਾਕੀ ਖੇਡਦੇ ਹੋਏ ਵੇਖਿਆ ਹੈ ਪਰ ਕਦੇ ਵੀ ਭਾਰਤ ਦੀ ਜਰਸੀ ਨਹੀਂ ਪਹਿਨੀ। ਉਹ ਸਿਰਫ ਉਨ੍ਹਾਂ ਲਈ ਓਲੰਪਿਕ ’ਚ ਖੇਡਣਾ ਚਾਹੁੰਦਾ ਹੈ। ਉਹ ਕਹਿੰਦਾ ਹੈ ਕਿ ਜੇ ਉਹ ਪੈਰਿਸ ’ਚ ਭਾਰਤ ਦੀ ਨੁਮਾਇੰਦਗੀ ਕਰਨ ਦੇ ਅਪਣੇ ਪਰਵਾਰ ਦੇ ਸੁਪਨੇ ਨੂੰ ਪੂਰਾ ਕਰਦਾ ਹੈ ਤਾਂ ਘਰ ’ਚ ਸ਼ਾਨਦਾਰ ਜਸ਼ਨ ਮਨਾਏ ਜਾਣਗੇ। ਬੀ.ਏ. ਦੀ ਪੜ੍ਹਾਈ ਕਰ ਰਹੇ 20 ਸਾਲ ਦੇ ਹੁੰਦਲ ਨੇ ਭੁਵਨੇਸ਼ਵਰ ਤੋਂ ਗੱਲਬਾਤ ਕਰਦਿਆਂ ਕਿਹਾ, ‘‘ਜੇ ਮੈਂ ਅਜਿਹਾ (ਪੈਰਿਸ ਵਿਚ ਭਾਰਤ ਦੀ ਨੁਮਾਇੰਦਗੀ) ਕਰ ਸਕਿਆ ਤਾਂ ਸਾਡੇ ਘਰ ਵਿਚ ਤਿਉਹਾਰ ਦਾ ਮਾਹੌਲ ਹੋਵੇਗਾ। ਹਰ ਕਿਸੇ ਦੇ ਚਿਹਰੇ ’ਤੇ ਅਜਿਹੀ ਖੁਸ਼ੀ ਹੋਵੇਗੀ ਜੋ ਮੈਂ ਪਹਿਲਾਂ ਕਦੇ ਨਹੀਂ ਦੇਖੀ। ਮੈਂ ਅਜਿਹਾ ਕਰਨ ਲਈ ਕੋਈ ਕਸਰ ਨਹੀਂ ਛੱਡਾਂਗਾ।’’ ਉਨ੍ਹਾਂ ਕਿਹਾ, ‘‘ਇਹ ਪੂਰੇ ਪਰਵਾਰ ਦਾ ਸੁਪਨਾ ਹੈ ਕਿ ਮੈਂ ਓਲੰਪਿਕ ’ਚ ਖੇਡਾਂ। ਦਾਦਾ ਜੀ ਹਾਕੀ ਖੇਡਦੇ ਸਨ। ਪਾਪਾ ਅਤੇ ਉਨ੍ਹਾਂ ਦੇ ਤਿੰਨ ਭਰਾ ਕੌਮੀ ਪੱਧਰ ’ਤੇ ਹਾਕੀ ਖੇਡਦੇ ਸਨ ਪਰ ਕਿਸੇ ਨੂੰ ਵੀ ਭਾਰਤੀ ਟੀਮ ’ਚ ਜਗ੍ਹਾ ਨਹੀਂ ਮਿਲ ਸਕੀ।’’
ਡਰੈਗ ਫਲਿਕਰ-ਕਮ-ਫਾਰਵਰਡ ਭੁਵਨੇਸ਼ਵਰ ’ਚ ਕੌਮੀ ਕੈਂਪ ’ਚ ਸੰਭਾਵਤ ਖਿਡਾਰੀਆਂ ਦੇ 28 ਮੈਂਬਰੀ ਕੋਰ ਗਰੁੱਪ ਦਾ ਹਿੱਸਾ ਹੈ। ਇਹ ਕੈਂਪ ਮਹੱਤਵਪੂਰਨ ਹੈ ਕਿਉਂਕਿ ਟੀਮ ਦਾ ਟੀਚਾ ਪੈਰਿਸ ਤੋਂ ਪਹਿਲਾਂ ਅਪਣੀਆਂ ਤਿਆਰੀਆਂ ਨੂੰ ਬਿਹਤਰ ਬਣਾਉਣਾ ਹੈ। ਹੁੰਦਲ ਨੇ ਪਿਛਲੇ ਸਾਲ ਕੁਆਲਾਲੰਪੁਰ ’ਚ ਜੂਨੀਅਰ ਵਿਸ਼ਵ ਕੱਪ ’ਚ ਕੋਰੀਆ ਵਿਰੁਧ ਹੈਟ੍ਰਿਕ ਸਮੇਤ ਚਾਰ ਗੋਲ ਕਰਨ ਤੋਂ ਬਾਅਦ ਇਸ ਸਾਲ ਦਖਣੀ ਅਫਰੀਕਾ ਦੌਰੇ ਦੌਰਾਨ ਸੀਨੀਅਰ ਟੀਮ ’ਚ ਡੈਬਿਊ ਕੀਤਾ ਸੀ। ਉਨ੍ਹਾਂ ਕਿਹਾ, ‘‘ਮੇਰੇ ਪਿਤਾ 1999 ’ਚ ਕੌਮੀ ਕੈਂਪ ’ਚ ਸਨ ਪਰ ਪਰਵਾਰ ਕ ਕਾਰਨਾਂ ਕਰ ਕੇ ਉਨ੍ਹਾਂ ਨੂੰ ਕੈਂਪ ਵਿਚਾਲੇ ਛੱਡਣਾ ਪਿਆ। ਹੁਣ ਮੈਂ ਆਖਰੀ ਬਚਿਆ ਹਾਂ ਕਿਉਂਕਿ ਪਰਵਾਰ ’ਚ ਹੁਣ ਕੋਈ ਹੋਰ ਹਾਕੀ ਨਹੀਂ ਖੇਡਦਾ। ਮੈਨੂੰ ਯਕੀਨ ਹੈ ਕਿ ਮੈਂ ਉਨ੍ਹਾਂ ਦੇ ਸੁਪਨੇ ਨੂੰ ਪੂਰਾ ਕਰਾਂਗਾ ਅਤੇ ਪਰਵਾਰ ਨੂੰ ਮਾਣ ਦਿਵਾਵਾਂਗਾ।’’
ਹਾਲ ਹੀ ’ਚ ਪ੍ਰੋ ਲੀਗ ਦੌਰਾਨ ਹੁੰਦਲ ਨੇ ਰਾਊਰਕੇਲਾ ’ਚ ਨੀਦਰਲੈਂਡ ਜ਼ਰੀਏ ਪੈਨਲਟੀ ਸ਼ੂਟਆਊਟ ’ਚ ਗੋਲ ਕੀਤਾ ਸੀ। ਉਸ ਨੇ ਕਿਹਾ ਕਿ ਜੇ ਉਹ ਸ਼ਾਟ ਤੋਂ ਖੁੰਝ ਜਾਂਦਾ, ਤਾਂ ਉਨ੍ਹਾਂ ਨੂੰ ਲੰਮੇ ਸਮੇਂ ਤਕ ਪਛਤਾਵਾ ਹੁੰਦਾ। ਉਨ੍ਹਾਂ ਕਿਹਾ, ‘‘ਸਟੇਡੀਅਮ ਖਚਾਖਚ ਭਰਿਆ ਹੋਇਆ ਸੀ ਅਤੇ ਮੈਨੂੰ ਨਹੀਂ ਲਗਦਾ ਸੀ ਕਿ ਮੈਨੂੰ ਸ਼ੂਟਆਊਟ ’ਚ ਮੌਕਾ ਮਿਲੇਗਾ। ਪਰ ਜਦੋਂ ਮੈਨੂੰ ਇਹ ਮਿਲਿਆ, ਤਾਂ ਮੈਂ ਸੋਚਿਆ ਕਿ ਇਹ ਕੁੱਝ ਕਰਨ ਦਾ ਮੌਕਾ ਹੈ ਅਤੇ ਜੇ ਮੈਂ ਇਸ ਨੂੰ ਗੁਆ ਦਿੰਦਾ ਹਾਂ, ਤਾਂ ਮੈਨੂੰ ਪਛਤਾਵੇ ਤੋਂ ਇਲਾਵਾ ਕੁੱਝ ਨਹੀਂ ਮਿਲੇਗਾ। ਸੀਨੀਅਰ ਖਿਡਾਰੀਆਂ ਨੇ ਮੈਨੂੰ ਦਬਾਅ ’ਚ ਨਾ ਆਉਣ ਅਤੇ ਕੁਦਰਤੀ ਤੌਰ ’ਤੇ ਖੇਡਣ ਲਈ ਵੀ ਸਮਝਾਇਆ।’’
ਉਨ੍ਹਾਂ ਕਿਹਾ, ‘‘ਜੂਨੀਅਰ ਅਤੇ ਸੀਨੀਅਰ ਖਿਡਾਰੀਆਂ ਵਿਚਾਲੇ ਰਿਸ਼ਤਾ ਬਹੁਤ ਵਧੀਆ ਹੈ। ਜੇ ਸਾਡੇ ਕੋਈ ਸਵਾਲ ਹਨ ਜਾਂ ਅਸੀਂ ਘਬਰਾਏ ਹੋਏ ਹਾਂ, ਤਾਂ ਅਸੀਂ ਉਨ੍ਹਾਂ (ਸੀਨੀਅਰਾਂ) ਕੋਲ ਜਾਣ ਤੋਂ ਨਹੀਂ ਝਿਜਕਦੇ। ਜਦੋਂ ਅਸੀਂ ਮੈਦਾਨ ’ਤੇ ਗਲਤੀਆਂ ਕਰਦੇ ਹਾਂ ਤਾਂ ਉਹ ਸਾਨੂੰ ਡਾਂਟਦੇ ਹਨ ਅਤੇ ਜਦੋਂ ਅਸੀਂ ਚੰਗਾ ਖੇਡਦੇ ਹਾਂ ਤਾਂ ਸਾਨੂੰ ਉਤਸ਼ਾਹਤ ਵੀ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਮਾਹੌਲ ਬਹੁਤ ਸਕਾਰਾਤਮਕ ਹੈ।’’
ਉਨ੍ਹਾਂ ਕਿਹਾ, ‘‘ਇਹ ਚੰਗੀ ਗੱਲ ਹੈ ਕਿ ਜੂਨੀਅਰ ਖਿਡਾਰੀ ਸੀਨੀਅਰ ਖਿਡਾਰੀਆਂ ਨੂੰ ਚੰਗਾ ਪ੍ਰਦਰਸ਼ਨ ਕਰਨ ਲਈ ਪ੍ਰੇਰਿਤ ਕਰ ਰਹੇ ਹਨ ਅਤੇ ਜੂਨੀਅਰ ਖਿਡਾਰੀ ਵਾਧੂ ਮਿਹਨਤ ਕਰ ਰਹੇ ਹਨ। ਇਹ ਸਿਹਤਮੰਦ ਮੁਕਾਬਲਾ ਟੀਮ ਲਈ ਵੀ ਜ਼ਰੂਰੀ ਹੈ। ਜੇਕਰ ਅਸੀਂ ਇਕ-ਦੂਜੇ ਨੂੰ ਮੁਕਾਬਲਾ ਨਹੀਂ ਦੇਵਾਂਗੇ ਤਾਂ ਟੀਮ ਦਾ ਪ੍ਰਦਰਸ਼ਨ ਗ੍ਰਾਫ ਕਿਵੇਂ ਵਧੇਗਾ?’’
ਰਵਾਇਤੀ ਤੌਰ ’ਤੇ, ਡਰੈਗ-ਫਲਿਕਰ ਜਿਆਦਾਤਰ ਡਿਫੈਂਡਰ ਹੁੰਦੇ ਹਨ, ਪਰ ਹੁੰਦਲ ਵੱਖਰਾ ਹੈ। ਉਸ ਨੇ ਕਿਹਾ, ‘‘ਜਦੋਂ ਤੋਂ ਮੈਂ ਹਾਕੀ ਸਟਿਕ ਫੜੀ ਹੈ, ਉਦੋਂ ਤੋਂ ਮੈਂ ਫਾਰਵਰਡ ਹਾਂ। ਪਰ ਇਕ ਵਾਰ ਜਦੋਂ ਮੈਂ ਡਰੈਗ ਫਲਿੱਕ ਦੀ ਕੋਸ਼ਿਸ਼ ਕੀਤੀ, ਤਾਂ ਮੈਂ ਸੱਚਮੁੱਚ ਇਸ ਦਾ ਅਨੰਦ ਲਿਆ। ਮੈਂ ਇਸ ਨੂੰ ਗੰਭੀਰਤਾ ਨਾਲ ਲਿਆ ਅਤੇ ਹੌਲੀ-ਹੌਲੀ ਸਿੱਖਣਾ ਜਾਰੀ ਰੱਖਿਆ।’’ ਉਨ੍ਹਾਂ ਕਿਹਾ, ‘‘ਸਾਡਾ ਕਪਤਾਨ ਹਰਮਨਪ੍ਰੀਤ ਮੇਰਾ ਪਸੰਦੀਦਾ ਹੈ। ਮੈਂ ਉਸ ਦੀ ਸ਼ੈਲੀ ਦੀ ਨਕਲ ਨਹੀਂ ਕਰਦਾ ਪਰ ਮੈਂ ਤਕਨੀਕੀ ਤੌਰ ’ਤੇ ਉਸ ਤੋਂ ਬਹੁਤ ਕੁੱਝ ਸਿੱਖਦਾ ਹਾਂ।’’
ਵਿਰਾਟ ਕੋਹਲੀ ਵੀ ਉਸ ਦਾ ਮਨਪਸੰਦ ਖਿਡਾਰੀ ਹੈ ਅਤੇ ਹੁੰਦਲ ਇਸ ਸਟਾਰ ਕ੍ਰਿਕਟਰ ਤੋਂ ਹਮਲਾਵਰਤਾ ਵਿਚ ਇਕ ਜਾਂ ਦੋ ਸਬਕ ਲੈਂਦਾ ਹੈ। ਉਨ੍ਹਾਂ ਕਿਹਾ, ‘‘ਮੇਰਾ ਪਸੰਦੀਦਾ ਕ੍ਰਿਕਟਰ ਵਿਰਾਟ ਕੋਹਲੀ ਹੈ ਕਿਉਂਕਿ ਉਸ ਦਾ ਰਵੱਈਆ, ਹਮਲਾਵਰਤਾ ਅਤੇ ਆਤਮਵਿਸ਼ਵਾਸ ਪ੍ਰੇਰਣਾਦਾਇਕ ਹੈ। ਉਸ ਤੋਂ ਸਿੱਖਣ ਲਈ ਬਹੁਤ ਕੁੱਝ ਹੈ। ਮੈਂ ਇਹ ਵੇਖਣ ਲਈ ਉਸ ਦੇ ਇੰਟਰਵਿਊ ਦੇਖਦਾ ਹਾਂ ਕਿ ਉਹ ਕਿਵੇਂ ਖੇਡਦਾ ਹੈ ਅਤੇ ਉਹ ਵਿਰੋਧੀ ਖਿਡਾਰੀਆਂ ਨੂੰ ਕਿਵੇਂ ਪ੍ਰਤੀਕਿਰਿਆ ਦਿੰਦਾ ਹੈ। ਉਸ ਦੀ ਊਰਜਾ ਦਾ ਪੱਧਰ ਅਤੇ ਤੰਦਰੁਸਤੀ ਸ਼ਾਨਦਾਰ ਹੈ।’’
