ਮੈਰੀ ਕਾਮ ਨੇ ਐਵਾਰਡ ਪ੍ਰਾਪਤ ਕਰਦਿਆਂ ਕਿਹਾ 20 ਸਾਲਾਂ ਦੀ ਸਖ਼ਤ ਮਿਹਨਤ ਦਾ ਫਲ
ਲੰਡਨ: ਖੇਡ ਜਗਤ ਦੀ ਸੀਨੀਅਰ ਖਿਡਾਰੀ ਅਤੇ ਜ਼ਨਾਨਾ ਮੁੱਕੇਬਾਜ਼ੀ ’ਚ ਭਾਰਤ ਦੀ ਪਹਿਲੀ ਓਲੰਪਿਕ ਤਮਗਾ ਜੇਤੂ ਮੈਰੀ ਕਾਮ ਨੂੰ ਦਖਣੀ-ਪੂਰਬੀ ਇੰਗਲੈਂਡ ਦੇ ਵਿੰਡਸਰ ’ਚ ਸਾਲਾਨਾ ਯੂ.ਕੇ.-ਇੰਡੀਆ ਐਵਾਰਡਸ ’ਚ ‘ਗਲੋਬਲ ਇੰਡੀਅਨ ਆਈਕਨ ਆਫ਼ ਦ ਈਅਰ’ ਦਿਤਾ ਗਿਆ ਹੈ।
ਰਾਜ ਸਭਾ ਦੀ ਸਾਬਕਾ ਮੈਂਬਰ (40) ਨੂੰ ਵੀਰਵਾਰ ਰਾਤ ਹੋਏ ਇਸ ਸ਼ਾਨਦਾਰ ਪ੍ਰੋਗਰਾਮ ’ਚ ਬ੍ਰਿਟੇਨ ’ਚ ਭਾਰਤੀ ਹਾਈ ਕਮਿਸ਼ਨਰ ਵਿਕਰਮ ਦੋਰਾਈਸਵਾਮੀ ਨੇ ਐਵਾਰਡ ਦਿਤਾ। ਮੈਰੀ ਕਾਮ ਨੇ ਐਵਾਰਡ ਪ੍ਰਾਪਤ ਕਰਦਿਆਂ ਅਪਣੀ 20 ਸਾਲਾਂ ਦੀ ਸਖ਼ਤ ਮਿਹਨਤ ਅਤੇ ਮੁੱਕੇਬਾਜ਼ੀ ਨੂੰ ਸਮਰਪਿਤ ਅਪਣੇ ਜੀਵਨ ’ਤੇ ਗੱਲ ਕੀਤੀ।
ਉਨ੍ਹਾਂ ਕਿਹਾ, ‘‘ਮੈਂ 20 ਸਾਲ ਤੋਂ ਮਿਹਨਤ ਕਰ ਰਹੀ ਹਾਂ। ਜੀਵਨ ’ਚ, ਮੁੱਕੇਬਾਜ਼ੀ ’ਚ ਬਹੁਤ ਮਿਹਨਤ ਕਰ ਰਹੀ ਹਾਂ। ਇਹ ਬਹੁਤ ਅਰਥ ਰਖਦਾ ਹੈ। ਅਪਣੇ ਦੇਸ਼ ਲਈ ਅਪਣੇ ਪ੍ਰਵਾਰ ਲਈ ਕੁਰਬਾਨੀ ਦੇ ਰਹੀ ਹਾਂ। ਮੈਂ ਅਸਲ ’ਚ ਇਸ ਮਾਣ ਲਈ ਦਿਲ ਤੋਂ ਧਨਵਾਦ ਦਿੰਦੀ ਹਾਂ।’’
ਆਸਕਰ ਪੁਰਸਕਾਰਾਂ ’ਚ ‘ਐਲੀਜ਼ਾਬੈੱਥ: ਦ ਗੋਲਡਨ ਏਜ’ ਦੇ ਨਿਰਮਾਤਾ ਸ਼ੇਖਰ ਕਪੂਰ ਨੂੰ ਯੂ.ਕੇ.-ਇੰਡੀਆ ਵੀਕ ਦੇ ਹਿੱਸੇ ਦੇ ਰੂਪ ’ਚ ਇੰਡੀਆ ਗਲੋਬਲ ਫ਼ੋਰਮ (ਆਈ.ਜੀ.ਐਫ਼.) ਵਲੋਂ ਕਰਵਾਏ ਪੁਰਸਕਾਰਾਂ ’ਚ ਦੋਹਾਂ ਦੇਸ਼ਾਂ ਦੇ ਸਿਨੇਮਾ ਖੇਤਰ ’ਚ ਉਨ੍ਹਾਂ ਦੇ ਯੋਗਦਾਨ ਲਈ ‘ਲਾਈਫ਼ਟਾਈਮ ਅਚੀਵਮੈਂਟ ਐਵਾਰਡ’ ਦਿਤਾ ਗਿਆ। ਭਾਰਤੀ ਹਾਈਕਮਿਸ਼ਨਰ ਦੀ ਸਭਿਆਚਾਰਕ ਬ੍ਰਾਂਚ ‘ਨਹਿਰੂ ਸੈਂਟਰ’ (ਲੰਡਨ ’ਚ) ਨੂੰ ਬਰਤਾਨੀਆਂ ਅਤੇ ਭਾਰਤ ਦੇ ਸਬੰਧਾਂ ’ਚ ਮਹੱਤਵਪੂਰਨ ਯੋਗਦਾਨ ਲਈ ‘ਯੂ.ਕੇ.-ਭਾਰਤ ਐਵਾਰਡ’ ਦਿਤਾ ਗਿਆ।
