ਜੇ ਭਾਰਤ ਏਸ਼ੀਆ ਕੱਪ ਵਿਚ ਹਿੱਸਾ ਲਵੇਗਾ ਤਾਂ ਦਿਲਜੀਤ ਦਾ ਵਿਰੋਧ ਕਿਉਂ?
ਭਾਰਤ ਕੋਲ 2025 ਕ੍ਰਿਕਟ ਏਸ਼ੀਆ ਕੱਪ ਲਈ ਅਧਿਕਾਰਤ ਮੇਜ਼ਬਾਨੀ ਦੇ ਅਧਿਕਾਰ ਹਨ। ਹਾਲਾਂਕਿ, ਪਾਕਿਸਤਾਨ ਨਾਲ ਲਗਾਤਾਰ ਕੂਟਨੀਤਕ ਤਣਾਅ ਕਾਰਨ, ਟੂਰਨਾਮੈਂਟ ਨੂੰ ਇਕ ਨਿਰਪੱਖ ਸਥਾਨ ’ਤੇ ਤਬਦੀਲ ਕਰਨ ਦੇ ਪ੍ਰਸਤਾਵ ’ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ। ਦਸ ਦਈਏ ਕਿ ਅਪ੍ਰੈਲ ਵਿਚ ਪਹਿਲਗਾਮ ਵਿਚ ਹੋਈ ਅੱਤਵਾਦੀ ਘਟਨਾ ਅਤੇ ਮਈ ਵਿਚ ਹਾਲ ਹੀ ਵਿਚ ਹੋਈਆਂ ਫ਼ੌਜੀ ਕਾਰਵਾਈਆਂ ਤੋਂ ਬਾਅਦ ਏਸ਼ੀਆ ਕੱਪ ਦਾ ਭਵਿੱਖ ਖ਼ਤਰੇ ਵਿਚ ਪੈ ਗਿਆ ਹੈ। ਇਨ੍ਹਾਂ ਘਟਨਾਵਾਂ ਨੇ ਭਾਰਤ-ਪਾਕਿਸਤਾਨ ਸਬੰਧਾਂ ਨੂੰ ਵਾਧੂ ਤਣਾਅ ਵਿਚ ਪਾ ਦਿਤਾ ਹੈ ਤੇ ਭਾਰਤ ਵਿਚ ਬਹੁ-ਰਾਸ਼ਟਰੀ ਟੂਰਨਾਮੈਂਟਾਂ ਵਿਚ ਪਾਕਿਸਤਾਨ ਦੇ ਖੇਡ ਬਾਈਕਾਟ ਦੀ ਜਨਤਕ ਮੰਗ ਵਧ ਗਈ ਹੈ।
ਜੇ ਭਾਰਤ ਏਸ਼ੀਆ ਕੱਪ ’ਚ ਹਿੱਸਾ ਲਵੇਗਾ ਤਾਂ ਫ਼ਿਰ ਫ਼ਿਲਮ ‘ਸਰਦਾਰ ਜੀ 3’ ਦਾ ਭਾਰਤ ’ਚ ਵਿਰੋਧ ਕਿਉਂ?
ਏਸ਼ੀਆ ਕੱਪ 2025, 10 ਸਤੰਬਰ ਦੇ ਲਗਭਗ ਹੋਣ ਦੀ ਸੰਭਾਵਨਾ ਹੈ। ਹੁਣ ਗੱਲ ਆਉਂਦੀ ਹੈ ਕਿ ਭਾਰਤ ਏਸ਼ੀਆ ਕੱਪ ਵਿਚ ਹਿੱਸਾ ਲਵੇਗਾ ਜਾਂ ਨਹੀਂ। ਕਿਉਂਕਿ ਪਿਛਲੇ ਸਮੇਂ ਵਿਚ ਭਾਰਤ ਤੇ ਪਾਕਿਸਤਾਨ ਵਿਚਕਾਰ ਤਣਾਅ ਦਾ ਮਾਹੌਲ ਬਣਿਆ ਹੋਇਆ ਹੈ। ਭਾਰਤ ਨੇ ਪਾਕਿਸਤਾਨ ਤੋਂ ਆਪਣਾ ਸਾਰੇ ਸਮਝੌਤੇ ਤੋੜ ਦਿਤੇ ਹਨ। ਦਸ ਦਈਏ ਕਿ ਦਿਲਜੀਤ ਦੋਸਾਂਝ ਦੀਆਂ ਫ਼ਿਲਮ ‘ਸਰਦਾਰ ਜੀ 3’ ਦਾ ਵੀ ਭਾਰਤ ਵਿਚ ਵਿਰੋਧ ਹੋਇਆ ਹੈ। ਜਿਸ ਕਾਰਨ ਦਿਲਜੀਤ ਦੀਆਂ ਇਹ ਫ਼ਿਲਮ ਭਾਰਤ ਵਿਚ ਰਿਲੀਜ਼ ਵੀ ਨਹੀਂ ਹੋਈ ਪਰ ਇਸ ਫ਼ਿਲਮ ਨੂੰ ਬਾਹਰਲੇ ਮੁਲਕਾਂ ਵਿਚ ਲੋਕਾਂ ਦਾ ਬਹੁਤ ਪਿਆਰ ਮਿਲ ਰਿਹਾ ਹੈ।
ਦੱਸਣਯੋਗ ਹੈ ਕਿ ‘ਸਰਦਾਰ ਜੀ 3’ ਇਕ ਫੈਂਟਸੀ ਅਤੇ ਕਮੇਡੀ ਫ਼ਿਲਮ ਹੈ, ਜਿਸ ਵਿਚ ਦਿਲਜੀਤ ਦੋਸਾਂਝ ਨੇ ਮੁੱਖ ਭੂਮਿਕਾ ਨਿਭਾਈ ਹੈ। ਇਸ ਫ਼ਿਲਮ ਦਾ ਦੂਸਰਾ ਅਤੇ ਤੀਜਾ ਭਾਗ ‘ਸਰਦਾਰ ਜੀ’ ਸੀਰੀਜ਼ ਦੇ ਪਹਿਲੇ ਭਾਗ ਨਾਲ ਹੀ ਪੰਜਾਬੀ ਸਿਨੇਮਾ ’ਚ ਇਕ ਵੱਖਰਾ ਹੀ ਰੂਪ ਦਰਸਾਉਂਦਾ ਹੈ। ਫ਼ਿਲਮ ਵਿਚ ਜਾਦੂ ਅਤੇ ਕਮੇਡੀ ਦੇ ਮਿਲਾਪ ਨਾਲ ਦਰਸ਼ਕਾਂ ਨੂੰ ਇਕ ਨਵਾਂ ਤਜਰਬਾ ਮਿਲਦਾ ਹੈ, ਜਿਸ ਵਿਚ ਦਿਲਜੀਤ ਦੋਸਾਂਝ ਨੇ ਬਹੁਤ ਹੀ ਸ਼ਾਨਦਾਰ ਅਦਾਕਾਰੀ ਦਾ ਮੁਜ਼ਾਹਰਾ ਕੀਤਾ ਹੈ। ਫ਼ਿਲਮ ‘ਸਰਦਾਰ ਜੀ 3’ ਬਾਰੇ ਬੋਲਦੇ ਹੋਏ ਦਲਜੀਤ ਦੋਸਾਂਝ ਨੇ ਕਿਹਾ ਸੀ ਕਿ ਅਸੀਂ ਫ਼ਰਵਰੀ ’ਚ ਜਦੋਂ ਇਹ ਫ਼ਿਲਮ ਬਣਾਈ ਉਸ ਸਮੇਂ ਤਾਂ ਸਭ ਕੁਝ ਠੀਕ ਸੀ।
ਉਨ੍ਹਾਂ ਕਿਹਾ ਕਿ ਫ਼ਿਲਮ ’ਤੇ ਉਨ੍ਹਾਂ ਦਾ ਬਹੁਤ ਜ਼ਿਆਦਾ ਪੈਸਾ ਲਗਿਆ ਹੋਇਆ ਹੈ। ਜਦੋਂ ਇਹ ਫ਼ਿਲਮ ਬਣਾਈ ਗਈ ਉਦੋਂ ਦੋਵੇਂ ਦੇਸ਼ਾਂ ਵਿਚ ਅਜਿਹੀ ਕੋਈ ਗੱਲ ਨਹੀਂ ਸੀ। ਉਨ੍ਹਾਂ ਕਿਹਾ ਕਿ ਨੁਕਸਾਨ ਤਾਂ ਹੋਵੇਗਾ ਹੀ ਹੁਣ ਕੀ ਕਰ ਸਕਦੇ ਹਾਂ। ਜਦੋਂ ਮੈਂ ਇਹ ਫ਼ਿਲਮ ਸਾਈਨ ਕੀਤੀ ਸੀ ਉਦੋਂ ਤਾਂ ਸਭ ਕੁੱਝ ਠੀਕ ਸੀ। ਦਿਲਜੀਤ ਦੋਸਾਂਝ ਦੀ ਫ਼ਿਲਮ ‘ਸਰਦਾਰ ਜੀ 3’ ਤਾਂ ਭਾਰਤ ਤੇ ਪਾਕਿਸਤਾਨ ਜੰਗ ਤੋਂ ਪਹਿਲਾਂ ਬਣੀ ਸੀ ਪਰ ਫਿਰ ਵੀ ਭਾਰਤ ਵਿਚ ਇਸ ਫ਼ਿਲਮ ਦਾ ਵਿਰੋਧ ਕੀਤਾ ਗਿਆ। ਹੁਣ ਗੱਲ ਆਉਂਦੀ ਹੈ ਕਿ ਭਾਰਤ ਨੇ ਜਦੋਂ ਪਾਕਿਸਤਾਨ ਨਾਲ ਆਪਣੇ ਸਮਝੌਤੇ ਤੋੜ ਦਿਤੇ ਹਨ ਕਿ ਭਾਰਤ ਏਸ਼ੀਆ ਕੱਪ 2025 ਵਿਚ ਹਿੱਸਾ ਲਵੇਗਾ ਜਾਂ ਨਹੀਂ। ਜੇ ਭਾਰਤ ਏਸ਼ੀਆ ਕੱਪ ਵਿਚ ਹਿੱਸਾ ਲੈਂਦਾ ਹੈ ਤਾਂ ਫਿਰ ਦਿਲਜੀਤ ਦੀਆਂ ਫ਼ਿਲਮ ਦਾ ਦੇਸ਼ ਵਿਚ ਵਿਰੋਧ ਕਿਉਂ ਕੀਤਾ ਜਾ ਰਿਹਾ ਹੈ।
ਏਸ਼ੀਆ ਕੱਪ 2025 ’ਚ ਭਾਰਤ ਦੀ ਹਿੱਸੇਦਾਰੀ ਅਜੇ ਵੀ ਸਪੱਸ਼ਟ ਨਹੀਂ
ਅਗਲੇ ਹਫ਼ਤੇ ਏਸ਼ੀਆ ਕੱਪ 2025 ਬਾਰੇ ਅੰਤਮ ਫ਼ੈਸਲਾ ਲੈਣ ਦੀ ਸੰਭਾਵਨਾ ਹੈ। ਕ੍ਰਿਕਬਜ਼ ਦੀ ਇਕ ਰਿਪੋਰਟ ਦੇ ਅਨੁਸਾਰ, ਜੇਕਰ ਸਭ ਕੁਝ ਸੁਚਾਰੂ ਢੰਗ ਨਾਲ ਚੱਲਦਾ ਹੈ ਤਾਂ ਅਧਿਕਾਰਤ ਟੂਰਨਾਮੈਂਟ ਕੈਲੰਡਰ ਦਾ ਐਲਾਨ ਜੁਲਾਈ ਦੇ ਸ਼ੁਰੂ ਵਿਚ ਕੀਤਾ ਜਾ ਸਕਦਾ ਹੈ। ਟੂਰਨਾਮੈਂਟ 10 ਸਤੰਬਰ ਦੇ ਆਸਪਾਸ ਸ਼ੁਰੂ ਹੋਣ ਦੀ ਯੋਜਨਾ ਹੈ, ਜੋ ਕਿ ਮਹੀਨੇ ਦੇ ਦੂਜੇ ਹਫ਼ਤੇ ਸੁਝਾਏ ਗਏ ਲਾਂਚ ਦੇ ਅਨੁਸਾਰ ਹੈ।
ਟੀ-20 ਫ਼ਾਰਮੈਟ ਵਾਪਸ, ਯੂਏਈ ਦੀ ਮੇਜ਼ਬਾਨੀ ਦੀ ਸੰਭਾਵਨਾ
ਇਸ ਸਾਲ ਦਾ ਏਸ਼ੀਆ ਕੱਪ ਟੀ-20 ਫ਼ਾਰਮੈਟ ਵਿਚ ਖੇਡਿਆ ਜਾਵੇਗਾ ਅਤੇ ਇਸ ਵਿਚ ਛੇ ਟੀਮਾਂ ਹੋਣ ਦੀ ਸੰਭਾਵਨਾ ਹੈ, ਜਿਨ੍ਹਾਂ ਵਿਚ ਭਾਰਤ, ਪਾਕਿਸਤਾਨ, ਸ਼੍ਰੀਲੰਕਾ, ਬੰਗਲਾਦੇਸ਼, ਅਫ਼ਗਾਨਿਸਤਾਨ ਅਤੇ ਯੂਏਈ ਸ਼ਾਮਲ ਹਨ। ਹਾਲਾਂਕਿ ਟੂਰਨਾਮੈਂਟ ਦਾ ਅਜੇ ਅਧਿਕਾਰਤ ਤੌਰ ’ਤੇ ਐਲਾਨ ਨਹੀਂ ਕੀਤਾ ਗਿਆ ਹੈ, ਪਰ ਕਥਿਤ ਤੌਰ ’ਤੇ ਪ੍ਰਚਾਰ ਮੁਹਿੰਮਾਂ ਪਿਛੋਕੜ ਵਿਚ ਸ਼ੁਰੂ ਕੀਤੀਆਂ ਗਈਆਂ ਹਨ। ਸੰਯੁਕਤ ਅਰਬ ਅਮੀਰਾਤ ਇਸ ਸਮਾਗਮ ਦੀ ਮੇਜ਼ਬਾਨੀ ਲਈ ਸਭ ਤੋਂ ਅੱਗੇ ਆਇਆ ਹੈ, ਹਾਲਾਂਕਿ ਇਕ ਹਾਈਬ੍ਰਿਡ ਹੋਸਟਿੰਗ ਮਾਡਲ ਲਈ ਗੱਲਬਾਤ ਜਾਰੀ ਹੈ।
2023 ਦੇ ਏਸ਼ੀਆ ਕੱਪ ਵਿਚ ਵੀ ਇਸੇ ਤਰ੍ਹਾਂ ਦਾ ਹਾਈਬ੍ਰਿਡ ਮਾਡਲ ਵਰਤਿਆ ਗਿਆ ਸੀ, ਜਿਸ ਵਿਚ ਪਾਕਿਸਤਾਨ ਨੇ ਮੇਜ਼ਬਾਨੀ ਦੀਆਂ ਜ਼ਿੰਮੇਵਾਰੀਆਂ ਸੰਭਾਲੀਆਂ ਰੱਖੀਆਂ ਸਨ ਪਰ ਭਾਰਤ ਦੇ ਮੈਚ ਸ਼੍ਰੀਲੰਕਾ ਵਿਚ ਤਬਦੀਲ ਕਰ ਦਿਤੇ ਗਏ ਸਨ ਕਿਉਂਕਿ ਉਹ ਸਰਹੱਦ ਪਾਰ ਨਹੀਂ ਕਰਨਾ ਚਾਹੁੰਦੇ ਸਨ। ਇੱਥੋਂ ਤਕ ਕਿ ਫ਼ਾਈਨਲ ਵੀ, ਭਾਰਤ ਦੇ ਕੁਆਲੀਫਾਈ ਕਰਨ ਤੋਂ ਬਾਅਦ, ਸ਼੍ਰੀਲੰਕਾ ਵਿਚ ਤਬਦੀਲ ਕਰ ਦਿਤਾ ਗਿਆ ਸੀ।
ਰਾਜਨੀਤਕ ਤਣਾਅ ਵੀ ਖੇਡ ਨੂੰ ਪ੍ਰਭਾਵਿਤ ਕਰਦੇ ਰਹਿੰਦੇ ਹਨ
ਇਸ ਤੋਂ ਪਹਿਲਾਂ 2025 ਵਿਚ ਆਈਸੀਸੀ ਚੈਂਪੀਅਨਜ਼ ਟਰਾਫ਼ੀ ਦੇ ਨਾਲ ਵੀ ਇਸੇ ਤਰ੍ਹਾਂ ਦੀ ਘਟਨਾ ਵਾਪਰੀ ਸੀ। ਭਾਰਤ ਨੇ ਪਾਕਿਸਤਾਨ ਵਿਰੁਧ ਖੇਡਣ ਤੋਂ ਇਨਕਾਰ ਕਰ ਦਿਤਾ ਸੀ, ਜਿਸ ਕਾਰਨ ਆਈਸੀਸੀ ਨੂੰ ਦੋਹਰੀ ਮੇਜ਼ਬਾਨੀ ਵਾਲਾ ਫ਼ਾਰਮੈਟ ਅਪਣਾਉਣ ਲਈ ਮਜਬੂਰ ਹੋਣਾ ਪਿਆ। ਫ਼ਾਈਨਲ ਵਿਚ ਪਹੁੰਚਣ ਤੋਂ ਬਾਅਦ ਭਾਰਤ ਦੇ ਮੈਚ, ਫ਼ਾਈਨਲ ਸਮੇਤ, ਯੂਏਈ ਵਿਚ ਆਯੋਜਿਤ ਕੀਤੇ ਗਏ ਸਨ। ਉਸ ਟੂਰਨਾਮੈਂਟ ਵਿਚ ਪਹਿਲੀ ਵਾਰ ਦੋਹਰੀ ਮੇਜ਼ਬਾਨੀ ਵਾਲਾ ਫ਼ਾਰਮੈਟ ਵਿਚ ਆਈਸੀਸੀ ਈਵੈਂਟ ਆਯੋਜਿਤ ਕੀਤਾ ਗਿਆ ਸੀ। ਬਦਲੇ ਵਿਚ, ਪਾਕਿਸਤਾਨ ਨੇ ਬਾਅਦ ਵਿਚ 2027 ਵਿਚ ਚੱਲ ਰਹੇ ਫਿਊਚਰ ਟੂਰ ਪ੍ਰੋਗਰਾਮ (6“P) ਚੱਕਰ ਦੇ ਪੂਰਾ ਹੋਣ ਤਕ ਭਾਰਤ ਵਿੱਚ ਭਵਿੱਖ ਦੇ ਸਾਰੇ ਮੈਚਾਂ ਦਾ ਬਾਈਕਾਟ ਕਰਨ ਦਾ ਐਲਾਨ ਕੀਤਾ ਹੈ।
