ਭਾਰਤੀ ਟੀਮ ਦੀ ਪਕੜ ਮਜ਼ਬੂਤ, ਸਕੋਰ 300 ਤੋਂ ਪਾਰ
ਨਾਗਪੁਰ, 25 ਨਵੰਬਰ: ਭਾਰਤੀ ਟੀਮ ਨੇ ਨਾਗਪੁਰ ਟੈਸਟ 'ਚ ਅਪਣੀ ਪਕੜ ਮਜ਼ਬੂਤ ਕਰ ਲਈ ਹੈ। ਸ੍ਰੀਲੰਕਾ ਵਲੋਂ ਪਹਿਲੀ ਵਾਰੀ 'ਚ ਬਣਾਈਆਂ 205 ਦੌੜਾਂ ਦੇ ਜਵਾਬ 'ਚ ਵਿਰਾਟ ਬ੍ਰਿਗੇਡ ਨੇ ਮੈਚ ਦੇ ਦੂਜੇ ਦਿਨ ਸਟੰਪ ਦੇ ਸਮੇਂ ਤਕ ਦੋ ਵਿਕਟਾਂ ਗਵਾ ਕੇ 312 ਦੌੜਾਂ ਬਣਾ ਲਈ ਸਨ। ਮੁਰਲੀ ਵਿਜੇ (128) ਅਤੇ ਚੇਤੇਸ਼ਵਰ ਪੁਜਾਰਾ (ਨਾਬਾਦ 121) ਨੇ ਅੱਜ ਸੈਂਕੜੇ ਲਗਾਏ। ਇਨ੍ਹਾਂ ਦੋਵਾਂ ਨੇ ਦੂਜੀ ਵਿਕਟ ਲਈ 209 ਦੌੜਾਂ ਦੀ ਹਿੱਸੇਦਾਰੀ ਪਾਈ। ਦੂਜੇ ਦਿਨ ਦੀ ਖੇਡ ਸਮਾਪਤ ਹੋਣ ਸਮੇਂ ਚੇਤੇਸ਼ਵਰ ਪੁਜਾਰਾ ਨਾਲ ਕਪਤਾਨ ਵਿਰਾਟ ਕੋਹਲੀ 54 ਦੌੜਾਂ ਬਣਾ ਕੇ ਨਾਬਾਦ ਸਨ। ਭਾਰਤੀ ਟੀਮ ਦਾ ਵਾਧਾ 107 ਦੌੜਾਂ ਦਾ ਹੋ ਗਿਆ ਹੈ। ਮੈਚ ਦਾ ਦੂਜਾ ਦਿਨ ਪੂਰੀ ਤਰ੍ਹਾਂ ਭਾਰਤੀ ਟੀਮ ਦੇ ਨਾਮ ਰਿਹਾ।
ਸ੍ਰੀਲੰਕਾਈ ਗੇਂਦਬਾਜ਼ ਸਿਰਫ਼ ਇਕ ਵਿਕਟ ਪ੍ਰਾਪਤ ਕਰਨ ਸਕੇ। ਕਲਕੱਤਾ 'ਚ ਹੋਇਆ ਪਹਿਲਾ ਟੈਸਟ ਮੈਚ ਰੋਮਾਂਚਕ ਉਤਾਰ-ਚੜ੍ਹਾਅ ਤੋਂ ਬਾਅਦ ਡਰਾਅ ਹੋਇਆ ਸੀ।ਦੂਜੇ ਦਿਨ ਦਾ ਪਹਿਲਾ ਓਵਰ ਸ੍ਰੀਲੰਕਾ ਦੇ ਸੁਰੰਗਾ ਲਕਮਲ ਨੇ ਸੁਟਿਆ ਸੀ ਜਿਸ ਦੀ ਪਹਿਲੀ ਗੇਂਦ 'ਤੇ ਮੁਰਲੀ ਵਿਜੇ ਨੇ ਚੌਕਾ ਮਾਰ ਕੇ ਅੱਜ ਦੇ ਦਿਨ ਦੀ ਸ਼ੁਰੂਆਤ ਦੀ ਕਾਫ਼ੀ ਰੋਮਾਂਚਕ ਕੀਤੀ ਸੀ। ਦੂਜੇ ਦਿਨ ਭਾਰਤੀ ਟੀਮ ਦੀ ਸਥਿਤੀ ਕਾਫ਼ੀ ਮਜ਼ਬੂਤ ਹੈ। (ਏਜੰਸੀ)
