ਚੇਨੱਈ, 18 ਸਤੰਬਰ:
ਭਾਰਤੀ ਲੈੱਗ ਸਪਿੰਨਰ ਯੁਜਵੇਂਦਰ ਚਹਿਲ ਦਾ ਮੰਨਣਾ ਹੈ ਕਿ ਵਿਰਾਟ ਕੋਹਲੀ ਵਰਗੇ ਹਮਲਾਵਰ
ਕਪਤਾਨ ਦੀ ਅਗਵਾਈ 'ਚ ਖੇਡਣ ਨਾਲ ਉਹ ਅਪਣਾ ਸਰਵੋਤਮ ਪ੍ਰਦਰਸ਼ਨ ਕਰ ਪਾ ਰਹੇ ਹਨ ਅਤੇ ਅਸੀਂ
ਉਸ ਨੂੰ ਹੋਰ ਹਮਲਾਵਰ ਬਣਾ ਦਿਤਾ ਹੈ। ਕੱਲ੍ਹ ਰਾਤ ਪਹਿਲੇ ਇਕ ਦਿਨਾ ਅੰਤਰਰਾਸ਼ਟਰੀ ਮੈਚ 'ਚ
ਭਾਰਤ ਦੇ ਆਸਟ੍ਰੇਲੀਆ ਨੂੰ ਡਕਵਰਥ ਲੁਇਸ ਪੱਧਤੀ ਦੇ ਆਧਾਰ 'ਤੇ 26 ਦੌੜਾਂ ਨਾਲ ਹਰਾਉੁਣ
ਤੋਂ ਬਾਅਦ ਚਹਿਲ ਨੇ ਕਿਹਾ ਕਿ ਜਦੋਂ ਤੁਹਾਡਾ ਕਪਤਾਨ ਇੰਨਾ ਹਮਲਾਵਰ ਹੋਵੇ ਤਾਂ ਉਹ
ਤੁਹਾਨੂੰ ਅਪਣੀ ਗੇਂਦਬਾਜ਼ੀ ਨਾਲ ਹਮਲਾ ਕਰਨ ਦੀ ਪੂਰੀ ਛੋਟ ਦਿੰਦਾ ਹੈ। ਉਨ੍ਹਾਂ ਕਿਹਾ ਕਿ
ਪਰ ਕਦੇ ਕਦੇ ਸਾਨੂੰ ਵੀ ਪਿੱਛੇ ਹਟਣਾ ਪੈਂਦਾ ਹੈ ਅਤੇ ਅਪਣੀ ਯੋਜਨਾ ਬਦਲਣੀ ਪੈਂਦੀ ਹੈ।
ਪਹਿਲੇ
ਇਕ ਦਿਨਾ ਮੈਚ 'ਚ 30 ਦੌੜਾਂ ਦੇ ਕੇ ਤਿੰਨ ਵਿਕਟਾਂ ਲੈਣ ਵਾਲੇ ਚਹਿਲ ਨੇ ਕਿਹਾ ਕਿ ਦੂਜੇ
ਪਾਸਿਓਂ ਖੱਬੇ ਹੱਥੇ ਦੇ ਲੈੱਗ ਸਪਿੰਨਰ ਕੁਲਦੀਪ ਯਾਦਵ ਦੀ ਮੌਜੂਦਗੀ ਨਾਲ ਉਨ੍ਹਾਂ ਲਈ
ਚੀਜ਼ਾਂ ਆਸਾਨ ਹੋ ਗਈਆਂ ਅਤੇ ਜਦੋਂ ਦੋਵੇਂ ਇਕੱਠੇ ਗੇਂਦਬਾਜ਼ੀ ਕਰ ਰਹੇ ਸਨ ਤਾਂ ਉਨ੍ਹਾਂ ਨੇ
ਮੈਚ ਦੇ ਹਾਲਾਤ ਅਨੁਸਾਰ ਯੋਜਨਾ ਬਣਾਈ। (ਭਾਸ਼ਾ)
