ਨਵੀਂ ਦਿੱਲੀ, 13 ਨਵੰਬਰ: ਲਿਏਂਡਰ ਪੇਸ ਅਤੇ ਪੂਰਵ ਰਾਜਾ ਨੇ ਅਮਰੀਕਾ 'ਚ ਏ.ਟੀ.ਪੀ. ਨਾਕਸਵਿਲੇ ਚੈਲੰਜਰ ਟੂਰਨਾਮੈਂਟ ਦੇ ਪੁਰਸ਼ ਜੋੜੀ ਫ਼ਾਈਨਲ 'ਚ ਜਿਤ ਕੇ ਅਪਣਾ ਪਹਿਲਾ ਖ਼ਿਤਾਬ ਅਪਣੇ ਨਾਮ ਕਰ ਲਿਆ ਹੈ। ਪੇਸ ਅਤੇ ਰਾਜਾ ਨੇ ਅਮਰੀਕਨ ਆਸਟ੍ਰੇਲੀਅਨ ਜੋੜੀ ਜੇਮਜ਼ ਕੇਰੈਟਾਨੀ ਅਤੇ ਜਾਨ ਪੈਟ੍ਰਿਕ ਸਮਿਥ ਨੂੰ ਸਿੱਧੇ ਸੈਟਾਂ 'ਚ 7-6, 7-6 ਨਾਲ ਹਰਾਇਆ। ਅਗੱਸਤ 'ਚ ਜੋੜੀ ਬਣਾਉਣ ਤੋਂ ਬਾਅਦ ਪੇਸ ਅਤੇ ਰਾਜਾ ਨੇ ਪਹਿਲੀ ਵਾਰ ਕਿਸੇ ਟੂਰਨਾਮੈਂਟ ਦਾ ਖ਼ਿਤਾਬ ਅਪਣੇ ਨਾਮ ਕੀਤਾ ਹੈ। ਇਸ ਤੋਂ
ਪਹਿਲਾਂ ਪੇਸ ਅਤੇ ਰਾਜਾ ਦੀ ਜੋੜੀ ਇਸ 75,000 ਡਾਲਰ ਇਨਾਮੀ ਹਾਈ ਕੋਰਟ ਮੁਕਾਬਲੇ ਦੇ ਸੈਮੀਫ਼ਾਈਨਲ 'ਚ ਰੂਆਨ ਰੋਏਲੋਫ਼ਸ ਅਤੇ ਜੋ ਸੈਲਿਸਬਰੀ ਦੀ ਜੋੜੀ ਤੋਂ 7-6, 6-3 ਨਾਲ ਹਾਰੀ ਸੀ।ਪੇਸ ਨੇ ਮੌਜੂਦਾ ਸੈਸ਼ਨ 'ਚ ਤਿੰਨ ਚੈਲੰਜਰ ਖ਼ਿਤਾਬ ਜਿੱਤੇ ਹਨ। ਉਨ੍ਹਾਂ ਨੇ ਕੈਨੇਡਾ ਦੇ ਆਤਿਲ ਸ਼ਮਾਸਦੀਨ ਨਾਲ ਲਿਓਨ ਅਤੇ ਇਲਕਲੇ 'ਚ ਟੂਰਨਾਮੈਂਟ ਜਿੱਤੇ, ਜਦੋਂ ਕਿ ਅਮਰੀਕਾ ਦੇ ਸਕਾਟ ਲਿਪਸਕੀ ਨਾਲ ਤਾਲਾਹਾਸ਼ੀ ਟਰਾਫ਼ੀ ਜਿਤੀ। ਪੇਸ ਨਾਲ ਜੋੜੀ ਬਣਾਉਣ ਤੋਂ ਪਹਿਲਾਂ ਰਾਜਾ ਨੇ ਦਿਵਿਜ ਸ਼ਰਣ ਨਾਲ ਮਿਲ ਕੇ ਬੋਰਡਯੂ ਚੈਲੰਜਰ ਦਾ ਖ਼ਿਤਾਬ ਜਿਤਿਆ ਅਤੇ ਏ.ਟੀ.ਪੀ. 250 ਚੇਨੱਈ ਓਪਨ ਦੇ ਫ਼ਾਈਨਲ 'ਚ ਜਗ੍ਹਾ ਬਣਾਈ। (ਏਜੰਸੀ)
