ਸੱਸ ਅਤੇ ਨੂੰਹ ਵਿਚਕਾਰ ਲੰਮੇ ਸਮੇਂ ਤੋਂ ਚੱਲ ਰਿਹਾ ਸੀ ਝਗੜਾ
ਸਹਾਰਨਪੁਰ : ਸਹਾਰਨਪੁਰ ਜ਼ਿਲ੍ਹੇ ਦੇ ਗਗਲਹੇੜੀ ਥਾਣਾ ਖੇਤਰ ਦੇ ਪਿੰਡ ਕੁਤੁਬਪੁਰ ਕੁਸੇਨੀ ਵਿਚ ਸੱਸ ਨੇ ਅਪਣੇ ਪਤੀ ਅਤੇ ਧੀ ਨਾਲ ਮਿਲ ਕੇ ਅਪਣੀ ਨੂੰਹ ਨੂੰ ਸਬਕ ਸਿਖਾਉਣ ਲਈ ਅਪਣੀ 5 ਮਹੀਨੇ ਦੀ ਪੋਤੀ ਦਾ ਗਲਾ ਵੱਢ ਕੇ ਕਥਿਤ ਤੌਰ ’ਤੇ ਕਤਲ ਕਰ ਦਿਤਾ। ਪੋਤੀ ਦੀ ਦਾਦੀ, ਦਾਦਾ ਅਤੇ ਮਾਸੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਪੁਲਿਸ ਨੇ ਵੀਰਵਾਰ ਨੂੰ ਇਹ ਜਾਣਕਾਰੀ ਦਿਤੀ। ਪੁਲਿਸ ਅਨੁਸਾਰ, ਸੱਸ ਅਤੇ ਨੂੰਹ ਵਿਚਕਾਰ ਲੰਮੇ ਸਮੇਂ ਤੋਂ ਝਗੜਾ ਚੱਲ ਰਿਹਾ ਸੀ ਅਤੇ ਔਰਤ ਅਪਣੀ ਨੂੰਹ ਨੂੰ ਸਬਕ ਸਿਖਾਉਣਾ ਚਾਹੁੰਦੀ ਸੀ। ਪੁਲਿਸ ਨੇ ਕਿਹਾ ਕਿ ਇਸ ਦੁਸ਼ਮਣੀ ਕਾਰਨ ਸੱਸ ਨੇ ਅਪਣੇ ਪਤੀ ਅਤੇ ਧੀ ਨਾਲ ਮਿਲ ਕੇ ਬੁਧਵਾਰ ਨੂੰ ਕਥਿਤ ਅਪਰਾਧ ਕੀਤਾ।
ਸਹਾਰਨਪੁਰ ਦੇ ਸੀਨੀਅਰ ਪੁਲਿਸ ਸੁਪਰਡੈਂਟ (ਐਸਐਸਪੀ) ਰੋਹਿਤ ਸਜਵਾਨ ਨੇ ਦਸਿਆ ਕਿ ਪਿੰਡ ਕੁਤੁਬਪੁਰ ਕੁਸੇਨੀ ਵਿਚ 5 ਮਹੀਨੇ ਦੀ ਇਸ਼ੀਕਾ ਦਾ ਗਲਾ ਵੱਢ ਕੇ ਉਸ ਸਮੇਂ ਕਤਲ ਕਰ ਦਿਤਾ ਗਿਆ ਜਦੋਂ ਉਹ ਅਪਣੀ ਮਾਂ ਸ਼ਿਵਾਨੀ ਨਾਲ ਘਰ ਵਿਚ ਸੁੱਤੀ ਪਈ ਸੀ। ਉਨ੍ਹਾਂ ਦਸਿਆ ਕਿ ਜਦੋਂ ਸ਼ਿਵਾਨੀ ਸਵੇਰੇ ਉੱਠੀ ਤਾਂ ਉਸਨੇ ਬੱਚੀ ਨੂੰ ਖ਼ੂਨ ਨਾਲ ਲੱਥਪੱਥ ਪਾਇਆ ਜਿਸ ਤੋਂ ਬਾਅਦ ਪਰਵਾਰ ਉਸਨੂੰ ਹਸਪਤਾਲ ਲੈ ਗਿਆ ਜਿੱਥੇ ਡਾਕਟਰਾਂ ਨੇ ਉਸਨੂੰ ਮ੍ਰਿਤਕ ਐਲਾਨ ਦਿਤਾ। ਅਧਿਕਾਰੀ ਨੇ ਦਸਿਆ ਕਿ ਸ਼ਿਵਾਨੀ ਦਾ ਪਤੀ ਕੇਰਲ ’ਚ ਸੈਲੂਨ ਚਲਾਉਂਦਾ ਹੈ ਅਤੇ ਉੱਥੇ ਹੀ ਰਹਿੰਦਾ ਹੈ।
ਸਜਵਾਨ ਨੇ ਕਿਹਾ ਕਿ ਪੁਛਗਿਛ ਦੌਰਾਨ, ਲੜਕੀ ਦੀ ਦਾਦੀ ਸਰਿਤਾ ਨੇ ਅਪਰਾਧ ਕਰਨਾ ਸਵੀਕਾਰ ਕਰ ਲਿਆ ਅਤੇ ਦਸਿਆ ਕਿ ਉਹ ਅਪਣੀ ਪੋਤੀ ਦਾ ਕਤਲ ਕਰ ਕੇ ਅਪਣੀ ਨੂੰਹ ਨੂੰ ਝੂਠੇ ਮਾਮਲੇ ਵਿਚ ਫਸਾਉਣਾ ਚਾਹੁੰਦੀ ਸੀ।
ਐਸਐਸਪੀ ਨੇ ਦਸਿਆ ਕਿ ਸਰਿਤਾ ਨੇ ਰਾਤ ਨੂੰ ਚਾਹ ’ਚ ਨੀਂਦ ਦੀਆਂ ਗੋਲੀਆਂ ਮਿਲਾ ਕੇ ਸ਼ਿਵਾਨੀ ਨੂੰ ਦਿਤੀਆਂ ਤਾਂ ਜੋ ਉਹ ਜਾਗ ਨਾ ਸਕੇ ਅਤੇ ਸਵੇਰੇ ਚਾਰ ਵਜੇ ਉਹ ਅਪਣੀ ਨੂੰਹ ਦੇ ਕਮਰੇ ’ਚ ਗਈ ਤੇ ਇਸ਼ਿਕਾ ਦਾ ਮੂੰਹ ਦਬਾਉਣ ਤੋਂ ਬਾਅਦ, ਉਸਦੇ ਪਤੀ ਧਰਮਿੰਦਰ ਦੁਆਰਾ ਦਿਤੇ ਬਲੇਡ ਨਾਲ ਉਸਦਾ ਗਲਾ ਵੱਢ ਦਿਤਾ। ਸ਼ਿਵਾਨੀ ਨੇ ਦੋਸ਼ ਲਗਾਇਆ ਕਿ ਉਸਨੇ ਅਪਣੀ ਸੱਸ ਨੂੰ ਕਿਸੇ ਹੋਰ ਵਿਅਕਤੀ ਨਾਲ ਇਤਰਾਜ਼ਯੋਗ ਹਾਲਤ ਵਿਚ ਦੇਖਿਆ ਸੀ, ਜਿਸ ਤੋਂ ਬਾਅਦ ਉਸਨੂੰ ਉਸ ਨਾਲ ਨਫ਼ਰਤ ਹੋ ਗਈ।
