ਅਮਰੀਕਾ ਵਿਚ ਭਾਰਤੀ ਮੂਲ ਦੇ ਇਕ ਅਮਰੀਕੀ ਬੱਚੇ ਨੇ 'ਸਕਰਿਪਸ ਸਪੈਲਿੰਗ ਬੀ ਮੁਕਾਬਲੇ' ਦਾ ਖ਼ਿਤਾਬ ਜਿਤਿਆ ਹੈ। ਕੋਈਨੋਨੀਆ ਸ਼ਬਦ ਦੇ ਸਹੀ ਸਪੈਲਿੰਗ ਅਤੇ ...
ਹਿਊਸਟਨ: ਅਮਰੀਕਾ ਵਿਚ ਭਾਰਤੀ ਮੂਲ ਦੇ ਇਕ ਅਮਰੀਕੀ ਬੱਚੇ ਨੇ 'ਸਕਰਿਪਸ ਸਪੈਲਿੰਗ ਬੀ ਮੁਕਾਬਲੇ' ਦਾ ਖ਼ਿਤਾਬ ਜਿਤਿਆ ਹੈ। ਕੋਈਨੋਨੀਆ ਸ਼ਬਦ ਦੇ ਸਹੀ ਸਪੈਲਿੰਗ ਅਤੇ ਅਰਥ ਦਸ ਕੇ 14 ਸਾਲਾ ਕਾਰਤਿਕ ਨਾਂ ਦੇ ਬੱਚੇ ਨੇ ਇਸ ਖ਼ਿਤਾਬ ਨੂੰ ਜਿਤਿਆ ਹੈ, ਜੋ ਭਾਰਤੀਆਂ ਲਈ ਬਹੁਤ ਮਾਣ ਵਾਲੀ ਗੱਲ ਹੈ। ਉਸ ਨੇ ਤਕਰੀਬਨ 42,000 ਡਾਲਰ ਦੀ ਨਕਦ ਰਾਸ਼ੀ ਅਤੇ ਹੋਰ ਕਈ ਇਨਾਮ ਜਿੱਤੇ।
ਕੋਈਨੋਨੀਆ ਦਾ ਅਰਥ ਈਸਾਈ ਮੇਲਜੋਲ ਜਾਂ ਸਮਾਗਮ ਹੁੰਦਾ ਹੈ। ਕਾਰਤਿਕ ਇਸ ਖ਼ਿਤਾਬ ਨੂੰ ਜਿੱਤਣ ਵਾਲਾ ਪਿਛਲੇ ਲਗਾਤਾਰ 11 ਸਾਲਾਂ ਵਿਚ ਭਾਰਤੀ ਭਾਈਚਾਰੇ ਦਾ 14ਵਾਂ ਜੇਤੂ ਰਿਹਾ ਹੈ। ਮੁਕਾਬਲੇ ਦੌਰਾਨ ਕਈ ਦੌਰ ਚਲੇ । ਟੈਕਸਾਸ ਦੇ ਮੈਕਕਿਨੀ ਵਿਚ ਰਹਿਣ ਵਾਲੇ 8ਵੀਂ ਜਮਾਤ ਦੇ ਕਾਰਤਿਕ ਦਾ ਮੁਕਾਬਲਾ ਇਕ ਹੋਰ ਭਾਰਤੀ ਬੱਚੀ ਨਿਆਸਾ ਮੋਦੀ ਨਾਲ ਸੀ। ਸ਼ੁਰੂਆਤੀ 516 ਪ੍ਰਤੀਯੋਗੀਆਂ ਵਿਚੋਂ ਅੰਤਮ ਦੋ ਤਕ ਪੁਜਣ ਵਾਲੇ ਕਾਰਤਿਕ ਅਤੇ ਨਿਆਸਾ ਹੀ ਸਨ। ਕਾਰਤਿਕ ਨੇ ਕਿਹਾ, ''ਮੈਨੂੰ ਯਕੀਨ ਤਾਂ ਸੀ ਕਿ ਮੈਂ ਜਿੱਤਾਂਗਾ ਪਰ ਮੈਂ ਸੋਚਿਆ ਨਹੀਂ ਸੀ ਕਿ ਇਹ ਸੱਚ-ਮੁੱਚ ਹੋ ਜਾਵੇਗਾ।'' (ਪੀ.ਟੀ.ਆਈ)
