ਇਹ ਘਟਨਾ 30 ਜਨਵਰੀ ਦੀ ਹੈ। ਬਾਅਦ ਵਿਚ ਜਦੋਂ ਘਰ ਦਾ ਮਾਲਕ ਵਾਪਸ ਆਇਆ ਤਾਂ ਉਸ ਨੂੰ ਇਹ ਚੋਰ ਮਿਲਿਆ।
ਵਾਸ਼ਿੰਗਟਨ : ਅਮਰੀਕਾ ਦੇ ਨਿਊ ਮੈਕਸੀਕੋ ਵਿਚ ਚੋਰੀ ਦਾ ਇਕ ਅਨੋਖਾ ਮਾਮਲਾ ਸਾਹਮਣੇ ਆਇਆ ਹੈ। ਇਕ ਹਥਿਆਰਬੰਦ ਚੋਰ ਇਕ ਘਰ ਖ਼ਾਲੀ ਦੇਖ ਕੇ ਉਸ ਵਿਚ ਦਾਖ਼ਲ ਹੋ ਗਿਆ। ਚੋਰ ਨੇ ਘਰ ਵਿਚ ਇਸ਼ਨਾਨ ਕੀਤਾ, ਬੀਅਰ ਪੀਤੀ ਅਤੇ ਖਾਣਾ ਖਾਧਾ। ਇਸ ਮਗਰੋਂ ਉਹ ਘਰ ਦੇ ਮਾਲਕ ਨੂੰ 200 ਡਾਲਰ ਮਤਲਬ ਕਰੀਬ 15 ਹਜ਼ਾਰ ਰੁਪਏ ਦੇ ਕੇ ਚਲਾ ਗਿਆ। ਅਸਲ ਵਿਚ ਚੋਰ ਤੋਂ ਖਿੜਕੀ ਦਾ ਸ਼ੀਸ਼ਾ ਟੁੱਟ ਗਿਆ ਸੀ ਅਤੇ ਉਸ ਦੇ ਹਰਜਾਨੇ ਦੇ ਤੌਰ ’ਤੇ ਉਸ ਨੇ ਇਹ ਰਾਸ਼ੀ ਦਿਤੀ। ਬਾਅਦ ਵਿਚ ਇਸ ਅਨੋਖੇ ਚੋਰ ਦੀ ਪਛਾਣ 34 ਸਾਲ ਦੇ ਤੇਰਾਲ ਕ੍ਰਿਸਟੇਸ਼ਨ ਦੇ ਤੌਰ ’ਤੇ ਹੋਈ।
Thief
ਦਸਿਆ ਜਾ ਰਿਹਾ ਹੈ ਕਿ ਇਹ ਘਟਨਾ 30 ਜਨਵਰੀ ਦੀ ਹੈ। ਬਾਅਦ ਵਿਚ ਜਦੋਂ ਘਰ ਦਾ ਮਾਲਕ ਵਾਪਸ ਆਇਆ ਤਾਂ ਉਸ ਨੂੰ ਇਹ ਚੋਰ ਮਿਲਿਆ। ਇਹ ਚੋਰ ਖਿੜਕੀ ਤੋੜ ਕੇ ਘਰ ਵਿਚ ਦਾਖ਼ਲ ਹੋਇਆ ਸੀ। ਤੇਰਾਲ ਨੇ ਏਆਰ-15 ਰਾਈਫ਼ਲ ਰੱਖੀ ਹੋਈ ਸੀ। ਉਸ ਨੇ ਘਰ ਵਿਚੋਂ ਕੱੁਝ ਚੋਰੀ ਨਹੀਂ ਕੀਤਾ ਸੀ। ਬਾਅਦ ਵਿਚ ਚੋਰ ਨੇ ਘਰ ਦੇ ਮਾਲਕਾਂ ਤੋਂ ਘਰ ਵਿਚ ਜ਼ਬਰਦਸਤੀ ਦਾਖ਼ਲ ਹੋਣ ਲਈ ਮੁਆਫ਼ੀ ਮੰਗ ਲਈ। ਚੋਰ ਨੇ ਦਸਿਆ ਕਿ ਉਸ ਨੂੰ ਰਾਤ ਵੇਲੇ ਸੋਣ ਲਈ ਇਕ ਗਰਮ ਜਗ੍ਹਾ ਦੀ ਲੋੜ ਸੀ, ਇਸ ਲਈ ਉਹ ਘਰ ਵਿਚ ਦਾਖ਼ਲ ਹੋ ਗਿਆ।
Thief
ਚੋਰ ਨੇ ਘਰ ਦੇ ਮਾਲਕਾਂ ਨੂੰ ਖਿੜਕੀ ਦੇ ਨੁਕਸਾਨ ਦੇ ਹਰਜਾਨੇ ਦੇ ਤੌਰ ’ਤੇ 200 ਡਾਲਰ ਵੀ ਦਿਤੇ। ਇਸ ਘਰ ਦੇ ਮਾਲਕ ਸਾਂਤਾ ਫੇ ਨਿਊ ਮੈਕਸੀਕਨ ਮੁਤਾਬਕ ਕੁਲ ਨੁਕਸਾਨ ਕਰੀਬ 200 ਡਾਲਰ ਦਾ ਸੀ। ਬਾਅਦ ਵਿਚ ਚੋਰ ਅਪਣੀ ਰਾਈਫ਼ਲ ਅਤੇ ਬੈਗ ਲੈ ਕੇ ਘਰੋਂ ਚਲਾ ਗਿਆ। ਚੋਰ ਨੇ ਘਰ ਦੇ ਮਾਲਕਾਂ ਨੂੰ ਘਰ ਛੱਡਣ ਤੋਂ ਪਹਿਲਾਂ ਚੋਰ ਨੇ ਅਪਣੇ ਪਰਵਾਰ ਦੀ ਕਹਾਣੀ ਵੀ ਦੱਸੀ। ਉਸ ਨੇ ਦਸਿਆ ਕਿ ਪੂਰਬੀ ਟੈਕਸਾਸ ਵਿਚ ਉਸ ਦੇ ਪਰਵਾਰ ਦਾ ਕਤਲ ਕਰ ਦਿਤਾ ਗਿਆ ਹੈ ਅਤੇ ਉਹ ਕਿਸੇ ਤੋਂ ਲੁਕ ਕੇ ਭੱਜ ਰਿਹਾ ਹੈ। ਚੋਰ ਨੇ ਇਹ ਵੀ ਦਸਿਆ ਕਿ ਕਸਬੇ ਦੇ ਬਾਹਰ ਹੀ ਉਸ ਦੀ ਕਾਰ ਖ਼ਰਾਬ ਹੋ ਗਈ।
Thief
ਇਸ ਮਗਰੋਂ ਅਗਲੇ ਦਿਨ ਪੁਲਿਸ ਨੂੰ ਇਕ ਕਾਰ ਚੋਰੀ ਦੀ ਖ਼ਬਰ ਮਿਲੀ। ਚੋਰ ਦਾ ਹੁਲੀਆ ਵੀ ਘਰ ਵਿਚ ਚੋਰੀ ਕਰਨ ਵਾਲੇ ਨਾਲ ਮਿਲਦਾ ਸੀ। ਮੰਨਿਆ ਜਾ ਰਿਹਾ ਹੈ ਕਿ ਚੋਰ ਇਕ ਔਰਤ ਨੂੰ ਲੈ ਕੇ ਰੈਸਟੋਰੈਂਟ ਪਹੁੰਚਿਆ ਅਤੇ ਔਰਤ ਨੂੰ ਕਾਰ ਤੋਂ ਉਤਰਨ ਲਈ ਕਿਹਾ। ਜਦੋਂ ਉਸ ਨੇ ਅਪਣੇ ਬਚਾਅ ਲਈ ਹਾਰਨ ਵਜਾਉਣਾ ਸ਼ੁਰੂ ਕੀਤਾ ਉਦੋਂ ਉਹ ਭੱਜ ਗਿਆ। ਬਾਅਦ ਵਿਚ ਪੁਲਿਸ ਨੂੰ ਇਹ ਚੋਰ ਕਸਬੇ ਦੀ ਸੜਕ ’ਤੇ ਘੁੰਮਦੇ ਹੋਏ ਮਿਲਿਆ। ਉਸ ਨੇ ਅਪਣਾ ਅਪਰਾਧ ਸਵੀਕਾਰ ਕਰ ਲਿਆ।
