ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਇਕ ਵਾਰ ਫਿਰ ਸੋਸ਼ਲ ਨੈੱਟਵਰਕਿੰਗ ਵੈੱਬਸਾਈਟ ਫੇਸਬੁੱਕ ਅਤੇ ਟਵਿਟਰ ਦੇ ਨਿਸ਼ਾਨੇ ‘ਤੇ ਆ ਗਏ ਹਨ।
ਵਾਸ਼ਿੰਗਟਨ: ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਇਕ ਵਾਰ ਫਿਰ ਸੋਸ਼ਲ ਨੈੱਟਵਰਕਿੰਗ ਵੈੱਬਸਾਈਟ ਫੇਸਬੁੱਕ ਅਤੇ ਟਵਿਟਰ ਦੇ ਨਿਸ਼ਾਨੇ ‘ਤੇ ਆ ਗਏ ਹਨ। ਇਹਨਾਂ ਦੋਵੇਂ ਵੈੱਬਸਾਈਟਾਂ ਨੇ ਕੋਰੋਨਾ ਵਾਇਰਸ ਸਬੰਧੀ ਗਲਤ ਜਾਣਕਾਰੀ ਫੈਲਾਉਣ ਦੇ ਅਰੋਪ ਵਿਚ ਟਰੰਪ ਦੀਆਂ ਪੋਸਟਾਂ ਹਟਾ ਦਿੱਤੀਆਂ ਹਨ।
Donald Trump
ਟਰੰਪ ਦੀ ਪੋਸਟ ਵਿਚ ਦਾਅਵਾ ਕੀਤਾ ਗਿਆ ਸੀ ਕਿ ਕੋਰੋਨਾ ਵਾਇਰਸ ਦਾ ਅਸਰ ਬੱਚਿਆਂ ‘ਤੇ ਨਹੀਂ ਪੈਂਦਾ ਹੈ ਅਤੇ ਉਹਨਾਂ ਵਿਚ ਇਸ ਨਾਲ ਲੜਨ ਦੀ ਸਮਰੱਥਾ ਹੁੰਦੀ ਹੈ ਪਰ ਅਮਰੀਕਾ ਵੱਲੋਂ ਅਜਿਹੀ ਕੋਈ ਸਲਾਹ ਜਾਰੀ ਨਹੀਂ ਕੀਤੀ ਗਈ ਹੈ। ਇਸ ਲਈ ਟਰੰਪ ਦੀ ਪੋਸਟ ਨੂੰ ਤੁਰੰਤ ਹਟਾ ਦਿੱਤਾ ਗਿਆ।
Twitter
ਫੇਸਬੁੱਕ ਨੇ ਕੀ ਕਿਹਾ?
ਫੇਸਬੁੱਕ ਵੱਲੋਂ ਅਜਿਹਾ ਪਹਿਲੀ ਵਾਰ ਕੀਤਾ ਗਿਆ ਹੈ ਕਿ ਜਦੋਂ ਕੋਰੋਨਾ ਵਾਇਰਸ ਸਬੰਧੀ ਗਲਤ ਜਾਣਕਾਰੀ ਫੈਲਾਉਣ ਦੇ ਚਲਦਿਆਂ ਟਰੰਪ ਦੇ ਪੋਸਟ ਨੂੰ ਹਟਾਇਆ ਗਿਆ ਹੋਵੇ। ਫੇਸਬੁੱਕ ਦੇ ਇਕ ਬੁਲਾਰੇ ਨੇ ਬੁੱਧਵਾਰ ਨੂੰ ਕਿਹਾ, ‘ਇਹ ਵੀਡੀਓ ਝੂਠਾ ਦਾਅਵਾ ਕਰਦਾ ਹੈ। ਇਹ ਵੀਡੀਓ ਸਾਡੀਆਂ ਨੀਤੀਆਂ ਦੀ ਉਲੰਘਣਾ ਹੈ’। ਦੇਰ ਸ਼ਾਮ ਤੱਕ ਟਵਿਟਰ ਨੇ ਵੀ ਉਹਨਾਂ ਦੀ ਪੋਸਟ ਨੂੰ ਹਟਾ ਦਿੱਤਾ।
Facebook
ਟਰੰਪ ਨੇ ਕੀ ਕਿਹਾ ਸੀ
ਬੁੱਧਵਾਰ ਸਵੇਰੇ ਇਕ ਚੈਨਲ ਨੂੰ ਦਿੱਤੇ ਗਏ ਇੰਟਰਵਿਊ ਵਿਚ ਟਰੰਪ ਨੇ ਤਰਕ ਦਿੱਤਾ ਕਿ ਦੇਸ਼ ਭਰ ਵਿਚ ਹੁਣ ਸਾਰੇ ਸਕੂਲਾਂ ਨੂੰ ਖੋਲ੍ਹਣ ਦਾ ਸਮਾਂ ਆ ਗਿਆ ਹੈ। ਉਹਨਾਂ ਨੇ ਕਿਹਾ ਕਿ ਬੱਚਿਆਂ ਵਿਚ ਕੋਰੋਨਾ ਵਾਇਰਸ ਨਾਲ ਲੜਨ ਦੀ ਸਮਰੱਥਾ ਹੈ। ਪਰ ਨਾ ਤਾਂ ਵਿਸ਼ਵ ਸਿਹਤ ਸੰਗਠਨ ਵੱਲੋਂ ਕੋਈ ਅਜਿਹਾ ਬਿਆਨ ਜਾਰੀ ਕੀਤਾ ਗਿਆ ਤੇ ਨਾ ਹੀ ਅਮਰੀਕਾ ਵੱਲੋਂ ਕੋਈ ਅਜਿਹੀ ਜਾਣਕਾਰੀ ਜਾਰੀ ਕੀਤੀ ਗਈ।
Post
ਪਹਿਲਾਂ ਵੀ ਹੋਈ ਹੈ ਕਾਰਵਾਈ
ਇਸ ਤੋਂ ਪਹਿਲਾਂ ਵੀ ਮਈ ਵਿਚ ਟਵਿਟਰ ਨੇ ਡੋਨਾਲਡ ਟਰੰਪ ਦੇ ਦੋ ਟਵੀਟ ‘ਗਲਤ ਜਾਣਕਾਰੀ ਫੈਲਾਉਣ ਵਾਲੇ’ ਦੱਸੇ ਸਨ। ਟਵਿਟਰ ਨੇ ਇਸ ਵਾਰ ਟਰੰਪ ਦੇ ਟਵੀਟ ਦੇ ਨਾਲ ‘ਫੈਕਟ ਚੈੱਕ’ ਚੇਤਾਵਨੀ ਵੀ ਲਗਾ ਦਿੱਤੀ ਹੈ। ਟਵਿਟਰ ਦੇ ਇਸ ਕਦਮ ਤੋਂ ਬਾਅਦ ਟਰੰਪ ਭੜਕ ਗਏ ਅਤੇ ਉਹਨਾਂ ਨੇ ਟਵਿਟਰ ਦੇ ‘ਫੈਕਟ ਚੈੱਕ’ ਨੂੰ ਹੀ ਗਲਤ ਠਹਿਰਾ ਦਿੱਤਾ ਹੈ।
