ਪਾਕਿਸਤਾਨੀ ਮਰੀਨ ਨੇ ਗੁਜਰਾਤ ਦੇ ਦਵਾਰਕਾ 'ਚ 'ਜਲਪਰੀ' ਨਾਂ ਦੀ ਕਿਸ਼ਤੀ 'ਤੇ ਗੋਲੀਬਾਰੀ ਕੀਤੀ।
ਇਸਲਾਮਾਬਾਦ : ਪਾਕਿਸਤਾਨੀ ਜਲ ਸੈਨਾ ਨੇ ਐਤਵਾਰ ਨੂੰ ਇਕ ਭਾਰਤੀ ਕਿਸ਼ਤੀ 'ਤੇ ਗੋਲੀਬਾਰੀ ਕੀਤੀ। ਗੁਜਰਾਤ ਤੱਟ ਨੇੜੇ ਗੋਲੀਬਾਰੀ ਵਿਚ ਇੱਕ ਭਾਰਤੀ ਮਛੇਰੇ ਦੀ ਮੌਤ ਹੋ ਗਈ ਹੈ। ਪਾਕਿਸਤਾਨੀ ਮਰੀਨ ਨੇ ਗੁਜਰਾਤ ਦੇ ਦਵਾਰਕਾ 'ਚ 'ਜਲਪਰੀ' ਨਾਂ ਦੀ ਕਿਸ਼ਤੀ 'ਤੇ ਗੋਲੀਬਾਰੀ ਕੀਤੀ। ਜਾਣਕਾਰੀ ਅਨੁਸਾਰ ਸ਼੍ਰੀਧਰ ਨਾਂ ਦੇ ਮਛੇਰੇ ਦੀ ਮੌਤ ਹੋ ਗਈ ਅਤੇ ਇਕ ਹੋਰ ਜ਼ਖ਼ਮੀ ਹੋ ਗਿਆ ਹੈ। ਪਾਕਿਸਤਾਨ ਪਹਿਲਾਂ ਹੀ ਭਾਰਤੀ ਮਛੇਰਿਆਂ ਨੂੰ ਗ੍ਰਿਫ਼ਤਾਰ ਕਰਨ ਅਤੇ ਕਿਸ਼ਤੀਆਂ ਜ਼ਬਤ ਕਰਨ ਵਰਗੀਆਂ ਕਾਰਵਾਈਆਂ ਕਰ ਚੁੱਕਾ ਹੈ।
Fishermen
ਇਸ ਤੋਂ ਪਹਿਲਾਂ ਮਾਰਚ ਵਿਚ ਪਾਕਿਸਤਾਨ ਨੇ 11 ਭਾਰਤੀ ਮਛੇਰਿਆਂ ਨੂੰ ਗ੍ਰਿਫ਼ਤਾਰ ਕੀਤਾ ਸੀ ਅਤੇ ਉਨ੍ਹਾਂ ਦੀਆਂ ਦੋ ਕਿਸ਼ਤੀਆਂ ਜ਼ਬਤ ਕੀਤੀਆਂ ਸਨ। ਫਰਵਰੀ ਵਿਚ ਵੀ ਪਾਕਿਸਤਾਨ ਨੇ 17 ਭਾਰਤੀ ਮਛੇਰਿਆਂ ਨੂੰ ਦੇਸ਼ ਦੇ ਜਲ ਖੇਤਰ ਵਿਚ ਦਾਖ਼ਲ ਹੋਣ ਦੇ ਦੋਸ਼ ਵਿਚ ਗ੍ਰਿਫ਼ਤਾਰ ਕੀਤਾ ਸੀ ਅਤੇ ਉਨ੍ਹਾਂ ਦੀਆਂ ਤਿੰਨ ਕਿਸ਼ਤੀਆਂ ਜ਼ਬਤ ਕਰ ਲਈਆਂ ਸਨ।
ਪਾਕਿਸਤਾਨ ਅਤੇ ਭਾਰਤ ਅਰਬ ਸਾਗਰ ਵਿਚ ਸਪੱਸ਼ਟ ਸਮੁੰਦਰੀ ਸੀਮਾ ਨਾ ਹੋਣ ਕਾਰਨ ਅਕਸਰ ਇੱਕ ਦੂਜੇ ਦੇ ਮਛੇਰਿਆਂ ਨੂੰ ਗ੍ਰਿਫ਼ਤਾਰ ਕਰਦੇ ਹਨ। ਇਸ ਤੋਂ ਇਲਾਵਾ ਮਛੇਰਿਆਂ ਕੋਲ ਉਨ੍ਹਾਂ ਦੀ ਸਹੀ ਸਥਿਤੀ ਜਾਣਨ ਲਈ ਤਕਨਾਲੋਜੀ ਨਾਲ ਲੈਸ ਕਿਸ਼ਤੀਆਂ ਨਹੀਂ ਹਨ। ਸੁਸਤ ਨੌਕਰਸ਼ਾਹੀ ਅਤੇ ਲੰਬੀਆਂ ਕਾਨੂੰਨੀ ਪ੍ਰਕਿਰਿਆਵਾਂ ਦੇ ਕਾਰਨ, ਮਛੇਰੇ ਆਮ ਤੌਰ 'ਤੇ ਕਈ ਮਹੀਨਿਆਂ ਅਤੇ ਕਈ ਵਾਰ ਸਾਲਾਂ ਤੱਕ ਜੇਲ੍ਹਾਂ ਵਿਚ ਬੰਦ ਹੁੰਦੇ ਹਨ।
