ਕਿਹਾ, ‘‘ਜਦੋਂ ਜਰਮਨੀ ’ਚ ਲੋਕਾਂ ਕੋਲ ਦੋ ਕਾਰਾਂ ਹਨ ਤਾਂ ਭਾਰਤੀਆਂ ਕੋਲ ਵੀ ਇਕ ਕਾਰ ਹੋਣੀ ਚਾਹੀਦੀ ਹੈ
United Nations Climate Change Conference in Dubai: ਯੂਰਪੀਅਨ ਸੰਸਦ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਸ਼ਨਿਚਰਵਾਰ ਨੂੰ ਕਿਹਾ ਕਿ ਭਾਰਤ ’ਚ ਪ੍ਰਤੀ ਵਿਅਕਤੀ ਕਾਰਬਨ ਨਿਕਾਸ ‘ਬਹੁਤ ਘੱਟ’ ਹੈ, ਇਸ ਲਈ ਇਸ ਨੂੰ ਚੀਨ ਅਤੇ ਅਮਰੀਕਾ ਵਰਗੇ ਦੇਸ਼ਾਂ ਨਾਲ ਜੋੜਨਾ ਪੂਰੀ ਤਰ੍ਹਾਂ ਨਾਮਨਜ਼ੂਰ ਹੈ।
ਜਰਮਨੀ ਦੇ ਨੇਤਾ ਅਤੇ ਯੂਰਪੀਅਨ ਸੰਸਦ ਦੇ ਮੈਂਬਰ ਪੀਟਰ ਲੀਸੇ ਨੇ ਸੰਯੁਕਤ ਰਾਸ਼ਟਰ ਜਲਵਾਯੂ ਸੰਮੇਲਨ ’ਚ ਕਿਹਾ, ‘‘ਜਦੋਂ ਜਰਮਨੀ ’ਚ ਲੋਕਾਂ ਕੋਲ ਦੋ ਕਾਰਾਂ ਹਨ ਤਾਂ ਭਾਰਤੀਆਂ ਕੋਲ ਵੀ ਇਕ ਕਾਰ ਹੋਣੀ ਚਾਹੀਦੀ ਹੈ।’’ ਘੱਟ ਪ੍ਰਤੀ ਵਿਅਕਤੀ ਨਿਕਾਸ ਦੇ ਬਾਵਜੂਦ, ਜਲਵਾਯੂ ਸਿਖਰ ਸੰਮੇਲਨ ਨੇ ਭਾਰਤ ਨੂੰ ਅਮਰੀਕਾ ਵਰਗੇ ਪ੍ਰਮੁੱਖ ਪ੍ਰਦੂਸ਼ਕਾਂ ਨਾਲ ਜੋੜਨ ਲਈ ਠੋਸ ਯਤਨ ਕੀਤੇ ਹਨ।
ਉਨ੍ਹਾਂ ਕਿਹਾ, ‘‘ਹਰ ਕਿਸੇ ਲਈ ਇਹ ਮਨਜ਼ੂਰ ਕਰਨਾ ਬਹੁਤ ਮਹੱਤਵਪੂਰਨ ਹੈ ਕਿ ਸੰਯੁਕਤ ਅਰਬ ਅਮੀਰਾਤ, ਚੀਨ ਅਤੇ ਅਮਰੀਕਾ ਦੇ ਪ੍ਰਤੀ ਵਿਅਕਤੀ ਨਿਕਾਸ ਭਾਰਤ ਤੋਂ ਬਹੁਤ ਵੱਖਰੇ ਹਨ। ਯੂਰਪ ਵਿਚ ਬਹੁਤ ਸਾਰੇ ਲੋਕ ਚੀਨ ਅਤੇ ਭਾਰਤ ਨੂੰ ਅਤੇ ਕਈ ਵਾਰ ਖਾੜੀ ਦੇਸ਼ਾਂ ਨੂੰ ਇਕੋ ਨਜ਼ਰ ਨਾਲ ਦੇਖਦੇ ਹਨ, ਜੋ ਪੂਰੀ ਤਰ੍ਹਾਂ ਅਸਵੀਕਾਰਯੋਗ ਹੈ। ਇਨ੍ਹਾਂ ਦੇਸ਼ਾਂ ਦੇ ਮੁਕਾਬਲੇ ਭਾਰਤ ’ਚ ਪ੍ਰਤੀ ਵਿਅਕਤੀ ਨਿਕਾਸ ਬਹੁਤ ਘੱਟ ਹੈ।’’
ਵਿਗਿਆਨੀਆਂ ਦੀ ਇਕ ਆਲਮੀ ਟੀਮ ਵਲੋਂ ਇਸ ਹਫਤੇ ਦੇ ਸ਼ੁਰੂ ’ਚ ਜਾਰੀ ਇਕ ਰੀਪੋਰਟ ਮੁਤਾਬਕ ਭਾਰਤ ’ਚ ਪ੍ਰਤੀ ਵਿਅਕਤੀ ਕਾਰਬਨ ਡਾਈਆਕਸਾਈਡ ਦਾ ਨਿਕਾਸ ਪਿਛਲੇ ਸਾਲ ਲਗਭਗ 5 ਫ਼ੀ ਸਦੀ ਵਧ ਕੇ 2 ਟਨ ਕਾਰਬਨ ਡਾਈਆਕਸਾਈਡ ਤਕ ਪਹੁੰਚ ਗਿਆ ਪਰ ਇਹ ਅਜੇ ਵੀ ਗਲੋਬਲ ਔਸਤ ਦੇ ਅੱਧੇ ਤੋਂ ਵੀ ਘੱਟ ਹੈ। ਵਿਗਿਆਨੀਆਂ ਨੇ ਕਿਹਾ ਕਿ ਪ੍ਰਤੀ ਵਿਅਕਤੀ ਨਿਕਾਸ ਚਾਰਟ ਵਿਚ ਅਮਰੀਕਾ ਸਭ ਤੋਂ ਉੱਪਰ ਹੈ, ਜਿੱਥੇ ਦੇਸ਼ ਵਿਚ ਹਰ ਵਿਅਕਤੀ 14.9 ਟਨ ਕਾਰਬਨ ਡਾਈਆਕਸਾਈਡ ਦਾ ਨਿਕਾਸ ਕਰਦਾ ਹੈ। ਇਸ ਤੋਂ ਬਾਅਦ ਰੂਸ (11.4), ਜਾਪਾਨ (8.5), ਚੀਨ (8) ਅਤੇ ਯੂਰਪੀਅਨ ਯੂਨੀਅਨ (6.2) ਦਾ ਨੰਬਰ ਆਉਂਦਾ ਹੈ। ਗਲੋਬਲ ਔਸਤ 4.7 ਟਨ ਰਹੀ ਹੈ।
(For more news apart from India is 110th with a mere 1.74 tons per capita, stay tuned to Rozana Spokesman)
