ਕੁਰਬਾਨੀਆਂ ਅਤੇ ਉੱਚੀਆਂ ਕਦਰਾਂ ਕੀਮਤਾਂ ਨਾਲ ਭਰੇ ਸਿੱਖ ਇਤਿਹਾਸ ਦਾ ਵਿਦੇਸ਼ੀਆਂ ਦੇ ਮਨਾਂ 'ਤੇ ਵੀ ਡੂੰਘਾ ਅਸਰ ਪੈਂਦਾ ਦਿਖਾਈ ਦੇ ਰਿਹਾ ਹੈ
ਵੀਨਸ (ਇਟਲੀ): ਕੁਰਬਾਨੀਆਂ ਅਤੇ ਉੱਚੀਆਂ ਕਦਰਾਂ ਕੀਮਤਾਂ ਨਾਲ ਭਰੇ ਸਿੱਖ ਇਤਿਹਾਸ ਦਾ ਵਿਦੇਸ਼ੀਆਂ ਦੇ ਮਨਾਂ 'ਤੇ ਵੀ ਡੂੰਘਾ ਅਸਰ ਪੈਂਦਾ ਦਿਖਾਈ ਦੇ ਰਿਹਾ ਹੈ, ਜਿਸ ਤਹਿਤ ਇਟਲੀ ਦੀ ਨੌਜਵਾਨ ਪੀੜ੍ਹੀ ਸਿੱਖ ਇਤਿਹਾਸ ਨਾਲ ਸਬੰਧਿਤ ਪੁਸਤਕਾਂ ਪੜ੍ਹਨ 'ਚ ਵਿਸ਼ੇਸ਼ ਦਿਲਚਸਪੀ ਦਿਖਾ ਰਹੀ ਹੈ। ਇਟਲੀ 'ਚ ਸਿੱਖੀ ਸੇਵਾ ਸੁਸਾਇਟੀ ਦੁਆਰਾ ਇਤਾਲਵੀ ਭਾਸ਼ਾ ਵਿਚ ਪੁਸਤਕਾਂ ਛਪਵਾ ਕੇ ਇਹ ਪੁਸਤਕਾਂ ਇਟਾਲੀਅਨ ਲੋਕਾਂ ਤੱਕ ਪਹੁੰਚਾਉਣ 'ਚ ਵਡਮੁੱਲਾ ਉਪਰਾਲਾ ਕੀਤਾ ਜਾ ਰਿਹਾ ਹੈ, ਜਿਨ੍ਹਾਂ ਨੂੰ ਪੜ੍ਹ ਕੇ ਇਟਾਲੀਅਨ ਲੋਕ ਸਿੱਖ ਇਤਿਹਾਸ ਤੇ ਸਿੱਖੀ ਫ਼ਲਸਫ਼ੇ ਬਾਰੇ ਜਾਣੂ ਹੋ ਰਹੇ ਹਨ। 
Italy people are interested in learning Sikh literatureਬੀਤੇ ਦਿਨ ਵਿਚੈਂਸਾ ਨੇੜਲੇ ਸ਼ਹਿਰ ਕਾਸਤਲਗੌਮਬੈਰਤੋ 'ਚ ਇਕ ਇਟਾਲੀਅਨ ਨੌਜਵਾਨ ਫਰਾਂਚੇਸਕੋ ਜਰੇਤਾ ਨੇ ਦੱਸਿਆ ਕਿ ਉਸ ਨੇ ਕੁਝ ਸਾਲ ਪਹਿਲਾ ਸਿੱਖੀ ਸਿਧਾਂਤਾਂ ਤੇ ਇਤਿਹਾਸ ਬਾਰੇ ਇਤਾਲਵੀ ਭਾਸ਼ਾ 'ਚ ਛਪੀ ਇਕ ਪੁਸਤਕ ਪੜ੍ਹੀ ਸੀ, ਜਿਸ ਦਾ ਉਸ ਦੇ ਮਨ 'ਤੇ ਗਹਿਰਾ ਪ੍ਰਭਾਵ ਪਿਆ। ਉਸ ਨੇ ਕਿਹਾ ਕਿ ਸਿੱਖ ਧਰਮ ਸਚਮੁੱਚ ਬਹੁਤ ਹੀ ਮਹਾਨ ਧਰਮ ਹੈ। ਫਰਾਂਸਚੇਸਕੋ ਨੇ ਦੱਸਿਆ ਕਿ ਸਿੱਖ ਨੌਜਵਾਨ ਹਰਪ੍ਰੀਤ ਸਿੰਘ ਰਾਮਗੜ੍ਹ ਮੰਡਾਂ ਤੇ ਤਰਨਜੀਤ ਸਿੰਘ ਗੁਰਾ ਦੇ ਸੰਪਰਕ 'ਚ ਆਉਣ ਨਾਲ ਉਸ ਨੂੰ ਇਟਲੀ ਦੇ ਵਿਚੈਂਸਾ ਤੇ ਨੇੜਲੇ ਗੁਰਦੁਆਰਿਆਂ 'ਚ ਜਾਣ ਦਾ ਮੌਕਾ ਮਿਲਿਆ ਅਤੇ ਉਹ ਸਿੱਖਾਂ ਦੇ ਸਰਬਉੱਚ ਧਾਰਮਿਕ ਸਥਾਨ ਸ਼੍ਰੀ ਹਰਿਮੰਦਰ ਸਾਹਿਬ ਦੇ ਵੀ ਦਰਸ਼ਨ ਕਰ ਚੁੱਕਾ ਹੈ। 
Italy people are interested in learning Sikh literatureਇਸੇ ਤਰ੍ਹਾਂ ਹੋਰ ਵੀ ਇਟਾਲੀਅਨ ਲੋਕ ਸਿੱਖ ਇਤਿਹਾਸ ਪੜ੍ਹ ਕੇ ਸਿੱਖੀ ਨਾਲ ਜੁੜ ਰਹੇ ਹਨ। ਇਟਾਲੀਅਨ ਲੜਕੀ ਹਰਗੁਣ ਕੌਰ ਜੋ ਕਿ ਬਾਕਾਇਦਾ ਅੰਮ੍ਰਿਤ ਛਕ ਕੇ ਸਿੰਘਣੀ ਸੱਜ ਚੁੱਕੀ ਹੈ ਰੋਜ਼ਾਨਾ ਨਿਤਨੇਮ ਕਰਦੀ ਹੈ ਜਦੋਂ ਕਿ ਵੀਨਸ ਨੇੜਲੇ ਮਾਏਸਤਰੇ ਸ਼ਹਿਰ ਦੇ ਵਸਨੀਕ ਗੋਰੇ ਵਿਅਕਤੀ ਨੇ ਆਪਣਾ ਨਾਂਅ ਕਰਤਾਰ ਸਿੰਘ ਖ਼ਾਲਸਾ ਰੱਖ ਲਿਆ ਹੈ ਤੇ ਉਹ ਸਿੱਖ ਧਰਮ ਦਾ ਨਿਰੰਤਰ ਅਧਿਐਨ ਕਰ ਰਿਹਾ ਹੈ। ਦੱਸਣਯੋਗ ਹੈ ਕਿ ਇਟਲੀ 'ਚ ਸਿੱਖੀ ਦੇ ਪ੍ਰਚਾਰ ਲਈ ਅਤੇ ਵਿਦੇਸ਼ੀਆਂ ਨੂੰ ਸਿੱਖੀ ਬਾਰੇ ਜਾਣੂ ਕਰਵਾਉਣ ਲਈ ਸਿੱਖੀ ਸੇਵਾ ਸੁਸਾਇਟੀ ਇਟਲੀ ਦੁਆਰਾ ਪਿਛਲੇ ਕੁਝ ਸਾਲਾਂ ਤੋਂ ਸ਼ਲਾਗਾਯੋਗ ਉਪਰਾਲੇ ਕੀਤਾ ਜਾ ਰਿਹਾ ਹੈ।
