ਟਰੰਪ ਪ੍ਰਸ਼ਾਸਨ ਦੇ ਅਧਿਕਾਰੀ ਨੇ ਕਿਹਾ
ਵਾਸ਼ਿੰਗਟਨ, 11 ਜੂਨ : ਅਮਰੀਕਾ ਵਿਚ ਰਾਸ਼ਟਰਪਤੀ ਟਰੰਪ ਪ੍ਰਸ਼ਾਸਨ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਭਾਰਤ ਨੂੰ ਸਾਰੇ ਧਾਰਮਾਂ ਲਈ ਇਤਿਹਾਸਕ ਰੂਪ ਵਿਚ ਕਾਫ਼ੀ ਸਹਿਣਸ਼ੀਲ, ਸਨਮਾਨਤ ਦੇਸ਼ ਦਸਦੇ ਹੋਏ ਕਿਹਾ ਕਿ ਭਾਰਤ ਵਿਚ 'ਧਾਰਮਕ ਆਜ਼ਾਦੀ' ਸਬੰਧੀ ਜੋ ਵੀ ਹੋ ਰਿਹਾ ਹੈ ਉਸ ਨੂੰ ਲੈ ਕੇ ਅਮਰੀਕਾ 'ਬਹੁਤ ਚਿੰਤਤ' ਹੈ।
ਅੰਤਰਰਾਸ਼ਟਰੀ ਧਾਰਮਕ ਆਜ਼ਾਦੀ ਲਈ ਡਿਪਲੋਮੈਟ ਸੈਮੁਅਲ ਬਰਾਊਨਬੈਕ ਦੀ ਇਹ ਟਿੱਪਣੀ ਬੁਧਵਾਰ ਨੂੰ '2019 ਅੰਤਰਰਾਸ਼ਟਰੀ ਧਾਰਮਕ ਆਜ਼ਾਦੀ ਰਿਪੋਰਟ' ਜਾਰੀ ਕਰਨ ਤੋਂ ਬਾਅਦ ਆਈ ਹੈ। ਵਿਦੇਸ਼ ਮੰਤਰੀ ਮਾਈਕ ਪੋਮਪੀਓ ਵਲੋਂ ਜਾਰੀ ਕੀਤੀ ਗਈ ਇਸ ਰਿਪੋਰਟ ਵਿਚ ਦੁਨੀਆਂ ਭਰ ਦੇ ਧਾਰਮਕ ਆਜ਼ਾਦੀ ਦੇ ਉਲੰਘਣ ਦੀਆਂ ਪ੍ਰਮੁੱ ਘਟਨਾਵਾਂ ਦਾ ਜ਼ਿਕਰ ਹੈ।
File Photo
ਬਰਾਊਨਬੈਕ ਨੇ ਕਿਹਾ ਕਿ ਭਾਰਤ ਵਿਚ ਜੋ ਚੱਲ ਰਿਹਾ ਹੈ ਉਹ ਬਹੁਤ ਹੀ ਪਰੇਸ਼ਾਨ ਕਰਨ ਵਾਲਾ ਹੈ ਕਿਉਂਕਿ ਇਹ ਬਹੁਤ ਹੀ ਧਾਰਮਕ ਉਪ-ਮਹਾਂਦੀਪ ਹੈ ਅਤੇ ਇਥੇ ਜ਼ਿਆਦਾ ਫ਼ਿਰਕੂ ਹਿੰਸਾ ਦੇਖਣ ਨੂੰ ਮਿਲ ਰਹੀ ਹੈ। ਇਸ ਤੋਂ ਪਹਿਲਾਂ ਅਮਰੀਕਾ ਦੇ ਵਿਦੇਸ਼ ਵਿਭਾਗ ਨੇ ਅਪਣੇ ਭਾਰਤ ਅਧਿਐਨ ਦੀ ਰਿਪੋਰਟ ਵਿਚ ਕਿਹਾ ਕਿ ਧਾਰਮਕ ਰੂਪ ਨਾਲ ਪ੍ਰੇਰਿਤ ਹਤਿਆਵਾਂ, ਹਮਲਿਆਂ, ਦੰਗਿਆਂ, ਭੇਦਭਾਵ, ਤੋੜਫ਼ੋੜ ਦੀਆਂ ਰਿਪੋਰਟਾਂ ਹਨ ਜੋ ਅਪਣੇ ਧਰਮ ਨੂੰ ਮੰਨਣ ਅਤੇ ਉਸ ਬਾਰੇ ਬੋਲਣ ਦੇ ਅਧਿਕਾਰ ਵਿਚ ਰੁਕਾਵਟ ਪਾਉਂਦੀਆਂ ਹੈ। ਉਨ੍ਹਾਂ ਕਿਹਾ ਕਿ ਗ੍ਰਹਿ ਮੰਤਰਾਲੇ ਦੇ ਅੰਕੜਿਆਂ ਅਨੁਸਾਰ 2008 ਤੋਂ 2017 ਵਿਚਾਲੇ ਫ਼ਿਰਕੂ ਹਿੰਸਾ ਦੀਆਂ 7,484 ਘਟਨਾਵਾਂ ਹੋਈਆਂ ਜਿਨ੍ਹਾਂ ਵਿਚ 1100 ਤੋਂ ਵੱਧ ਲੋਕ ਮਾਰੇ ਗਏ।
ਭਾਰਤ ਨੇ ਰਿਪੋਰਟ ਕੀਤੀ ਖ਼ਾਰਜ
ਭਾਰਤ ਨੇ ਅਮਰੀਕਾ ਦੀ ਧਾਰਮਕ ਆਜ਼ਾਦੀ 'ਤੇ ਰਿਪੋਰਟ ਨੂੰ ਖਾਰਜ ਕਰਦੇ ਹੋਏ ਕਿਹਾ ਕਿ ਕਿਸੇ ਵੀ ਵਿਦੇਸ਼ੀ ਸਰਕਾਰ ਨੂੰ ਉਸ ਦੇ ਨਾਗਰਿਕਾਂ ਦੇ ਸੰਵਿਧਾਨਕ ਅਧਿਕਾਰਾਂ ਦੀ ਸਥਿਤੀ 'ਤੇ ਫ਼ੈਸਲਾ ਸੁਣਾਉਣ ਦਾ ਕੋਈ ਅਧਿਕਾਰ ਨਹੀਂ ਹੈ। ਜ਼ਿਕਰਯੋਗ ਹੈ ਕਿ ਭਾਰਤ ਸਰਕਾਰ ਨੇ ਅਮਰੀਕਾ ਦੀ ਧਾਰਮਕ ਆਜ਼ਾਦੀ ਰਿਪੋਰਟ ਨੂੰ ਪਹਿਲਾਂ ਖਾਰਜ ਕਰਦੇ ਹੋਏ ਕਿਹਾ ਸੀ,''ਭਾਰਤ ਨੂੰ ਸੱਭ ਤੋਂ ਵੱਡਾ ਲੋਕਤੰਤਰ ਅਤੇ ਸਹਿਣਸ਼ੀਲ, ਸਮਾਵੇਸ਼ਤਾ ਦੀ ਲੰਬੇ ਸਮੇਂ ਲਈ ਬਹੁ-ਸਮਾਜ ਹੋਣ ਦੇ ਨਾਤੇ ਅਪਣੀ ਧਰਮ ਨਿਰਪੱਖਤਾ ਅਤੇ ਅਪਣੀ
ਸਥਿਤੀ 'ਤੇ ਮਾਣ ਹੈ।''
