ਮਲਾਹਾਂ ਵੱਲੋਂ ਵੀਡੀਓ ਰਾਹੀਂ ਅਪੀਲ ਕੀਤੀ ਗਈ ਹੈ ਕਿ ਸਾਨੂੰ ਅਪਣੇ ਦੇਸ਼ ਪਹੁੰਚਣ ਲਈ ਮਦਦ ਦੀ ਲੋੜ ਹੈ।
ਦੁਬਈ : ਅੱਠ ਭਾਰਤੀ ਮਲਾਹ ਪਿਛਲੇ 18 ਮਹੀਨਿਆਂ ਤੋਂ ਬਿਨਾਂ ਤਨਖਾਹ ਤੋਂ ਦੁਬਈ ਵਿਚ ਇਕ ਜਹਾਜ਼ ਵਿਚ ਫਸੇ ਹੋਏ ਹਨ। ਮਲਾਹਾਂ ਕੋਲ ਸੰਯੁਕਤ ਅਰਬ ਅਮੀਰਾਤ ਦਾ ਵੀਜ਼ਾ ਨਹੀਂ ਹੈ। ਇਸ ਕਾਰਨ ਉਹ ਜਹਾਜ਼ ਤੋਂ ਨਹੀਂ ਉਤਰ ਸਕਦੇ। ਮਲਾਹਾਂ ਨੇ ਸਰਕਾਰ ਤੋਂ ਉਹਨਾਂ ਨੂੰ ਬਾਹਰ ਕੱਢਣ ਦੀ ਬੇਨਤੀ ਕੀਤੀ ਹੈ। ਜਹਾਜ਼ 'ਤੇ ਸਵਾਰ ਕੁੱਲ 10 ਮਲਾਹਾਂ ਵਿਚੋਂ 8 ਭਾਰਤੀ ਹਨ। ਇਹਨਾਂ ਭਾਰਤੀ ਮਲਾਹਾਂ ਵਿਚੋਂ ਦੋ ਆਂਧਰਾ ਪ੍ਰਦੇਸ਼, ਤਿੰਨ ਤਾਮਿਲਨਾਡੂ, ਦੋ ਪੱਛਮ ਬੰਗਾਲ ਅਤੇ ਇਕ ਅਸਮ ਤੋਂ ਹੈ ।
United Arab Emirates
ਇਸ ਜਹਾਜ਼ ਨੂੰ ਸੰਯੁਕਤ ਅਰਬ ਅਮੀਰਾਤ ਦੇ ਤੱਟ ਰੱਖਿਅਕ ਨੇ 15 ਅਪ੍ਰੈਲ 2016 ਨੂੰ ਹਿਰਾਸਤ ਵਿਚ ਲਿਆ ਸੀ। ਮਲਾਹਾਂ ਦੇ ਪਾਸਪੋਰਟ ਅਤੇ ਸੀਮੈਨ ਦੀਆਂ ਕਿਤਾਬਾਂ ਵੀ ਜ਼ਬਤ ਕਰ ਲਈਆਂ ਗਈਆਂ ਸਨ। ਜਹਾਜ਼ ਵਿਚ ਫਸੇ ਮਲਾਹਾਂ ਨੇ ਦੱਸਿਆ ਕਿ ਕੰਪਨੀ ਨੇ ਉਹਨਾਂ ਨੂੰ ਬਿਨਾਂ ਵੇਤਨ, ਭੋਜਨ ਅਤੇ ਬਾਲਣ ਦਿਤੇ ਛੱਡ ਦਿਤਾ ਹੈ। ਖ਼ਬਰਾਂ ਮੁਤਾਬਕ ਮਲਾਹਾਂ ਵਿਚੋਂ ਇਕ ਕਪਤਾਨ ਅਯਅੱਪਨ ਸਵਾਮੀਨਾਥਨ ਨੇ ਫੋਨ 'ਤੇ ਦੱਸਿਆ ਕਿ ਅਜਿਹਾ ਲਗਦਾ ਹੈ ਕਿ ਜਿਸ ਤਰ੍ਹਾਂ ਅਸੀਂ ਗੁਲਾਮ ਹੋਈਏ, ਜਿਹਨਾਂ ਨੂੰ ਛੱਡ ਦਿਤਾ ਗਿਆ ਹੋਵੇ। ਅਸੀਂ ਬਹੁਤ ਮਾੜੇ ਹਾਲਾਤਾਂ ਵਿਚੋਂ ਲੰਘ ਰਹੇ ਹਾਂ।
ship
ਅਸੀਂ ਘਰ ਵੀ ਵਾਪਸ ਨਹੀਂ ਜਾ ਸਕਦੇ ਕਿਉਂਕਿ ਪ੍ਰਸ਼ਾਸਨ ਤੋਂ ਸਾਨੂੰ ਕੋਈ ਸੰਕੇਤ ਨਹੀਂ ਮਿਲਿਆ ਹੈ। ਸਾਨੂੰ ਕਈ ਮਹੀਨਿਆਂ ਤੋਂ ਤਨਖਾਹ ਵੀ ਨਹੀਂ ਮਿਲੀ ਹੈ। ਸਵਾਮੀਨਾਥਨ ਦਾ ਘਰ ਤਾਮਿਲਨਾਡੂ ਵਿਚ ਆਏ ਤੂਫ਼ਾਨ ਦੌਰਾਨ ਬਰਬਾਦ ਹੋ ਗਿਆ ਪਰ ਉਹ ਆਪਣੇ ਪਰਵਾਰ ਜੋ ਕਿ ਬੱਚ ਗਿਆ ਹੈ, ਨੂੰ ਪੈਸੇ ਨਹੀਂ ਭੇਜ ਸਕਿਆ। ਮਲਾਹਾਂ ਵੱਲੋਂ ਵੀਡੀਓ ਰਾਹੀਂ ਅਪੀਲ ਕੀਤੀ ਗਈ ਹੈ ਕਿ ਸਾਨੂੰ ਅਪਣੇ ਦੇਸ਼ ਪਹੁੰਚਣ ਲਈ ਮਦਦ ਦੀ ਲੋੜ ਹੈ। ਇਹਨਾਂ ਮਲਾਹਾਂ ਦੀ ਭਰਤੀ ਮੁੰਬਈ ਸਥਿਤ ਨਿਜੀ ਕੰਪਨੀਆਂ ਵੱਲੋਂ ਕੀਤੀ ਗਈ ਸੀ।
Indian embassy in UAE
ਜਹਾਜ਼ਾਂ ਦਾ ਪ੍ਰਬੰਧਨ ਕਰਨ ਵਾਲੀ ਕੰਪਨੀ ਨੂੰ ਵਿੱਤੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ ਜਿਸ ਕਾਰਨ ਉਹਨਾਂ ਨੂੰ ਪੈਸੇ ਨਹੀਂ ਦਿਤੇ ਗਏ। ਉਹਨਾਂ ਨੂੰ ਭੋਜਨ ਵਿਚ ਭਾਰਤ ਦੇ ਵਪਾਰਕ ਦੂਤਘਰ ਤੋਂ ਬਹੁਤ ਘੱਟ ਸਮਾਨ ਮਿਲ ਰਿਹਾ ਹੈ। ਅਯਅੱਪਨ ਦਾ ਕਹਿਣਾ ਹੈ ਕਿ ਹਰ ਕੋਈ ਜਾਣਦਾ ਹੈ ਕਿ ਉਹਨਾਂ 'ਤੇ ਕੀ ਬੀਤ ਰਹੀ ਹੈ, ਇਸ ਦੇ ਬਾਵਜੂਦ ਉਹਨਾਂ ਨੂੰ ਇਹ ਸੱਭ ਝੱਲਣਾ ਪੈ ਰਿਹਾ ਹੈ।
