ਜਦੋਂ ਗੱਲ ਨਿਯਮਾਂ ਦੇ ਲਾਗੂ ਕਰਨ ਦੀ ਹੋਵੇ ਜਾਂ ਫਿਰ ਉਨ੍ਹਾਂ ਦਾ ਪਾਲਣ ਕਰਨ ਦੀ ਤਾਂ ਲੋਕ ਅਤੇ ਨੇਤਾ ਇਕ
ਔਕਲੈਂਡ 16 ਮਈ (ਹਰਜਿੰਦਰ ਸਿੰਘ ਬਸਿਆਲਾ): ਜਦੋਂ ਗੱਲ ਨਿਯਮਾਂ ਦੇ ਲਾਗੂ ਕਰਨ ਦੀ ਹੋਵੇ ਜਾਂ ਫਿਰ ਉਨ੍ਹਾਂ ਦਾ ਪਾਲਣ ਕਰਨ ਦੀ ਤਾਂ ਲੋਕ ਅਤੇ ਨੇਤਾ ਇਕ ਬਰਾਬਰ ਹੋਣੇ ਚਾਹੀਦੇ ਹਨ, ਪਰ ਇੰਝ ਬਹੁਤ ਸਾਰੇ ਮੁਲਕਾਂ ਵਿਚ ਹੁੰਦਾ ਨਹੀਂ। ਇਸ ਦੇ ਉਲਟ ਕਈ ਵਿਕਸਤ ਦੇਸ਼ ਅਜਿਹੀ ਉਦਾਹਰਣ ਸੈਟ ਕਰ ਦਿੰਦੇ ਹਨ ਕਿ ਲੋਕ ਅਜਿਹੇ ਨੇਤਾਵਾਂ ਨੂੰ ਆਮ ਦੁਕਾਨਦਾਰ ਵੀ ਨਿਯਮਾਂ ਦਾ ਪਾਠ ਪੜ੍ਹਾ ਦਿੰਦਾ ਹੈ। ਅੱਜ ਨਿਊਜ਼ੀਲੈਂਡ ਦੇ ਵਿਚ ਅਜਿਹੀ ਘਟਨਾ ਦੇਸ਼ ਦੀ ਪ੍ਰਧਾਨ ਮੰਤਰੀ ਜੈਸਿੰਡਾ ਆਰਡਨ ਦੇ ਨਾਲ ਹੋਈ। ਉਹ ਸਵੇਰੇ ਦੇਸ਼ ਦੀ ਰਾਜਧਾਨੀ ਵਿਖੇ ਇਕ ਕੌਫ਼ੀ ਸ਼ਾਪ ਉਤੇ ਅਪਣੇ ਪਤੀ ਨਾਲ ਕੌਫ਼ੀ ਦਾ ਕੱਪ ਲੈਣ ਚਲੇ ਗਈ। ਸ਼ਾਪ ਦੇ ਅੰਦਰ ਕਰੋਨਾ ਵਾਇਰਸ ਦੇ ਚਲਦਿਆਂ ਲੈਵਲ-2 ਦੇ ਨਿਯਮ ਲਾਗੂ ਸਨ ਅਤੇ 10 ਤੋਂ ਜਿਆਦਾ ਵਿਅਕਤੀਆਂ ਦੇ ਇਕੱਠ ਤੋਂ ਵੱਧ ਦੀ ਮਨਾਹੀ ਸੀ।
File photo
ਜਦੋਂ ਇਹ ਕੌਫ਼ੀ ਲੈਣ ਪਹੁੰਚੇ ਤਾਂ ਹਾਜ਼ਿਰ ਸਟਾਫ਼ ਨੇ ਕਿਹਾ ਕਿ ਅਜੇ ਤੁਸੀਂ ਕੌਫ਼ੀ ਸ਼ਾਪ ਦੇ ਅੰਦਰ ਨਹੀਂ ਆ ਸਕਦੇ ਕਿਉਂਕਿ 10 ਤੋਂ ਵੱਧ ਵਿਅਕਤੀ ਇਕ ਦੁਕਾਨ ਅੰਦਰ ਇਕੱਠੇ ਕਰਨ ਦੀ ਮਨਾਹੀ ਹੈ। ਸਮਾਜਿਕ ਫ਼ਾਸਲੇ ਦਾ ਧਿਆਨ ਰਖਦਿਆਂ ਇਹ ਨਿਯਮ ਹਰ ਥਾਂ ਲਾਗੂ ਕਰਨ ਵਿਚ ਦੁਕਾਨਦਾਰਾਂ ਨੇ ਪੂਰਾ ਯੋਗਦਾਨ ਪਾਇਆ।
ਪ੍ਰਧਾਨ ਮੰਤਰੀ ਜੈਸਿੰਡਾ ਆਰਡਨ ਅਤੇ ਉਸ ਦੇ ਪਤੀ ਨੇ ਨਿਯਮਾਂ ਦਾ ਪਾਲਣ ਕਰਦਿਆਂ ਉਥੇ ਕੁੱਝ ਸਮਾਂ ਉਡੀਕ ਕੀਤੀ ਤੇ ਉਥੋਂ ਚਲੇ ਗਏ। ਐਨੇ ਨੂੰ ਦੋ ਗਾਹਕਾਂ ਦੇ ਜਾਣ ਬਾਅਦ ਕੌਫ਼ੀ ਸ਼ਾਪ ਦੇ ਵਿਚ ਥਾਂ ਵਿਹਲੀ ਹੋਈ ਤਾਂ ਸਟਾਫ਼ ਨੇ ਮਗਰ ਜਾ ਕੇ ਕਿਹਾ ਕਿ ਆ ਜਾਉ ਜਗ੍ਹਾ ਖ਼ਾਲੀ ਹੋ ਗਈ ਹੈ।
ਕਿਸੇ ਨੇ ਇਸ ਗੱਲ ਨੂੰ ਟਵਿਟਰ ਉਤੇ ਪਾ ਦਿਤਾ ਤਾਂ ਪ੍ਰਧਾਨ ਮੰਤਰੀ ਦੇ ਪਤੀ ਨੇ ਅਸਿੱਧੇ ਰੂਪ ਵਿਚ ਅਪਣੀ ਹੀ ਜ਼ਿੰਮੇਵਾਰੀ ਸਮਝਦਿਆਂ ਕਿਹਾ ਕਿ ਅਸੀਂ ਹੀ ਕੌਫ਼ੀ ਵਾਸਤੇ ਕੋਈ ਆਗਾਊਂ ਪ੍ਰਬੰਧ ਜਾਂ ਬੁਕਿੰਗ ਨਹੀਂ ਕੀਤੀ ਸੀ। ਪ੍ਰਧਾਨ ਮੰਤਰੀ ਨੇ ਲਗਭਗ ਅੱਧਾ ਘੰਟਾ ਕੌਫ਼ੀ ਸ਼ਾਪ ਵਿਚ ਗੁਜ਼ਾਰਿਆ ਅਤੇ ਇਕ ਆਮ ਗਾਹਕ ਵਜੋਂ ਪੇਸ਼ ਹੋਈ। ਕੌਫ਼ੀ ਸ਼ਾਪ ਦਾ ਸਟਾਫ਼ ਵੀ ਇਸ ਮੌਕੇ ਕਿਸੇ ਦਬਾਅ ਅਧੀਨ ਨਹੀਂ ਆਇਆ ਇਕ ਗਾਹਕ ਵਾਂਗ ਸਰਵ ਕੀਤਾ ਗਿਆ।
