ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਚੀਨ ਦੇ ਅਸ਼ਾਂਤ ਮੁਸਲਿਮ ਘਣੀ ਆਬਾਦੀ ਸ਼ਿਨਜਿਆਂਗ ਖ਼ੇਤਰ ਵਿਚ ਉਈਗਰ ਘੱਟਗਿਣਤੀ
ਵਾਸ਼ਿੰਗਟਨ, 18 ਜੂਨ : ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਚੀਨ ਦੇ ਅਸ਼ਾਂਤ ਮੁਸਲਿਮ ਘਣੀ ਆਬਾਦੀ ਸ਼ਿਨਜਿਆਂਗ ਖ਼ੇਤਰ ਵਿਚ ਉਈਗਰ ਘੱਟਗਿਣਤੀ ਸਮੂਹਾਂ ਦੇ ਮਨੁੱਖੀ ਅਧਿਕਾਰਾਂ ਦੀ ਉਲੰਘਣਾ ਦੀ ਅਲੋਚਨਾ ਕਰਨ ਵਾਲੇ ਇਕ ਬਿਲ 'ਤੇ ਦਸਤਖ਼ਤ ਕੀਤੇ ਅਤੇ ਸੀਨੀਅਰ ਚੀਨੀ ਅਧਿਕਾਰੀਆਂ ਵਿਰੁਧ ਪਾਬੰਦੀਆਂ ਲਗਾਉਣ ਦਾ ਰਾਸਤਾ ਕਾਨੂੰਨੀ ਤੌਰ 'ਤੇ ਸਾਫ਼ ਹੋ ਗਿਆ।
ਟਰੰਪ ਨੇ ਕਿਹਾ ਕਿ ਉਈਗਰ ਮਨੁੱਖੀ ਅਧਿਕਾਰ ਨੀਤੀ ਐਕਟ, 2020 ਮਨੁੱਖੀ ਅਧਿਕਾਰਾਂ ਦੀ ਉਲੰਘਣਾ ਕਰਨ ਵਾਲਿਆਂ ਨੂੰ ਜਵਾਬਦੇਹ ਠਹਿਰਾ ਸਕਦਾ ਹੈ। ਮਨੁੱਖੀ ਅਧਿਕਾਰਾਂ ਦੀ ਉਲੰਘਣਾ ਵਿਚ ਚੀਨ 'ਚ ਉਈਗਰਾਂ ਅਤੇ ਹੋਰ ਘੱਟ ਗਿਣਤੀਆਂ ਨੂੰ ਜ਼ਬਰਦਸਤੀ ਧਰਮ ਪਰਿਵਰਤਨ ਕਰਨਾ, ਮਜ਼ਦੂਰੀ ਕਰਨ ਲਈ ਮਜ਼ਬੂਰ ਕਰਨਾ ਅਤੇ ਨਸਲੀ ਤੇ ਧਾਰਮਕ ਪਛਾਣ ਮਿਟਾਉਣ ਦੀ ਕੋਸ਼ਿਸ਼ ਕਰਨਾ ਸ਼ਾਮਲ ਹੈ।
ਇਸ 'ਤੇ ਪ੍ਰਤੀਕਰਮ ਦਿੰਦਿਆਂ ਚੀਨ ਦੇ ਵਿਦੇਸ਼ ਮੰਤਰਾਲੇ ਨੇ ਬੀਜਿੰਗ 'ਚ ਇਸ ਕਾਨੂੰਨ ਦੀ ਅਲੋਚਨਾ ਕੀਤੀ ਅਤੇ ਕਿਹਾ ਕਿ ਇਹ ਸ਼ਿਨਜਿਆਂਗ ਖੇਤਰ ਵਿਚ ਚੀਨ ਦੀ ਨੀਤੀ 'ਤੇ ''ਬਦਤਮੀਜ਼ੀ ਤੌਰ 'ਤੇ ਹਮਲਾ ਕਰਦਾ ਹੈ।'' ਮੰਤਰਾਲੇ ਨੇ ਇਕ ਬਿਆਨ ਵਿਚ ਕਿਹਾ, “''ਚੀਨ ਜ਼ੋਰਦਾਰ ਜਵਾਬੀ ਹਮਲਾ ਕਰੇਗਾ ਅਤੇ ਅਮਰੀਕਾ ਨੂੰ ਇਸ ਦੇ ਨਤੀਜੇ ਭੁਗਤਣੇ ਪੈਣਗੇ।”
ਸ਼ਿਨਜਿਆਂਗ ਵਿਚ ਉਈਗਰ ਮੁਸਲਮਾਨਾਂ ਉੱਤੇ ਕਾਰਵਾਈ ਵਿਚ ਸ਼ਾਮਲ ਸੀਨੀਅਰ ਚੀਨੀ ਅਧਿਕਾਰੀਆਂ ਉੱਤੇ ਪਾਬੰਦੀ ਲਗਾਉਣ ਵਾਲੇ ਇਸ ਬਿਲ ਨੂੰ ਕਾਂਗਰਸ ਵਿਚ ਰਿਪਬਲੀਕਨ ਅਤੇ ਡੈਮੋਕਰੇਟਸ ਦਾ ਭਾਰੀ ਸਮਰਥਨ ਮਿਲਿਆ। ਕੌਮਾਤਰੀ ਧਾਰਮਕ ਆਜ਼ਾਦੀ 'ਤੇ ਅਮਰੀਕੀ ਕਮਿਸ਼ਨ ਨੇ ਉਈਗਰ ੍ਰਮਨੁੱਖੀ ਅਧਿਕਾਰ ਨੀਤੀ ਐਕਟ 'ਤੇ ਦਸਤਖ਼ਤ ਕਰਨ ਦੇ ਲਈ ਟਰੰਪ ਦਾ ਧਨਵਾਦ ਕੀਤਾ ਹੈ।
(ਪੀਟੀਆਈ)