ਇੰਫਾਲ ’ਚ ਰਹਿਣ ਵਾਲੇ ਪੰਜਾਬੀਆਂ ਨੇ ਗੁਹਾਟੀ ’ਚ ਲਿਆ ਆਸਰਾ
ਮਨੀਪੁਰ : ਮਨੀਪੁਰ ’ਚ ਲਗਾਤਾਰ ਹਾਲਾਤ ਵਿਗੜੇ ਜਾ ਰਹੇ ਹਨ ਜਿਸ ਕਾਰਨ ਇੱਥੇ ਲਗਾਤਾਰ ਕਰਫਿਊ ਲਗਾਇਆ ਜਾ ਰਿਹਾ ਹੈ। ਹਾਲਾਤ ਖ਼ਰਾਬ ਹੋਣ ਕਾਰਨ ਮਨੀਪੁਰ 'ਚ ਰਹਿੰਦੇ ਪੰਜਾਬੀਆਂ ਨੂੰ ਗੁਹਾਟੀ 'ਚ ਸ਼ਰਨ ਲੈਣ ਲਈ ਮਜਬੂਰ ਹੋਣਾ ਪੈ ਰਿਹਾ ਹੈ। ਪਿਛਲੇ 45 ਦਿਨਾਂ ਤੋਂ ਮਨੀਪੁਰ ’ਚ ਮਾਹੌਲ ਖ਼ਰਾਬ ਹੈ । ਪੰਜਾਬੀਆਂ ਨੂੰ ਸੁਰੱਖਿਅਤ ਥਾਵਾਂ ਤੇ ਜਾਣਾ ਪਿਆ ਹੈ। ਭਾਵੇਂ ਇਹਨਾਂ ਪੰਜਾਬੀਆਂ ਦੇ ਮਨੀਪੁਰ ਚ ਚੰਗੇ ਕਾਰੋਬਾਰ ਹਨ ਪਰ ਮਾਹੌਲ ਖ਼ਰਾਬ ਹੋਣ ਕਾਰਨ ਉਹਨਾਂ ਨੇ ਸੁਰੱਖਿਅਤ ਥਾਵਾਂ ’ਤੇ ਪਹੁੰਚਣਾ ਹੀ ਬਿਹਤਰ ਸਮਝਿਆ।
ਮਨੀਪੁਰ ’ਚ ਪੰਜਾਬੀਆਂ ਦੇ ਚੰਗਾ ਕਾਰੋਬਾਰ ਹਨ। ਟਾਟਾ ਕੰਪਨੀ ਦੇ ਸ਼ੋਅ ਰੂਮ ਦੇ ਮਾਲਕ ਅਮਰਦੀਪ ਸਿੰਘ ਨੇ ਦਸਿਆ ਕਿ ਉਸ ਦਾ ਮਨੀਪੁਰ ਦੇ ਇੰਫਾਲ ਸ਼ਹਿਰ ’ਚ ਟਾਟਾ ਟਰਾਂਸਪੋਰਟ ਦਾ ਸ਼ੋਅ ਰੂਮ ਹੈ। ਵੈਸੇ ਤਾਰਂ ਅਕਸਰ ਵੱਖ-ਵੱਖ ਕਬੀਲਿਆਂ ਵਿਚਕਾਰ ਇੱਥੇ ਲੜਾਈ ਹੁੰਦੀ ਰਹਿੰਦੀ ਹੈ ਪਰ ਇਸ ਵਾਰ ਦੋ ਭਾਈਚਾਰਿਆ ਦਰਮਿਆਨ ਪੈਦਾ ਹੋਈ ਗ਼ਲਤਫਹਿਮੀ ਕਾਰਨ ਦੰਗੇ ਵਧ ਗਏ ਹਨ ਅਤੇ ਅੱਗਜ਼ਨੀ ਦੀਆਂ ਘਗਟਨਾਵਾਂ ਤੋਂ ਇਲਾਵਾ ਇਕ ਦੂਜੇ ਦੇ ਕਤਲ ਵੀ ਕਰ ਰਹੇ ਹਨ। ਭਾਵੇਂ ਉਹਨਾਂ ਦੀ ਪੰਜਾਬੀਆਂ ਨਾਲ ਕੋਈ ਲੜਾਈ ਨਹੀਂ ਹੈ ਪਰ ਸਾਵਧਾਨੀ ਵਜੋਂ ਲਗਭਗ ਸਾਰੇ ਪੰਜਾਬੀ ਮਨੀਪੁਰ ਛੱਡ ਕੇ ਸੁਰੱਖਿਅਤ ਥਾਵਾਂ ’ਤੇ ਚਲੇ ਗਏ ਹਨ।
ਉਹ ਗੁਹਾਟੀ ਵਿਚ ਆਪਣੇ ਰਿਸ਼ਤੇਦਾਰਾਂ ਦੇ ਘਰ ਆਪਣੇ ਪਰਿਵਾਰਾਂ ਕੋਲ ਚਲੇ ਗਏ ਹਨ ਅਤੇ ਕਈ ਆਪਣੇ ਜਾਣਕਾਰਾਂ ਕੋਲ ਰਹਿਣ ਲਈ ਮਜਬੂਰ ਹਨ। ਉਹਨਾਂ ਨੂੰ ਉਮੀਦ ਸੀ ਕਿ ਦੰਗੇ ਕੁੱਝ ਦਿਨਾਂ ਬਾਅਦ ਰੁਕ ਜਾਣਗੇ ਪਰ ਇਹ ਦਿਨ-ਬ-ਦਿਨ ਵਧਦੇ ਜਾ ਰਹੇ ਹਨ। ਅੱਜ 45 ਦਿਨ ਹੋ ਗਏ ਹਨ ਪਰ ਦੰਗੇ ਰੁਕਣ ਦਾ ਨਾਂ ਨਹੀਂ ਲੈ ਰਹੇ।
