ਅਮਰੀਕਾ ਨੇ ਉੱਤਰ ਕੋਰੀਆ ਨੂੰ ਚੇਤਾਵਨੀ ਦਿਤੀ ਹੈ ਕਿ ਕਿਸੇ ਵੀ ਜੰਗੀ ਸਥਿਤੀ ਨਾਲ ਨਜਿਠਣ ਲਈ ਤਿਆਰ ਹਾਂ ਅਤੇ..

ਵਾਸ਼ਿੰਗਟਨ, 18 ਅਗੱਸਤ: ਅਮਰੀਕਾ ਨੇ ਉੱਤਰ ਕੋਰੀਆ ਨੂੰ ਚੇਤਾਵਨੀ ਦਿਤੀ ਹੈ ਕਿ ਕਿਸੇ ਵੀ ਜੰਗੀ ਸਥਿਤੀ ਨਾਲ ਨਜਿਠਣ ਲਈ ਤਿਆਰ ਹਾਂ ਅਤੇ ਜੇਕਰ ਉਤਰ ਕੋਰੀਆ ਉਸ ਦੇ ਜਾਂ ਉਨ੍ਹਾਂ ਦੇ ਸਹਿਯੋਗੀਆਂ ਵਿਰੁਧ ਮਿਜ਼ਾਈਲ ਦਾਗ਼ਦਾ ਹੈ ਤਾਂ ਉਹ ਮੌਕੇ 'ਤੇ ਲੋੜੀਂਦੇ ਕਦਮ ਉਠਾਉਣਗੇ।
ਇਹ ਬਿਆਨ ਅਜਿਹੇ ਸਮੇਂ ਆਇਆ ਜਦੋਂ ਕਲ ਹੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਪ੍ਰਮੁੱਖ ਰਣਨੀਤੀਕਾਰ ਸਟੀਵ ਬੈਨਨ ਨੇ ਕਿਹਾ ਹੈ ਕਿ ਉੱਤਰ ਕੋਰੀਆ ਵਲੋਂ ਪੇਸ਼ ਖਤਰੇ ਅਤੇ ਉਨ੍ਹਾਂ ਦੀ ਪ੍ਰਮਾਣੂ ਸਬੰਧੀ ਲਾਲਸਾ ਦਾ ਕੋਈ ਫ਼ੌਜੀ ਹਲ ਨਹੀਂ ਹੈ। ਹਾਲਾਂ ਕਿ ਟਰੰਪ ਨੇ ਹਾਲ ਹੀ 'ਚ ਸੰਕਲਪ ਜਤਾਇਆ ਸੀ ਕਿ ਉੱਤਰ ਕੋਰੀਆ ਦੇ ਹਮਲੇ ਦਾ ਮੂੰਹ ਤੋੜ ਜਵਾਬ ਦਿਤਾ ਜਾਵੇਗਾ।
ਅਮਰੀਕੀ ਰੱਖਿਆ ਮੰਤਰੀ ਜੇਮਜ਼ ਮੈਟਿਸ, ਜਾਪਾਨੀ ਵਿਦੇਸ਼ ਮੰਤਰੀ ਤਾਰੋ ਕੋਨੋ ਅਤੇ ਜਾਪਾਨ ਦੇ ਰਖਿਆ ਮੰਤਰੀ ਇਤਸੁਨੋਰੀ ਓਨੋਡੇਰਾ ਨਾਲ ਸਾਂਝੀ ਪ੍ਰੈਸ ਕਾਨਫ਼ਰੰਸ 'ਚ ਟਿਲਰਸਨ ਨੇ ਕਿਹਾ ਕਿ ਦੇਸ਼ ਉਤਰ ਕੋਰੀਆ ਵਲੋਂ ਪੈਦਾ ਕੀਤੀ ਜਾਣ ਵਾਲੀ ਕਿਸੇ ਵੀ ਜੰਗੀ ਸਥਿਤੀ ਨਾਲ ਨਜਿਠਣ ਲਈ ਤਿਆਰ ਹੈ। ਉਨ੍ਹਾਂ ਇਹ ਵੀ ਸਪੱਸ਼ਟ ਕਰਨ ਦੀ ਕੋਸ਼ਿਸ਼ ਕੀਤੀ ਕਿ ਫ਼ੌਜ ਦੀ ਵਰਤੋਂ ਕਰਨਾ ਅਮਰੀਕਾ ਲਈ ਪਹਿਲਾ ਰਸਤਾ ਨਹੀਂ ਹੈ ਪਰ ਅਸੀਂ ਤਿਆਰ ਹਾਂ।
ਅਮਰੀਕਾ ਅਤੇ ਜਾਪਾਨ ਦਰਮਿਆਨ ਹੋਈ ਵਾਰਤਾ ਤੋਂ ਬਾਅਦ ਇਕ ਸਵਾਲ ਦੇ ਜਵਾਬ 'ਚ ਜਾਪਾਨੀ ਰਖਿਆ ਮੰਤਰੀ ਓਨੋਡੇਰਾ ਨੇ ਕਿਹਾ ਕਿ ਜੇਕਰ ਜਾਪਾਨ 'ਤੇ ਹਮਲਾ ਹੁੰਦਾ ਹੈ ਤਾਂ ਉਹ ਅਪਣੇ ਕੋਲ ਮਿਜ਼ਾਇਲ ਤੋਂ ਬਚਾਅ ਲਈ ਉਪਲਬਧ ਸਾਧਨਾਂ ਦੀ ਵਰਤੋਂ ਕਰੇਗਾ। ਉਨ੍ਹਾਂ ਕਿਹਾ ਕਿ ਉਤਰ ਕੋਰੀਆ ਨੂੰ ਬੇਹਤਰ ਨਤੀਜੇ ਪ੍ਰਾਪਤ ਕਰਨ ਲਈ ਕੂਟਨੀਤਿਕ ਵਾਰਤਾ 'ਚ ਸ਼ਾਮਲ ਹੋਣਾ ਚਾਹੀਦਾ ਹੈ। ਸਾਡੀ ਕੋਸ਼ਿਸ਼ ਇਹ ਹੈ ਕਿ ਉਤਰ ਕੋਰੀਆ ਪ੍ਰਸ਼ਾਸਨਿਕ ਗੱਲਬਾਤ 'ਚ ਸ਼ਾਮਲ ਹੋਣ ਦੀ ਇਛਾ ਰੱਖੇ।
ਓਨੋਡੇਰਾ ਅਨੁਸਾਰ ਉੱਤਰ ਕੋਰੀਆ ਦੀ ਯੋਜਨਾ ਗੁਆਮ ਕੋਲ ਜਲ ਸਰੋਤ 'ਚ ਬੈਲਿਸਟਿਕ ਮਿਜ਼ਾਇਲਾਂ ਦਾਗਣ ਦੀ ਹੈ। ਇਹ ਪ੍ਰਮਾਣੂ ਹਥਿਆਰਾਂ ਨੂੰ ਛੋਟਾ ਕਰ ਕੇ ਆਈਸੀਬੀਐਮ ਬੈਲਿਸਟਿਕ ਮਿਜ਼ਾਇਲਾਂ ਦਾਗਣ ਦੀ ਕੋਸ਼ਿਸ਼ ਨੂੰ ਅੱਗੇ ਵਧਾ ਰਿਹਾ ਹੈ। ਉੱਤਰ ਕੋਰੀਆ ਵਲੋਂ ਪੈਦਾ ਹੋ ਰਹੇ ਖਤਰੇ ਨੂੰ ਦੇਖਦਿਆਂ ਇਸ ਮੀਟਿੰਗ 'ਚ ਅਸੀਂ ਦਬਾਅ ਵਧਾਉਣ ਅਤੇ ਗਠਜੋੜ ਦੀ ਸਮਰਥਾ ਮਜਬੂਤ ਕਰਨ 'ਤੇ ਰਾਜ਼ੀ ਹਾਂ। (ਪੀਟੀਆਈ)