ਹਮਾਸ ਵਲੋਂ ਇਕ ਅਮਰੀਕੀ ਔਰਤ ਅਤੇ ਉਸ ਦੀ ਨਾਬਾਲਗ ਬੇਟੀ ਰਿਹਾਅ, ਇਜ਼ਰਾਈਲ ਅਤੇ ਫਲਸਤੀਨੀ ਅਤਿਵਾਦੀਆਂ ਵਿਚਕਾਰ ਗੋਲੀਬਾਰੀ
ਰਾਫ਼ਾ (ਗਾਜ਼ਾ ਪੱਟੀ): ਮਿਸਰ ਅਤੇ ਗਾਜ਼ਾ ਵਿਚਕਾਰ ਦੀ ਸਰਹੱਦ ਸਨਿਚਰਵਾਰ ਨੂੰ ਖੋਲ੍ਹ ਦਿਤੀ ਗਈ ਜਿਸ ਤੋਂ ਬਾਅਦ ਇਜ਼ਰਾਈਲੀ ਘੇਰਾਬੰਦੀ ਵਾਲੇ ਇਲਾਕੇ ’ਚ ਭੋਜਨ, ਦਵਾਈਆਂ ਅਤੇ ਪਾਣੀ ਦੀ ਕਮੀ ਨਾਲ ਜੂਝ ਰਹੇ ਫਲਸਤੀਨੀਆਂ ਲਈ ਮਦਦ ਪਹੁੰਚਾਉਣ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿਤੀ ਗਈ। ਗਾਜ਼ਾ ਜਾਣ ਲਈ 200 ਤੋਂ ਵੱਧ ਟਰੱਕ ਲਗਭਗ 3 ਹਜ਼ਾਰ ਟਨ ਮਦਦ ਸਮੱਗਰੀ ਲਈ ਕਈ ਦਿਨਾਂ ਤੋਂ ਸਰਹੱਦ ’ਤੇ ਖੜੇ ਸਨ। ਐਸੋਸੀਏਟਡ ਪ੍ਰੈੱਸ (ਏ.ਪੀ.) ਦੇ ਇਕ ਪੱਤਰਕਾਰਾਂ ਨੇ ਇਨ੍ਹਾਂ ਟਰੱਕਾਂ ਨੂੰ ਅੰਦਰ ਫਲਸਤੀਨ ’ਚ ਦਾਖ਼ਲ ਹੁੰਦਿਆਂ ਵੇਖਿਆ।
ਹਮਾਸ ਦੇ ਅਤਿਵਾਦੀਆਂ ਵਲੋਂ ਦਖਣੀ ਇਜ਼ਰਾਈਲ ਦੇ ਸ਼ਹਿਰਾਂ ’ਤੇ ਸੱਤ ਅਕਤੂਬਰ ਨੂੰ ਹਮਲੇ ਕੀਤੇ ਜਾਣ ਤੋਂ ਬਾਅਦ ਇਜ਼ਰਾਈਲ ਨੇ ਗਾਜ਼ਾ ਪੱਟੀ ਦੀ ਘੇਰਾਬੰਦੀ ਕਰ ਦਿਤੀ ਅਤੇ ਕਈ ਜਵਾਬੀ ਹਮਲੇ ਕੀਤੇ। ਦਿਨਾਂ ’ਚ ਇਕ ਵਾਰੀ ਭੋਜਨ ਕਰਨ ਲਈ ਮਜਬੂਰ ਅਤੇ ਪੀਣਯੋਗ ਪਾਣੀ ਦੀ ਕਮੀ ਨਾਲ ਜੂਝ ਰਹੇ ਗਾਜ਼ਾ ’ਚ ਕਈ ਲੋਕ ਮਦਦ ਦੀ ਬੇਸਬਰੀ ਨਾਲ ਉਡੀਕ ਕਰ ਰਹੇ ਹਨ। ਬੰਬਾਬੀ ’ਚ ਵੱਡੀ ਗਿਣਤੀ ’ਚ ਜ਼ਖ਼ਮੀ ਲੋਕ ਦਾ ਇਲਾਜ ਕਰ ਰਹੇ ਹਸਪਤਾਲ ਮੁਲਾਜ਼ਮਾਂ ਨੂੰ ਵੀ ਇਲਾਜ ਸਪਲਾਈ ਅਤੇ ਜਨਰੇਟਰਾਂ ਲਈ ਫ਼ਿਊਲ ਦੀ ਤੁਰਤ ਜ਼ਰੂਰਤ ਸੀ।
ਸੈਂਕੜੇ ਵਿਦੇਸ਼ੀ ਨਾਗਰਿਕ ਵੀ ਜੰਗ ਵਿਚਕਾਰ ਗਾਜ਼ਾ ਤੋਂ ਮਿਸਰ ਜਾਣ ਲਈ ਸਰਹੱਦ ਦੇ ਖੁੱਲ੍ਹਣ ਦੀ ਉਡੀਕ ਕਰ ਰਹੇ ਸਨ। ਇਸ ਦੌਰਾਨ ਹਮਾਸ ਵਲੋਂ ਇਕ ਅਮਰੀਕੀ ਔਰਤ ਅਤੇ ਉਸ ਦੀ ਨਾਬਾਲਗ ਬੇਟੀ ਨੂੰ ਰਿਹਾਅ ਕੀਤੇ ਜਾਣ ਤੋਂ ਬਾਅਦ ਸਨਿਚਰਵਾਰ ਨੂੰ ਇਜ਼ਰਾਈਲ ਅਤੇ ਫਲਸਤੀਨੀ ਅਤਿਵਾਦੀਆਂ ਵਿਚਕਾਰ ਗੋਲੀਬਾਰੀ ਹੋਈ।
