ਨੇਤਨਯਾਹੂ ਨੇ ਕਿਹਾ, ਦੁਬਾਰਾ ਜੰਗ ਸ਼ੁਰੂ ਕਰਨ ਲਈ ਤਿਆਰ ਹਾਂ
ਤੇਲ ਅਵੀਵ : ਇਜ਼ਰਾਇਲੀ ਫ਼ੌਜ ਨੇ ਇਜ਼ਰਾਈਲ ਦੇ ਕਬਜ਼ੇ ਵਾਲੇ ਪੱਛਮੀ ਬੈਂਕ ਦੇ ਸ਼ਹਿਰ ਜੇਨਿਨ ਵਿਚ ਟੈਂਕ ਤਾਇਨਾਤ ਕੀਤੇ। ਅਜਿਹਾ 23 ਸਾਲਾਂ ਬਾਅਦ ਹੋਇਆ ਹੈ, ਜਦੋਂ ਫ਼ੌਜ ਦੇ ਟੈਂਕ ਵੈਸਟ ਬੈਂਕ ਵਿਚ ਦਾਖ਼ਲ ਹੋਏ ਸਨ। ਇਹ ਆਖ਼ਰੀ ਵਾਰ 2002 ਵਿਚ ਹੋਇਆ ਸੀ। ਜੇਨਿਨ ਵਿਚ ਪਿਛਲੇ ਕਈ ਸਾਲਾਂ ਤੋਂ ਇਜ਼ਰਾਈਲ ਵਿਰੁਧ ਹਥਿਆਰਬੰਦ ਸੰਘਰਸ਼ ਚੱਲ ਰਿਹਾ ਹੈ।
ਇਜ਼ਰਾਈਲੀ ਰਖਿਆ ਬਲ (ਆਈਡੀਐਫ਼) ਨੇ ਕਿਹਾ ਕਿ ਅਸੀਂ ਜੇਨਿਨ ਨੇੜੇ ਇਕ ਟੈਂਕ ਡਿਵੀਜਨ ਤਾਇਨਾਤ ਕੀਤਾ ਹੈ। ਇਕ ਡਿਵੀਜਨ ਵਿਚ 40 ਤੋਂ 60 ਟੈਂਕ ਹੁੰਦੇ ਹਨ। ਇਜ਼ਰਾਈਲ ਨੇ ਫ਼ਲਸਤੀਨ ਦੇ ਜੇਨਿਨ, ਤੁਲਕਾਰਮ ਅਤੇ ਨੂਰ ਸ਼ਮਸ ਦੇ ਸ਼ਰਨਾਰਥੀ ਕੈਂਪਾਂ ਨੂੰ ਖ਼ਾਲੀ ਕਰਵਾ ਲਿਆ ਹੈ। ਇਨ੍ਹਾਂ ਕੈਂਪਾਂ ਵਿਚ ਫ਼ਲਸਤੀਨੀ ਨਾਗਰਿਕਾਂ ਨੇ ਸ਼ਰਨ ਲਈ ਸੀ।
ਇਨ੍ਹਾਂ ਤਿੰਨਾਂ ਕੈਂਪਾਂ ਤੋਂ 40 ਹਜ਼ਾਰ ਫ਼ਲਸਤੀਨੀਆਂ ਨੂੰ ਕਢਿਆ ਗਿਆ ਹੈ। ਇਜ਼ਰਾਈਲ ਨੇ 21 ਜਨਵਰੀ ਤੋਂ ਉਨ੍ਹਾਂ ਨੂੰ ਕਢਣਾ ਸ਼ੁਰੂ ਕਰ ਦਿਤਾ ਸੀ। 1967 ਦੇ ਇਜ਼ਰਾਈਲ-ਅਰਬ ਯੁੱਧ ਤੋਂ ਬਾਅਦ ਪਹਿਲੀ ਵਾਰ ਇੰਨੀ ਵੱਡੀ ਗਿਣਤੀ ਵਿਚ ਫ਼ਲਸਤੀਨੀ ਨਾਗਰਿਕ ਬੇਘਰ ਹੋਏ ਹਨ। ਇਥੇ ਸੰਯੁਕਤ ਰਾਸ਼ਟਰ ਮਨੁੱਖੀ ਅਧਿਕਾਰ ਸੰਗਠਨ ਨੂੰ ਵੀ ਕੰਮ ਬੰਦ ਕਰਨ ਦੇ ਨਿਰਦੇਸ਼ ਦਿਤੇ ਗਏ ਹਨ।
ਰਖਿਆ ਮੰਤਰੀ ਇਜ਼ਰਾਈਲ ਕਾਟਜ਼ ਨੇ ਫ਼ੌਜ ਨੂੰ ਅਗਲੇ ਕੱੁਝ ਸਾਲਾਂ ਤਕ ਪੱਛਮੀ ਕੰਢੇ ਦੇ ਸ਼ਰਨਾਰਥੀ ਕੈਂਪਾਂ ਵਿਚ ਰਹਿਣ ਲਈ ਕਿਹਾ ਹੈ। ਉਨ੍ਹਾਂ ਕਿਹਾ ਕਿ ਅਤਿਵਾਦ ਨੂੰ ਜੜ੍ਹ ਤੋਂ ਖ਼ਤਮ ਕਰਨ ਲਈ ਇਹ ਜ਼ਰੂਰੀ ਹੈ।
