ਇਹ ਸਿਆਸਤਦਾਨ ਲੋਕ ਕਦੋਂ ਕੁੱਝ ਸਿਖਣਗੇ? ਪਰ ਇਹ ਸਿਖਣਗੇ ਵੀ ਕਿਉਂ?
ਥੋੜ੍ਹੀ ਜਹੀ ਸ਼ਾਂਤੀ ਸਥਾਪਤ ਹੋ ਜਾਣ ਮਗਰੋਂ ਫ਼ਿਰਕੂ ਅੱਗ ਵਿਚ ਸੜ ਬਲ ਰਹੀ ਦਿੱਲੀ ਵਿਚੋਂ ਹੀ ਹੁਣ ਆਮ ਨਾਗਰਿਕਾਂ ਕੋਲੋਂ ਅਸਲ ਭਾਈਚਾਰੇ ਦੀਆਂ ਕਹਾਣੀਆਂ ਵੀ ਸੁਣਨ ਨੂੰ ਮਿਲ ਰਹੀਆਂ ਹਨ। ਥਾਂ ਥਾਂ ਹਿੰਦੂਆਂ ਅਤੇ ਸਿੱਖਾਂ ਨੇ ਮਿਲ ਕੇ ਮੁਸਲਮਾਨਾਂ ਨੂੰ ਸੁਰੱਖਿਆ ਵੀ ਦਿਤੀ ਤੇ ਅਪਣੇ ਘਰਾਂ ਵਿਚ ਆਸਰਾ ਵੀ ਦਿਤਾ।
Photo
ਹਰ ਵਾਰ ਗੁਰੂ ਘਰਾਂ ਵਲੋਂ ਪੀੜਤਾਂ ਵਾਸਤੇ ਅਪਣੇ ਦਿਲ-ਦਵਾਰ ਖੋਲ੍ਹ ਦੇਣ ਦੀਆਂ ਕਹਾਣੀਆਂ ਤਾਂ ਸੁਣਾਈ ਦੇਂਦੀਆਂ ਹੀ ਹਨ, ਪਰ ਇਸ ਵਾਰ ਹਿੰਦੂ ਮੰਦਰਾਂ ਨੇ ਵੀ ਆਸਰਾ ਦੇਣ ਵਾਸਤੇ ਅਪਣੇ ਦਵਾਰ ਖੋਲ੍ਹ ਦਿਤੇ। ਇਕ ਗੱਲ ਤਾਂ ਇਨ੍ਹਾਂ ਕਹਾਣੀਆਂ ਤੋਂ ਸਾਫ਼ ਹੈ ਕਿ ਆਮ ਭਾਰਤੀ, ਭਾਵੇਂ ਉਹ ਹਿੰਦੂ ਹੋਣ, ਮੁਸਲਮਾਨ ਹੋਣ ਜਾਂ ਸਿੱਖ, ਉਨ੍ਹਾਂ ਅੰਦਰ ਵੱਡੀ ਮਾਤਰਾ ਉਨ੍ਹਾਂ ਦੀ ਹੈ ਜੋ ਨਫ਼ਰਤ ਅਤੇ ਫ਼ਿਰਕੂ ਹਿੰਸਾ ਪਿੱਛੇ ਕੰਮ ਕਰਦੀ ਸਿਆਸਤ ਦੀ ਗੰਦੀ ਸੋਚ ਨੂੰ ਸਮਝਦੇ ਹਨ।
Photo
ਜੋ ਕੁੱਝ 1984 ਦੀ ਸਿੱਖ ਨਸਲਕੁਸ਼ੀ ਮਗਰੋਂ ਸਿਆਸਤਦਾਨਾਂ ਅਤੇ ਦਿੱਲੀ ਪੁਲਿਸ ਨੇ ਨਹੀਂ ਸੀ ਸਿਖਿਆ, ਉਹ ਆਮ ਲੋਕਾਂ ਨੇ ਸਿਖ ਲਿਆ ਹੈ। ਪਰ ਸਰਕਾਰ ਇਨ੍ਹਾਂ ਚਾਰ ਦਿਨਾਂ ਵਿਚ ਹੋਈਆਂ 46 ਮੌਤਾਂ ਅਤੇ ਆਮ ਨਾਗਰਿਕਾਂ ਦੇ ਰੋਸ ਦੇ ਬਾਵਜੂਦ ਪਿੱਛੇ ਨਹੀਂ ਹਟ ਰਹੀ। ਸਨਿੱਚਰਵਾਰ ਨੂੰ ਫਿਰ ਸ਼ਾਂਤੀ ਮਾਰਚ ਕਢਿਆ ਗਿਆ ਜਿਸ ਵਿਚ ਉਹੀ ਕਪਿਲ ਮਿਸ਼ਰਾ ਮੌਜੂਦ ਸਨ ਜਿਨ੍ਹਾਂ ਦੇ ਭਾਸ਼ਣ ਤੋਂ ਬਾਅਦ ਦਿੱਲੀ ਵਿਚ ਦੰਗੇ ਸ਼ੁਰੂ ਹੋ ਗਏ ਸਨ।
Photo
ਇਸ ਸ਼ਾਂਤੀ ਮਾਰਚ ਵਿਚ ਫਿਰ 'ਗੋਲੀ ਮਾਰੋ', 'ਦੇਸ਼ ਕੇ ਗ਼ੱਦਾਰ' ਦੇ ਨਾਹਰੇ ਗੂੰਜਣ ਲੱਗ ਪਏ ਸਨ। ਦਿੱਲੀ ਪੁਲਿਸ ਤੋਂ ਇਜਾਜ਼ਤ ਲਏ ਬਗ਼ੈਰ, ਕੱਢੇ ਗਏ ਇਸ ਮਾਰਚ ਨੂੰ ਦਿੱਲੀ ਪੁਲਿਸ ਦੀ ਸੁਰੱਖਿਆ ਪ੍ਰਾਪਤ ਸੀ, ਇਸ ਲਈ ਕਿਸੇ ਨੂੰ ਹਿਰਾਸਤ ਵਿਚ ਨਾ ਲਿਆ ਗਿਆ। ਹੁਣ ਸੀ.ਏ.ਏ. ਦਾ ਵਿਰੋਧ ਦੇਸ਼ ਦੇ ਕਈ ਸ਼ਹਿਰਾਂ ਵਿਚ ਫੈਲ ਰਿਹਾ ਹੈ ਅਤੇ ਚਿੰਤਾ ਬੰਗਾਲ ਦੀ ਹੈ ਕਿਉਂਕਿ ਅਗਲੀਆਂ ਚੋਣਾਂ ਪਛਮੀ ਬੰਗਾਲ ਵਿਚ ਹੋਣ ਵਾਲੀਆਂ ਹਨ, ਜਿਸ ਕਾਰਨ ਗ੍ਰਹਿ ਮੰਤਰੀ ਕੋਲਕਾਤਾ ਵਿਚ ਸੀ.ਏ.ਏ. ਦੀ ਧਨਵਾਦੀ ਰੈਲੀ ਵਾਸਤੇ ਗਏ।
Photo
ਪਹਿਲਾਂ ਤਾਂ ਜਿਸ ਕਾਨੂੰਨ ਨਾਲ ਦੇਸ਼ ਦਾ ਇਕ ਵੱਡਾ ਵਰਗ ਡਰ ਹੇਠ ਸੁਹਿਮਿਆ ਹੋਇਆ ਹੋਣ ਕਰ ਕੇ ਰੋਸ ਪ੍ਰਗਟ ਕਰ ਰਿਹਾ ਹੈ, ਜਿਸ ਨਾਲ ਦੇਸ਼ ਦੇ ਨਾਗਰਿਕ ਸਰਕਾਰ ਤੋਂ ਨਾਰਾਜ਼ ਹਨ, ਜਿਸ ਨੂੰ ਗ਼ੈਰ-ਸੰਵਿਧਾਨਕ ਮੰਨਿਆ ਜਾ ਰਿਹਾ ਹੈ ਅਤੇ ਜਿਸ ਨੂੰ ਦਿਤੀ ਗਈ ਅਦਾਲਤ ਵਿਚ ਚੁਨੌਤੀ ਦਾ ਜਵਾਬ ਕੇਂਦਰ ਸਰਕਾਰ ਨੇ ਨਹੀਂ ਦਿਤਾ ਅਤੇ ਜਿਸ ਵਿਚ ਦਿੱਲੀ ਅੰਦਰ 46 ਲੋਕ ਅਜੇ ਹੁਣੇ ਹੀ ਮਰੇ ਹਨ, ਉਸ ਦਾ ਜਸ਼ਨ ਮਨਾਉਣ ਦੀ ਗ੍ਰਹਿ ਮੰਤਰੀ ਨੂੰ ਕਾਹਲ ਕਿਹੜੀ ਗੱਲੋਂ ਹੈ?
Photo
ਆਸਾਮ ਵਿਚ ਲੱਖਾਂ ਲੋਕ ਜੇਲ ਤੋਂ ਵੀ ਬਦਤਰ ਰੀਫ਼ੀਊਜੀ ਕੈਂਪਾਂ ਵਿਚ ਰਹਿ ਰਹੇ ਹਨ ਜੋ ਅਦਾਲਤ ਦੇ ਦਰਵਾਜ਼ੇ ਖਟਖਟਾ ਕੇ ਇਹ ਦਾਅਵਾ ਕਰ ਰਹੇ ਹਨ ਕਿ ਕੇਂਦਰ ਦੀ ਨੀਤੀ ਵਿਚ ਬਹੁਤ ਸਾਰੀਆਂ ਖ਼ਾਮੀਆਂ ਹਨ ਪਰ ਦੂਜੇ ਪਾਸੇ ਗ੍ਰਹਿ ਮੰਤਰੀ ਹਨ ਕਿ ਜਿਨ੍ਹਾਂ ਨੂੰ ਧਨਵਾਦ ਰੈਲੀ ਵਿਚ ਸ਼ਾਮਲ ਹੋਣ ਦੀ ਵੀ ਡਾਢੀ ਕਾਹਲ ਹੈ!
Photo
ਗ੍ਰਹਿ ਮੰਤਰੀ ਨੇ ਅਜੇ ਤਕ ਉਨ੍ਹਾਂ 46 ਮੌਤਾਂ ਦੇ ਕਾਰਨਾਂ ਦਾ ਸਪਸ਼ਟੀਕਰਨ ਨਹੀਂ ਦਿਤਾ ਜੋ ਉਨ੍ਹਾਂ ਹੇਠ ਕੰਮ ਕਰਦੀ ਦਿੱਲੀ ਪੁਲਿਸ ਦੇ ਜ਼ਿੰਮੇ ਆਉਂਦੀਆਂ ਹਨ ਪਰ ਉਨ੍ਹਾਂ ਕੋਲ ਸੀ.ਏ.ਏ. ਦੀ ਧਨਵਾਦੀ ਰੈਲੀ ਵਾਸਤੇ ਖੁਲ੍ਹਾ ਸਮਾਂ ਹੈ ਅਤੇ ਉਨ੍ਹਾਂ ਬੰਗਾਲ ਵਿਚ ਜਾ ਕੇ ਉਹੀ ਦਿੱਲੀ ਵਾਲਾ ਮਾਹੌਲ ਸਿਰਜਣ ਦੀ ਕੋਸ਼ਿਸ਼ ਕੀਤੀ ਅਤੇ ਕਈ ਥਾਵਾਂ ਤੇ 'ਗੋਲੀ ਮਾਰੋ' ਵਰਗੇ ਨਾਹਰੇ ਵੀ ਸੁਣਾਈ ਦਿਤੇ ਪਰ ਗ੍ਰਹਿ ਮੰਤਰੀ ਨੂੰ ਫਿਰ ਵੀ ਚਿੰਤਾ ਨਾ ਹੋਈ ਅਤੇ ਉਨ੍ਹਾਂ ਨੇ ਸੀ.ਏ.ਏ. ਬਾਰੇ ਭਾਸ਼ਣ ਦਿਤਾ ਅਤੇ ਮਮਤਾ ਬੈਨਰਜੀ ਵਿਰੁਧ ਜੀਅ ਭਰ ਕੇ ਨਫ਼ਰਤ ਉਗਲੀ।
Photo
ਇਹ ਸਿਆਸਤਦਾਨ ਲੋਕ ਕਦੋਂ ਕੁੱਝ ਸਿਖਣਗੇ? ਪਰ ਇਹ ਸਿਖਣਗੇ ਵੀ ਕਿਉਂ? ਜਦ ਉਨ੍ਹਾਂ ਕੋਲ ਤਾਕਤ ਹੈ ਕਿ ਉਹ ਅਪਣੇ ਵਿਰੁਧ ਬੋਲਣ ਵਾਲੇ ਇਕ ਜੱਜ ਨੂੰ ਰਾਤੋ-ਰਾਤ ਹਟਾ ਕੇ ਅਪਣੇ ਆਗੂਆਂ ਵਿਰੁਧ ਪਰਚੇ ਹੋਣ ਤੋਂ ਬਚਾ ਸਕਦੇ ਹਨ, ਜਦ ਉਹ ਦਿੱਲੀ ਪੁਲਿਸ ਤੋਂ ਕਿਸੇ ਵਿਰੁਧ ਪਰਚੇ ਦਰਜ ਕਰਵਾ ਸਕਦੇ ਹਨ ਅਤੇ ਕਿਸੇ ਵਿਰੁਧ ਰੁਕਵਾ ਸਕਦੇ ਹਨ ਤੇ ਦੇਸ਼ ਉਨ੍ਹਾਂ ਨੂੰ ਚੁਪਚਾਪ ਸਹਿ ਲੈਣ ਤੋਂ ਵੱਧ ਕੁੱਝ ਨਹੀਂ ਕਰ ਰਿਹਾ ਤਾਂ ਉਹ ਕਿਉਂ ਬਦਲਣਗੇ?
Photo
ਇਹ ਸਿਰਫ਼ ਅੰਕੜਿਆਂ ਦੀ ਖੇਡ ਹੈ ਕਿਉਂਕਿ ਬੰਗਾਲ ਦੀ ਮਮਤਾ ਨੂੰ ਅੱਜ ਦੀ ਤਰੀਕ ਭਾਜਪਾ ਆਰਥਕ ਵਿਕਾਸ ਬਾਰੇ ਚੁਨੌਤੀ ਨਹੀਂ ਦੇ ਸਕਦੀ ਕਿਉਂਕਿ ਬੰਗਲਾਦੇਸ਼ ਦੀ ਮੰਦੀ ਦੇ ਬਾਵਜੂਦ ਮਮਤਾ ਦਾ ਰਾਜ ਚੰਗਾ ਚਲ ਰਿਹਾ ਹੈ, ਫਿਰ ਵੀ ਭਾਜਪਾ ਤਾਂ ਅਪਣੀ ਫ਼ਿਰਕੂ ਸਿਆਸਤ ਖੇਡੇਗੀ ਹੀ ਖੇਡੇਗੀ।
Photo
ਦਿੱਲੀ ਵਿਚ ਭਾਵੇਂ ਉਨ੍ਹਾਂ ਦੀ ਸਰਕਾਰ ਨਾ ਬਣੀ ਹੋਵੇ, ਪਰ ਸਮਰਥਨ ਵਧਿਆ ਹੈ। ਪਿਛਲੀ ਵਾਰ ਤੋਂ ਵੱਧ ਸੀਟਾਂ ਲਿਜਾ ਕੇ ਉਨ੍ਹਾਂ ਇਹ ਸਾਬਤ ਕਰ ਦਿਤਾ ਹੈ ਕਿ ਕੰਮ ਕਰਨ ਵਾਲੀ ਪਾਰਟੀ ਵਿਰੁਧ ਉਹ ਨਫ਼ਰਤ ਦੀ ਸਿਆਸਤ ਖੇਡ ਕੇ ਵੀ ਕੁੱਝ ਲੋਕਾਂ ਨੂੰ ਅਪਣੇ ਪਿੱਛੇ ਕਤਾਰਬੰਦ ਕਰ ਸਕਦੇ ਹਨ।
Photo
ਸਾਡੇ ਸਿਸਟਮ ਵਿਚ ਇਕ ਦੂਜੇ ਦੇ ਧਰਮ ਵਿਰੁਧ ਨਫ਼ਰਤ ਦੀ ਮਾਨਸਿਕਤਾ ਏਨੀ ਡੂੰਘੀ ਹੈ ਕਿ ਜਿੰਨੇ ਲੋਕ ਨਫ਼ਰਤ ਵਿਰੁਧ ਹਨ ਓਨੇ ਹੀ ਨਫ਼ਰਤ ਦੇ ਨਾਲ ਵੀ ਹਨ। ਜਿਨ੍ਹਾਂ ਆਦਮੀਆਂ ਕੋਲੋਂ ਦਿੱਲੀ ਦੇ ਕੁੱਝ ਪੁਲਿਸ ਵਾਲਿਆਂ ਨੇ ਅੱਧਮਰੀ ਹਾਲਤ ਵਿਚ ਵੀ ਜਨ ਗਨ ਮਨ ਗਵਾਇਆ, ਉਨ੍ਹਾਂ ਵਿਚੋਂ ਇਕ ਦੀ ਮੌਤ ਹੋ ਗਈ। ਕਾਰਨ ਇਹ ਕਿ ਉਸ ਤੋਂ ਬਾਅਦ ਦਿੱਲੀ ਪੁਲਿਸ ਨੇ ਉਨ੍ਹਾਂ ਆਦਮੀਆਂ ਨੂੰ ਜੇਲ ਵਿਚ ਲਿਜਾ ਕੇ ਬੰਦ ਕਰ ਦਿਤਾ ਜਦਕਿ ਇਕ ਨੂੰ ਦੋ ਗੋਲੀਆਂ ਲਗੀਆਂ ਹੋਈਆਂ ਸਨ।
Photo
ਉਹ ਦੋ ਦਿਨ ਹਿਰਾਸਤ ਵਿਚ ਮਦਦ ਮੰਗਦਾ ਰਿਹਾ ਪਰ ਜਦੋਂ ਜੇਲ ਪਹੁੰਚਿਆ ਤਾਂ ਉਸ ਦੀ ਮੌਤ ਹੋ ਗਈ। ਸਿਆਸਤਦਾਨਾਂ ਦੇ ਹੁਕਮਾਂ ਦੀ ਏਨੀ ਇਮਾਨਦਾਰੀ ਨਾਲ ਪਾਲਣਾ ਆਮ ਨਾਗਰਿਕ ਦੀ ਮਦਦ ਕਰਨ ਵੇਲੇ ਕਦੇ ਨਹੀਂ ਵਿਖਾਈ ਦੇਂਦੀ। ਸਾਡੇ ਸਮਾਜ ਦੀਆਂ ਦਰਾੜਾਂ ਹਾਕਮ ਧਿਰ ਨੇ ਪਛਾਣ ਲਈਆਂ ਹਨ ਅਤੇ ਹੁਣ ਉਸ ਤੇ ਹੀ ਕੇਂਦਰਿਤ ਰਹੇਗਾ। ਜਿੱਤ ਕਿਸ ਦੀ ਹੋਵੇਗੀ, ਇਹ ਤਾਂ ਸਮਾਂ ਹੀ ਦੱਸੇਗਾ। -ਨਿਮਰਤ ਕੌਰ
