ਤਾਜ਼ਾ ਖ਼ਬਰਾਂ

Advertisement

56 ਇੰਚ ਦੀ ਛਾਤੀ ਬਨਾਮ 56 ਇੰਚ ਦਾ ਦਿਲ

ਸਪੋਕਸਮੈਨ ਸਮਾਚਾਰ ਸੇਵਾ
Published May 8, 2019, 1:21 am IST
Updated May 8, 2019, 1:21 am IST
2019 ਦੇ ਚੋਣ ਨਤੀਜਿਆਂ ਬਾਰੇ ਕੋਈ ਵੀ ਪਾਰਟੀ ਪੱਕਾ ਦਾਅਵਾ ਕੁੱਝ ਨਹੀਂ ਕਰ ਸਕਦੀ ਪਰ ਇਨ੍ਹਾਂ ਦੇ ਲੀਡਰਾਂ ਦੇ ਭਾਸ਼ਣਾਂ ਵਿਚ ਇਸ ਵੇਲੇ ਵਰਤੀ ਜਾ ਰਹੀ ਸ਼ਬਦਾਵਲੀ ਤੋਂ ਕੁੱਝ...
56 inch chest Vs 56 inches heart
 56 inch chest Vs 56 inches heart

2019 ਦੇ ਚੋਣ ਨਤੀਜਿਆਂ ਬਾਰੇ ਕੋਈ ਵੀ ਪਾਰਟੀ ਪੱਕਾ ਦਾਅਵਾ ਕੁੱਝ ਨਹੀਂ ਕਰ ਸਕਦੀ ਪਰ ਇਨ੍ਹਾਂ ਦੇ ਲੀਡਰਾਂ ਦੇ ਭਾਸ਼ਣਾਂ ਵਿਚ ਇਸ ਵੇਲੇ ਵਰਤੀ ਜਾ ਰਹੀ ਸ਼ਬਦਾਵਲੀ ਤੋਂ ਕੁੱਝ ਅੰਦਾਜ਼ਾ ਤਾਂ ਜ਼ਰੂਰ ਲਗਾਇਆ ਜਾ ਸਕਦਾ ਹੈ। 2014 ਵਿਚ ਭਾਜਪਾ ਨੇ ਬੜਾ ਹੀ ਹਾਂ-ਪੱਖੀ ਚੋਣ ਪ੍ਰਚਾਰ ਕੀਤਾ ਸੀ, 'ਸੱਭ ਕਾ ਸਾਥ, ਸੱਭ ਕਾ ਵਿਕਾਸ'। ਲੋਕਾਂ ਨੂੰ ਇਕ ਸੁਪਨਾ ਵਿਖਾਇਆ ਗਿਆ ਸੀ। ਜੁਮਲਾ ਸੀ ਜਾਂ ਉਨ੍ਹਾਂ ਦਾ ਸੁਪਨਾ, ਇਸ ਨੂੰ ਪੂਰਾ ਕਰਨ ਵਿਚ ਉਹ ਅਸਮਰਥ ਰਹੇ, ਪਰ ਹੁਣ ਉਹ ਕੁੱਝ ਵਖਰਾ ਹੀ ਕਹਿ ਰਹੇ ਹਨ। ਉਸ ਸਮੇਂ ਕਾਂਗਰਸ ਕੋਈ ਸੁਪਨਾ ਨਹੀਂ ਸੀ ਵਿਖਾ ਰਹੀ ਤੇ ਭਾਜਪਾ ਉਤੇ ਖ਼ੂਨ ਦੇ ਦੋਸ਼ ਲਗਾ ਰਹੀ ਸੀ। ਉਸ ਵਕਤ ਕਾਂਗਰਸ ਦੀ ਘਬਰਾਹਟ ਸੀ ਜੋ ਸ਼ਾਇਦ ਉਨ੍ਹਾਂ ਦੇ ਬੋਲਾਂ ਵਿਚੋਂ ਝਲਕ ਰਹੀ ਸੀ। 

Lok Sbha ElectionLok Sbha Election

ਇਨ੍ਹਾਂ ਪੰਜ ਸਾਲਾਂ ਵਿਚ ਸ਼ਬਦੀ ਜੰਗ ਨੇ ਕਈ ਰੰਗ ਵਟਾਏ, ਜੁਮਲੇ ਬੋਲਣੇ ਸਰਕਾਰ ਵਲੋਂ ਸ਼ੁਰੂ ਹੋਏ ਤੇ ਇਨ੍ਹਾਂ ਵਿਚ ਗਿਰਾਵਟ ਵਧਦੀ ਹੀ ਗਈ ਤੇ ਹੁਣ ਤਾਂ ਜਦ ਵੀ ਲੱਗਣ ਲਗਦਾ ਹੈ ਕਿ ਇਹ ਲੋਕ ਹੋਰ ਨੀਵਾਂ ਨਹੀਂ ਡਿੱਗ ਸਕਦੇ ਤਾਂ ਅਗਲੇ ਪਲ ਇਹ ਲੋਕ ਕੁੱਝ ਹੋਰ ਵੀ ਡੂੰਘੇ ਜਾ ਡਿੱਗੇ ਨਜ਼ਰ ਆਉਂਦੇ ਹਨ। ਜਦ ਸਿਆਸਤਦਾਨਾਂ ਦੀ ਭਾਸ਼ਾ ਦੀਆਂ ਗੱਲਾਂ ਹੁੰਦੀਆਂ ਹਨ ਤਾਂ ਉਮਾ ਭਾਰਤੀ, ਸਾਧਵੀ ਪ੍ਰਗਿਆ, ਯੋਗੀ ਅਦਿਤਿਆਨਾਥ, ਅਸੀਮਾ ਨੰਦ ਵਰਗਿਆਂ ਦੀ ਗੱਲ ਨਹੀਂ ਕਰਦੇ ਕਿਉਂਕਿ ਇਹ ਨੀਮ-ਸਿਆਸੀ ਲੋਕਾਂ ਦਾ ਉਹ ਵਰਗ ਹਨ ਜੋ ਆਮ ਮਾਪਦੰਡਾਂ ਅਨੁਸਾਰ ਨਹੀਂ ਆਂਕੇ ਜਾ ਸਕਦੇ।

Congress is saying MeToo about surgical strike : ModiNarendra Modi

ਇਨ੍ਹਾਂ ਦਾ ਇਸਤੇਮਾਲ ਇਕ ਸੰਕਟ ਵਿਚ ਵਰਤੇ ਜਾਣ ਵਾਲੇ ਨਸ਼ਤਰ ਵਾਂਗ ਹੁੰਦਾ ਹੈ ਤੇ ਰਾਜ ਤੇ ਵਿਕਾਸ ਵਿਚ ਇਨ੍ਹਾਂ ਦਾ ਯੋਗਦਾਨ ਨਹੀਂ ਹੋ ਸਕਦਾ। ਇਹ ਲੋਕ ਸਿਆਸਤ ਵਿਚ ਇਕ ਤਜਰਬੇ ਵਾਂਗ ਆਏ ਸਨ ਜਿਨ੍ਹਾਂ ਦਾ ਜਵਾਬ ਹੁਣ ਉੱਤਰ ਪ੍ਰਦੇਸ਼ ਦੀ ਜਨਤਾ ਦੇਵੇਗੀ। ਪਰ ਇਨ੍ਹਾਂ ਵਰਗੀ ਸ਼ਬਦਾਵਲੀ ਜਦ ਭਾਰਤ ਦੀ ਸੱਭ ਤੋਂ ਉੱਚੀ ਕੁਰਸੀ ਉਤੇ ਬੈਠੇ ਪ੍ਰਧਾਨ ਮੰਤਰੀ ਮੋਦੀ ਵਲੋਂ ਵਰਤੀ ਜਾਂਦੀ ਹੈ ਤਾਂ ਇਹ ਗੱਲ ਪੱਕੀ ਹੋ ਜਾਂਦੀ ਹੈ ਕਿ ਅੰਦਰਖਾਤੇ ਭਾਜਪਾ ਵਿਚ ਨਫ਼ਰਤ ਕੁੱਟ-ਕੁੱਟ ਕੇ ਭਰੀ ਹੋਈ ਹੈ ਤੇ ਨਰਿੰਦਰ ਮੋਦੀ ਘਬਰਾਏ ਹੋਏ ਹਨ। ਸਿਆਸਤਦਾਨਾਂ ਦੇ ਸ਼ਬਦੀ ਵਾਰ ਇਕ ਦੂਜੇ ਉਤੇ ਆਮ ਚਲਦੇ ਰਹਿੰਦੇ ਹਨ। ਬੀਬੀ ਹਰਸਿਮਰਤ ਨੇ ਅਜਕਲ ਹੀ ਮੁੱਖ ਮੰਤਰੀ ਨੂੰ ਚੁੱਲੂ ਭਰ ਪਾਣੀ ਵਿਚ ਡੁਬਕੀ ਲਗਾਉਣ ਦੀ ਸਲਾਹ ਦਿਤੀ ਹੈ।

Rajiv GandhiRajiv Gandhi

ਪਰ ਅੱਜ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਰਾਹੁਲ ਗਾਂਧੀ ਦੇ ਪਿਤਾ ਦੀ ਮੌਤ ਦਾ ਤਾਹਨਾ ਮਾਰ ਕੇ ਸਿਆਸਤ ਵਿਚ ਵਿਰੋਧੀ ਵਿਰੁਧ ਨੀਵੇਂ ਪੱਧਰ ਤੇ ਜਾ ਕੇ ਵਾਰ ਕਰਨ ਦੀ ਇਕ ਨਵੀਂ ਉਦਾਹਰਣ ਪੇਸ਼ ਕਰ ਦਿਤੀ ਹੈ ਜੋ ਭਲੇ ਲੋਕਾਂ ਨੂੰ ਕਦੇ ਨਹੀਂ ਭੁੱਲੇਗੀ। ਭਾਵੇਂ ਸਿੱਖਾਂ ਲਈ ਰਾਜੀਵ ਗਾਂਧੀ ਜਾਂ ਇੰਦਰਾ ਗਾਂਧੀ ਤੋਂ ਵੱਡਾ ਕੋਈ ਹੋਰ ਗੁਨਾਹਗਾਰ ਨਹੀਂ ਹੋ ਸਕਦਾ, ਪਰ ਅੱਜ ਤਕ ਕਿਸੇ ਨੇ ਉਨ੍ਹਾਂ ਦੇ ਬੱਚਿਆਂ ਨੂੰ ਪਿਤਾ ਦੀ ਮੌਤ ਨੂੰ ਯਾਦ ਕਰ ਕੇ 'ਨੰਬਰ ਇਕ ਭ੍ਰਿਸ਼ਟਾਚਾਰੀ' ਹੋਣ ਦਾ ਤਾਹਨਾ ਨਹੀਂ ਮਾਰਿਆ। 

Priyanka Gandhi and Rahul GandhiPriyanka Gandhi and Rahul Gandhi

ਪਰ ਕਾਂਗਰਸ ਦੇ ਯੁਵਰਾਜ ਨੇ ਅਪਣੇ ਜਵਾਬ ਨਾਲ ਖ਼ੁਦ ਨੂੰ ਬੜਾ ਉੱਚਾ ਸਾਬਤ ਕਰ ਦਿਤਾ ਹੈ। ਅੱਜ ਰਾਹੁਲ ਜਾਂ ਪ੍ਰਿਯੰਕਾ ਮੂੰਹ ਤੋੜ ਜਵਾਬ ਦਿੰਦੇ ਤਾਂ ਉਸ ਨੂੰ ਕੋਈ ਮਾੜਾ ਨਾ ਆਖਦਾ। ਪਰ ਸਹਿਣਸ਼ੀਲਤਾ ਤੇ ਪਿਆਰ ਦਾ ਸੰਦੇਸ਼ ਦੇ ਕੇ ਭੈਣ-ਭਰਾ ਨੇ ਸਿਆਸਤ ਵਿਚ ਇਕ ਚੰਗੀ ਥਾਂ ਬਣਾ ਲਈ ਹੈ। ਚੋਣਾਂ ਸ਼ੁਰੂ ਹੋਣ ਤਕ ਵੀ ਰਾਹੁਲ ਤੇ ਵਿਸ਼ਵਾਸ ਕਰਨ ਵਾਲੇ ਘੱਟ ਸਨ, ਪਰ ਅੱਜ ਜਾਪਦਾ ਹੈ ਕਿ ਵਿਰੋਧੀ ਪਾਰਟੀਆਂ ਵੀ ਰਾਹੁਲ ਨਾਲ ਮਹਾਂਗਠਬੰਧਨ ਬਣਾਉਣ ਨੂੰ ਤਿਆਰ ਹੋ ਰਹੀਆਂ ਹਨ। ਰਾਹੁਲ ਗਾਂਧੀ ਨੇ ਪ੍ਰਧਾਨ ਮੰਤਰੀ ਮੋਦੀ ਨਾਲੋਂ ਹਰ ਕਦਮ ਉਲਟਾ ਚਲਿਆ ਹੈ।

Rahul-ModiRahul-Modi

ਜੇ ਮੋਦੀ ਪੱਤਰਕਾਰਾਂ ਨਾਲ ਗੱਲਬਾਤ ਕਰਨ ਤੋਂ ਡਰਦੇ ਹਨ ਤਾਂ ਰਾਹੁਲ ਗਾਂਧੀ ਨੇ ਹਰ ਛੋਟੇ-ਵੱਡੇ ਪੱਤਰਕਾਰ ਦੇ ਸਵਾਲਾਂ ਦਾ ਜਵਾਬ ਬਿਨਾਂ ਕਿਸੇ ਝਿਜਕ ਦੇ ਦਿਤਾ ਹੈ। ਰਾਹੁਲ ਗਾਂਧੀ ਇਕ ਸਿਆਸਤਦਾਨ ਹੋ ਕੇ ਵੀ ਮੰਚਾਂ ਤੋਂ ਪਿਆਰ ਤੇ ਜੱਫੀ ਦੀ ਗੱਲ ਕਰਦੇ ਹਨ। ਅੱਜ ਇਕ ਨੇਤਾ 56 ਇੰਚ ਦੀ ਛਾਤੀ ਹੋਣ ਦਾ ਦਾਅਵਾ ਕਰਦਾ ਹੈ ਤਾਂ ਦੂਜਾ 56 ਇੰਚ ਦਾ ਦਿਲ ਵਿਖਾ ਰਿਹਾ ਹੈ। ਕੀ ਇਹ ਵੀ ਇਕ ਜੁਮਲਾ ਹੈ? ਇਸ ਦਾ ਪਤਾ ਉਦੋਂ ਚੱਲੇਗਾ ਜਦ ਉਨ੍ਹਾਂ ਨੂੰ ਕਦੇ ਅਪਣਾ ਸ਼ਾਸਨ ਸਥਾਪਤ ਕਰਨ ਦਾ ਮੌਕਾ ਮਿਲਿਆ। ਪਰ ਕਾਂਗਰਸ ਦੇ ਨਵੇਂ ਪ੍ਰਧਾਨ ਉਤੇ ਉਮੀਦ ਟਿਕੀ ਰਹੇਗੀ ਕਿ ਕਦੇ ਉਹ ਅਪਣੇ ਇਸ ਵੱਡੇ ਦਿੱਲ ਦਾ ਪ੍ਰਦਰਸ਼ਨ ਸਿੱਖਾਂ ਵਾਸਤੇ ਵੀ ਕਰਨਗੇ ਤੇ ਉਨ੍ਹਾਂ ਦੀ ਦਾਦੀ, ਪਿਤਾ ਵਲੋਂ ਇਕ ਪੂਰੀ ਕੌਮ ਨੂੰ ਦਿਤੇ ਜ਼ਖ਼ਮਾਂ ਨੂੰ ਭਰਨ ਦਾ ਯਤਨ ਵੀ ਕਰਨਗੇ।  - ਨਿਮਰਤ ਕੌਰ

Location: India, Punjab
Advertisement